لەگەڵ هونەرمەند (تەنیا خانەقیی)لەبواری هەڵكۆڵینی دار كارەدەست رەنگینەكانی ئەنجام دا، چاوپێكەوتنمان لەگەڵی سازكرد و تیایدا چەندین پرسیارمان ئاراستە كرد و بەم شێوە وەڵامی پرسیارەكانمانی دایەوە.
*بیرۆكەی هەڵكۆڵینی دارو تەختە لە چییەوە دروست بوو؟
لەساڵانی نەودەكاندا بەهۆی ئاوارەبوونم لە شارەكەم خانەقی و دووری لەنیشتمانەكەم، هەمیشە بەدوای ئەوەدا دەگەڕام گوزارشت لە هەست و سۆزم بكەم، بۆیە هەمیشە پەنام دەبردە بەر خوێندەوەی شاعیرەكانی گەلی كوردو پەند و قسە نەستەقەكانی گەلەكەمان، ئەمەش وای كرد بیێتە رێنیشاندەرم بۆ بەدی هێنانی خەونەكەم و دەربرینی قسە نەوتراوەكانی نێو دڵم، بۆیە بیرۆكەی ئەوەم بۆ هات، شیعری شارانی گەلی كورد و پەندپێشنان لەسەر دارو تەختە هەڵكۆڵم و وشەكان لەسەر تابلۆكانم بنەخشێنم.
*ئامانجت لە دروست كردنی ئەم تابلۆیانە چی بوو؟
دیارە دووری لەشار ونیشتمانەكەم هەردەم ئەو سۆزە نیشتمان پەروەرییەی دەجوڵاندم، بۆئەوەی لەرێگەی تابلۆكانمەوە گوزارشت لە ئازار و مەینەتی میللەتەكەم بكەم و پەیامی ئازادیی گەلێك بدەم بەگۆی هەموواندا، بۆ ئەو مەبەستەش زیاتر لە (35) پێشەنگای تایبەت بە خۆم هەیە و هەریەك لەو پێشەنگایانە گوزارشت بوون لە نەهامەتی گەلێك بەبێ دەوڵەت.
*ئایا لە ئایندەدا هیچ بەرنامەیەكت هەیە؟
بەڵی بەدڵنیایەوە لەسەر دروست كردنی تابلۆكانم بەردەوام دەبم و ئامانجیشم ئەوەیە سەنتەرێك بۆ فێرخوازانی ئەم هونەرە بكەمەوە بۆئەوەی بتوانین كەسانێكی زۆر پەروەردە بكەین و ئەم كارە نەوە دوای نەوە بمێنێتەوە.
*دواپرسیارمان ئەوەیە چیت بۆ خانەقی هەیە؟
خانەقی، پارچەیەكی دانەبڕاوی دڵمە، لەهەموو بەشێكی ژیانم ،كە لەتابلۆكانمە گوزارشتم لە شارەكەم كردووە بە شیعر یا خود بە نووسینی چەندین وشە، بۆیە هەرگیز تابلۆكانم لە خانەقی دانابڕێن و هەردووكیشیان رۆح و جەستەن بەبێ یەكتری ناژین. هەربۆیە چاوەڕێی رۆژی خانەقی دەكەم زیاتر لە (10) تابلۆی هەڵكۆڵراوم ئامادەكردووە و لەو رۆژەدا نمایشی دەكەم.
سازدانی: دیار جەوهەر
