ساڵی (1954) لەدایك بووم، تاكو ساڵی (1972) لە لادێ و لە شاری كەركوك ژیاوم، پاییزی ساڵی (1972) لە پۆلی یەكی كۆلێژی ئەندازەی زانكۆی سلێمانی وەرگیرام. پێش ئەوەی بێمە سلێمانی، لە كەركوك (لە ناو شار و لە لادێ) قەت گوێم لە وشەی (نێرەمووك) نەبوو بوو، كە هاتمە زانكۆی سلێمانی، سەیرەكەم خوێندكارانی پۆلەكەم لە خەڵكی سلێمانی و هەولێر لەجیاتی وشەی (نێرەبووك) دەڵێن (نێرەمووك)!
ئەو زاراوەیەم زۆر لا سەیر بوو، پێی پێدەكەنیم، لە ساڵی (1972)ەوە تاكو ئێستا لە دەیان و بگرە سەدان و زیاتریش خوێندكار و رۆشنبیر و نووسەر و خەڵكی ئاسایی هەولێر و سلێمانیم پرسیووە، ئەرێ (مووك) واتای چییە؟ هەموو پێدەكەنن و دەڵێن نازانین!
بێگومان (نێرەبووك) بەو كەسە دەڵێن كە ئەندامی نێرینە و ئەندامی مێینەی هەبێت، (نە نێرە و نە مێیە) (هەم نێرە و هەم مێیە). بووك بەو كچە دەڵێن كە شوو دەكات، باوك و دایكی كوڕیش بە ژنی كوڕەكەیان دەڵێن (بووكەكەمان)، كەواتە وشەی (بووك) وەك سیفەتێك تەنها بۆ (مێ) بەكاردێت. من نەمبیستووە و نەمخوێندووەتەوە بۆ (نێر) بەكاربێت، كەواتە زاراوەی (نێرەبووك) واتا (نێر و مێ) پڕ بە پێستی كەسەكەیە. زۆربەی زۆری نووسەرانی كوردی زاری سۆرانی دەڵێن و دەنووسن (نێرەمووك)، منیش دەڵێم و دەنوسم (نێرەبووك)، تۆ بڵێی من غەڵەت و شێت بم؟ یاخود كوردیی نازانم؟ ئەوان كوردیزانتر بن لە من؟
(52) ساڵە بەدوای وشەی (مووك)ەوەم، یەك كەس بە روونیی وەڵامی نەداومەتەوە و بۆی شی نەكردوومەتەوە كە وشەی (مووك) واتای چییە و لە چییەوە هاتووە!! تەماشای چەندین فەرهەنگم كردووە هیچم دەست نەكەوتووە، لەم رۆژانەدا كە ئەم وتارەم دەنووسی پێنج فەرهەنگم لەبەردەستدا بوو (فەرهەنگی خاڵ، فەرهەنگی نۆبەرە، فەرهەنگی هەنبانە بۆرینە، فەرهەنگی ئەستێرە گەشە، فەرهەنگی كوردستان)، چواریان بە هیچ شێوەیەك باسی وشەی (مووك یاخود موك) ناكەن، تەنها لە فەرهەنگی هەنبانە بۆرینەدا نوسراوە: موك (بە یەك واو) واتا (ساق و تەواو، بێ كەمایەسی)، من نازانم (ساق و تەواو) واتای چییە! هەركەسێك دەیزانێت بۆم لێكبداتەوە زۆر سوپاسی دەكەم. وشەی (كەمایەسی) زیاتر نووسەرانی رۆژهەڵات بەكاری دێنن، چەند ساڵێكە هەندێك نووسەری باشووریش بەشێوە نووسینی جیاواز و بە سەقەتی بەكاریدەهێنن (بەقسەی خۆیان بۆ دەوڵەمەندكردنی زمانی كوردییە)، گوایە كەمایەسی واتا كەموكوڕیی، بێ كەمایەسی واتا بێ كەموكوڕیی، بەپێی ئەو دوو لێكدانەوەیەی هەنبانە بۆرینە، دەتوانین لەجیاتی زاراوەی (نێرەمووك) بنوسین:
1. نێرە ساق و تەواو
2. نێرە بێ كەموكوڕیی
بەڕای ئێمە ئەو دوو زاراوەیە فڕی بەسەر زمانی كوردییەوە نییە و ئێمە هیچی لێ تێناگەین. ئێمە نە بە بیستن بیستوومانە و نە بە نووسین بینیومانە كە وشەی (مووك-موك) بە تەنها یاخود بە لێكدراویی، كورد بەكاریهێنابێت یاخود ئێستا لە قسەكردن و نووسیندا بەكاریبهێنێت. كەواتە (مووك) وشەیەكی نامۆ و بێ رەگ و ریشەیە لە زمانی كوردیدا. لەبەرئەوە بەڕای ئێمە زاراوەی (نێرەمووك) راست نییە و زاراوەی (نێرەبووك) راستە. بەقسەم دەكەن بیكەن، بەقسەم ناكەن کەیفی خۆتانە.
