ئەگەرچی گەرمەسێر بەشێكی گرنگی خاكی كوردستانە، بەڵام میدیای كوردی وەك پێویست لەوێدا ئامادە نییە.
سنوری دەڤەری گەرمەسێر و خانەقینیش وەك سەنتەری شارنشینیی ئەو دەڤەرە كوردستانییە، ساڵانێكی زۆرە لە هەموو هەڵبژاردنەكانی عێراقدا لە رێگەی خەڵكە كوردستانی و بەتایبەتییش دانیشتوانە كوردەكەیەوە، كوردستانییبوونی خۆیان دەسەلمێنن و دەنگ بە هێزە كوردییەكان دەدەن، بەڵام لەگەڵ ئەوەشدا زۆر دامودەزگای راگەیاندنی كوردی ئەو سنورەیان فەرامۆش كردووەو هیچ نووسینگەو تەنانەت پەیامنێرێكیان تێیدا نییە.. كوردستانی نوێ لە گەشتێكی مەیدانیدا كە پێش ماوەیەك بۆ ناوچەكەی كرد، لە سەر زمانی دانیشتوانی ناوچەكەو نووسەرانەوە ئەو زانیارییەی بۆ پشت راست بووەوە كە زۆربەی كەناڵە ئاسمانییە كوردییەكان بوونیان لە سنورەكەدا نییە، یان وەك پێویست نییە، لەناویاندا تەنانەت كەناڵ 8 و كەناڵی ئاسمانیی كوردسات كە خانەقینییەکان داوایان دەكرد نووسینگە یان پەیامنێریان هەبێت، بەتایبەتی كە لە سنورەكەدا نزیكەی 30 دەزگای راگەیاندنی عەرەبی هەیەو بایەخ بە هەواڵەکانی گەرمەسێر دەدەن.
