بەسەرپەرشتی هاوپەیمانان و بەشداری دژەتیرۆری عیراق و سوپای عیراق و پێشمەرگە، بەدرێژایی 11 كیلۆمەتر هێرشێكی یەكلاكەرەوە بۆ سەر بنكە و بارەگاكانی داعش لە قەرەچوغ دەستی پێكرد.
غازی فەیسەڵ فەرماندەی خۆبەخش و كارگێڕی مەڵبەندی قەرەچوخی یەكێتیی نیشتمانیی كوردستان رایگەیاند: بەرەبەیانی ئەمڕۆ، هێرشەكە دەستیپێكرد كە پێیدەچێت هێرشێكی یەكلاكەرەوە بێت دژی چەكدارانی داعش لەشاخی قەرەچوغ و چەند رۆژێك بخایەنێت.
وتیشی: لەم هێرشەدا فڕۆكەی شەڕكەر و هەلی كۆپتەر پشتیوانی هێزە زەمینیيەكەی دژەتیرۆری عیراق دەكەن، دانیشتوانی ناوچەكەش بەپەرۆشەوە چاوەڕوانی ئەنجامی شەڕەكە دەكەن تا بەئارامی بگەڕێنەوە گوندەكانی خۆیان.
راشیگەیاند: هەر لەسەرەتای هاتنی داعش بۆ شاخی قەرەچوغ هێزە پارتیزانە خۆبەخشەكەی یەكێتیی نیشتمانیی كوردستان بەشدارێكی كارای هێرشەكانی دژ بە داعش بوون، ئێستاش بەهەمان شێوە بەپێی توانا و شارەزاییان بەژمارەیەكی كەمەوە بەڵام بەشارەزاییەكی زۆرەوە لەگەڵ هاوپەیمانان و دژە تیرۆردا بەشداری ئەم هێرشەن.
.jpeg)
#قەرەچوغ
