بەرپرسا لقێ دھوك یا ئێكەتیا ژنانا كوردستان گۆت: كومەلگەھێن رۆژهەلاتی ب كومەلگەھێن داخستی دھێنە ناڤكرنێ و هەرێما كوردستانێ ژی ڤەدەر نینە ژ وان كومەلگەھان و دڤێت بڤێ چەندێ رازی بین، لێ مەرەم ژێ ئەو نینە مافێن ژنان بهێنە بنپێكرن و گوھـ ل داخوازیێن وان نەھێتەگرتنێ.
لە دیدارەکا تایبەت ب کوردستانی نوێ- یا بادینان گوت: «دڤێت مە پرۆژە بۆ ھشیاركرنێ و پێگەھاندنا ژنان هەبن و بەلكو بۆ زەلامی ژی، ژبەركو ژن و زەلام تەمامكەرێن ئێكن و ژیانا وان پێكڤەیە».
دیدار: بامەڕنی
* تو وەك چالاكڤانەكا ژن، ئایا تو هەست دكەی مافێن ژنان دھێنە خارنێ؟
- ئەڤ لێكدانەیە گەلەك جاران ب شاشی دھێتە وەرگرتنێ، دەما ئەم بەحسا مافێن ژنان دكەین، ئەم بەحسا وێ چەندێ ناكەین وەكی كچێن ئەوروبی هەر ئێكێ ژوان شقا خوە هەبیت و یا جودا بیت، ژبەركو ئەم جڤاكەكێ ئایندارین و مە ھندەك بنەمایێن نە گوھور یێن هەین و دیسان مە داب و نەریت یێن هەین، رەنگە خوە د سەررا ھاڤێتن یا ئاسان نەبیت، لێ ژ گەلەك روویێن دیڤە مافێن ژنان دھێنە خارنێ و سەرەرایی ڤێ پێشكەفتنا نوكە و چاڤرونیێ لێ ھێشتا ل گەلەك جهان ژن وەك كویلە دھێتە ناسكرنێ.
* تو وەك بەرپرسا لقێ دھوكێ یا ئێكەتیا ژنانی كوردستان، تە چ شیرەت بۆ دەیبابان و بۆ كچان و بۆ كومەلگەھی هەنە؟
- ئەز شیرەتا ل كەسێ ناكەم لێ تنێ دێ ھندەك پرسیاران بۆ ڤان هەر سێ تەخێن تە گوتین ئازرینم، ئایا دەیباب جوداھیێ دناڤبەرا كور و كچێن خوەدا دكەن؟ بلا ئەڤە پرسیار بیت ژبۆ وان، ژبەركو دەما جوداھیێ دكەن، كچا بچیك چ گونەھا وێییە خودێ كچ دایی؟ دەما ببینیت دەیبابێن وێ رەفتارەكا جوانتر دگەل برایێ وێ دكەن، ژ كرینا تشتان و دیارییان و دەرێخستنان و تا ژن ئینانێ و دانەشوویێ ژی، ئەرێ دەیبابێن مە جارەكێ پرسیار ژ خوەكریە بوچی ئەو د بەرهەڤن بۆ كورێن خوە ل كچەكا جوان و باش بگەرن، بەلێ د بەرهەڤ نینن بۆ كچا خوە ژی ل كورەكێ لاو زیرەك بگەرن و ئایندێ وێ مسوگەر بكەن؟ ئھا یا من دڤێت ئەز بژمە دەیبابان ئەڤ جوداكارییە دناڤبەرا كور و كچاندا نەھێتە كرنێ و كارتێكرنەكا خراب ل ئایندێ هەردووكان دكەت و سەبارەت گوتنا من بۆ كچان، ئەگەر كچان بڤێت دزیرەك بن، لێھاتوو بن، نەھێنە (ئیستیغلالكرن) و نەھێنە د سەردابرن، بۆ لا خوە پێبگەھینن و خوە ئاڤا بكەن، ئەگەر كەسەكێ ئاڤا بیت كەس نەشێت د سەردا ببەت، ژبەركو پێدڤییا وی ب كەسێ دی نینە، دا باشتر ب نموونە بێژم، دەما كچەك بچیتە كارەكی و هەر كارەك بیت، دێ نموونا كومبیوتەری ئینم، ئەگەر وێ شارەزایی نەبیت، ئەو نەچارە دا بشێت بەردەوامیێ بدەتە كارێ خوە، دڤێت خوە پێدڤی كەسەكێ دی بكەت و ھوسان سەردابرن دروشت دبیت، یانكو یا من دڤێت بێژم، كچ دشێت خوە ئاڤا بكەت و توشێی چ كێشان نابیت و باشترین چەكە بۆ وێ، سەبارەت بۆ كومەلگەھی ژی، خوزی مایتێكرن نەبایە، مایتێكرنا دەیبابان ل یانا كچا وان یا شیكری یان كورێ وان یێ ب ژن، ئەڤ بابەتێ شەرمێ ھاتبایە كێمكرن و كچ نە بتنێ عەورەت بیت و هەر چ زوی بیت ژخوە ڤەكەن بەلكو چ جوداھییا وی و كوری نینە ئەگەر ب چاڤێ یەكسانیێ ل هەردووكان بنێرن.
ئایا دەیباب جوداهیێ دناڤبەرا كور و كچێن خوەدا دكەن؟ بلا ئەڤە پرسیار بیت ژبۆ وان، ژبەركو دەما جوداهیێ دكەن، كچا بچیك چ گونەها وێییە خودێ كچ دایی؟ دەما ببینیت دەیبابێن وێ رەفتارەكا جوانتر دگەل برایێ وێ دكەن؟
* وەك چالاكڤانەك د بیاڤێ ژناندا، پێنەڤێت وە ئەزموون یێن هەین ل سەر پێكڤە ژیانێ، بدیتنا تە خێزانێن سەركەفتی كیشكن؟
- ئەڤە یا ب ساناھییە، ئەگەر دناڤ ژن و مێران دا تێگەھشتن هەبیت، باوەرناكەم ھیچ جارەكێ كێشێن دروست ببن، ئەگەر هەبن ژی و خوە ئەو چەند كێشە دمەزن بن دێ زوی ھێنە چارەسەركرن و ئەڤە بۆ وان بخوە مینیت ئایا كێشان مەزن بكەن یان بچویك بكەن و دڤێت ژن و مێر دئێك و دوو بگەھن، بەھانا ل ئێك و دوو نەگرن، ل رێكێن چارەسەریێ بگەرن و گوھێ وان ل ئاخفتنێن كەسێن دی نەبیت، ب حالێ خوە رازی بن.
* نوكە رێژەكا زورا كچان هەنە، دەرچوویێن پەیمانگەھـ و زانكویانە و بێكارن؟
- بابەتێن ئابووری و سیاسی كارتێكرن یا ل هەمی تەخێن جڤاكی كری، رێژا بێكاریێ ھندی بێژی یا زێدەیە و ئەڤە دبیتە ئەگەرێ سەرھلدانا كێشێن خێزانی چ یێن زگورد یان خێزاندار، راستە دەرفەتێن كاری نینن و پەیدابوونا وان یا ب زەحمەتە، لێ ژبەركو تە بەحسا دەرچوویێن زانینگەھێ و پەیمانگەھان كر، پێنەڤێت وان ھندەك بسپوری و شارەزایی یا هەی دێ شێن خوە گونجینن، ئەگەر ڤێ پرسیارێ وەك تاك ژمن بكەی، بدتنا من دەرچوویا زانینگەھێ یان كو ئاڤاكرنا كەسەكی و دڤێ قوناغێدا مەرج نینە ئیللا دامەزراندن هەبیت، بەلكو نابیت ئەڤ كچە چ دەرفەتان ژخوە بكەت، ئەگەر زانی دێ شێت دەلیڤەكا كاری بۆ خوە پەیدا بكەت، چ كارێن دەستی بن یان پرۆژەكێ بچیك بیت یان هەر تشتەك كو شیان و زرەكییا خوە تێدا دیار بكەت.
* كی مالێ برێڤەببەت باشترە، ژن یان زەلام؟
- رەنگە ئەڤە سەرۆكانییا ناكوییان بیت دناڤبەرا ژن و زەلامیدا، دەما ئەم بەحسا كومەلگەھی دكەین یان بەحسا یەكسانیێ دكەین، زێدەتر ئەم بەحسا ڤی بابەتی دكەین، خێزان یان كو ئیدارەدان، ئەگەر ئێك ژ هەردووكان ژن یان زەلام كەسەكێ رێبەر نەبیت و مەرج نینە هەردەم زەلام هەمی زان بیت و ژن ژی بتنێ ل بەر چاڤدێرییا وی بیت یا من دڤێت بێژم رۆلێ ژنان و زەلامان یێ جودایە، لێ دڤێت ئێك ژ هەردووكان سەرەدەریێ دگەل داھاتێ مالێ بكەت، وەك مەزاختن چ ژن بیت و چ زەلام و گەلەك جاران ژنان باشتر مال برێڤەبرییە و ئەڤە بۆ تێگەھشتنا هەردووكان دمینیت، نابیت ژن خوە بەردەت و بێژیت ئەو بەرپرساتییا زەلامییە و نابیت زەلام ژی ھزر بكەت بتنێ وی ئەڤ مافە یێ هەی، ژبەركو ئەم یێ بەحسا خێزانەكا سەركەفتی دكەین.
