راپۆرتی: سامان یاروەیس
لەماوەی رابردوودا بەهۆی ململانێ سیاسییەكانی نێوان هەرێم و بەغدا و هەروەها ئەو گوشارانەی كە مێژوویەكە یەخەی شارەكەی گرتووە، نەتوانراوە وەك پێویست ئاوڕ لە خانەقی بدرێتەوە، ئێستا شارەكە پێویستی بە هەنگاوی گەورەتر و بودجەی زیاترە، بەشێك لە چالاكوانان و هاووڵاتیانی ناوچەكەش پێیانوایە هاتنی پارێزگاری دیالە بۆ شارەكە، شتی نوێی پێ نەبوو.
پارێزگار چی وت؟
عەدنان محەمەد شەمەری پارێزگاری دیالە لە سەردانێكی مەیدانیدا شاری خانەقی بەسەركردەوە و لەگەڵ سەرۆك و لایەنە ئیدارە ئیدارییەكانی شارەكەدا كۆبووەوە، دواتر لە هۆڵی كەلتوریی شارەكە لەگەڵ ژمارەیەك لە چین و توێژەكاندا گفتوگۆی كرد، لەبارەی شارەكەوە بۆ كوردستانی نوێی خانەقی وتی: شاری خانەقی گرنگیی خۆی هەیە، ناوچەیەكی ستراتیژییە و هێڵێكی گەورەی بازرگانی پێدا تێدەپەڕێت، بۆیە پێویستە گرنگیی زیاتری پێبدرێت.
وتیشی: ژمارەیەك پرۆژە لە شارەكە كراوە، ئەمڕۆ بەشێكیمان بینی، هەوڵدەدەین لە داهاتوودا هەنگاوی گرنگتر بگرینەبەر بۆ ئاوەدانی لە خانەقی.
هاتنەكەی پارێزگار دڵخۆشكەرە
ئەندازیار جواد فەیزوڵڵا قایمقامی خانەقی سەردانەكە بە دڵخۆشكەر وەسف دەكات و لەوبارەیەوە بە كوردستانی نوێی خانەقی وت: بەرنامەی سەردانەكەی چەند لایەنێكی گرتەوە، لەگەڵ ئیدارەی شارەكە و چین و توێژەكاندا كۆبووەوە و لەبارەی داواکارییەکانیانەوە گوێی لێگرتن و دیوێكی تری كردنەوەی چەند پرۆژەیەك بوو كە پێشتر لە جێبەجێكردندا بوون.
وتیشی: دواتر سەردانی مەرزی مونزرییە و بازگەی باوەمەحمودیشی كرد بۆئەوەی كێشەكان چارەسەر بكرێن.
وەک پرۆژەی ئاوی خواردنەوە بۆ چەند گەڕەكێك، كردنەوەی دوو بەشی گرنگ لە نەخۆشخانەی گشتیی خانەقی، دواتر بەپێی ئەو پلانەی دامانناوە، ژمارەیەك پرۆژەمان خستە بەردەمی كە بۆ شارەكە گرنگە و بەڵێنیدا تاوتوێیان بكات.
پارێزگار بەدەستی خاڵییەوە هاتبوو
ئەندامێكی پێشووی ئەنجومەنی پارێزگای دیالە، كە هاوكات كارگێڕی مەڵبەندی خانەقییە، گلەیی لە پارێزگاری دیالە هەبوو لەو رووەشەوە دەڵێت: بەدەستی خاڵی هاتبوو، هیچ پرۆژەیەكی نوێی پێ نەبوو، ئەمە لەكاتێكدایە لە زنجیرە سەردانەكانیدا كە گشت پارێزگای دیالەی گرتووەتەوە، پرۆژەی گەورە و گرنگی هەبووە، بەڵام بۆ خانەقی وانەبوو.
وتیشی: لە هەشت سەرچاوەوە داهات دێتە ناو پارێزگاکەوە، خانەقی دوو مەرزی بەسەردا دەڕوات، جگە لە ناوچەكە كە ستراتیژییە، چۆن دەكرێت پرۆژەیەكی گرنگ و چارەنووسسازی بۆ خەڵكەكە پێ نەبێت، تەواوی ئەو پرۆژانەی كردنییەوە هی پێشووتر بوون و جێبەجێكرابوون.
باسی لەوەشكرد: شاری خانەقی شایەنی ئەوە نییە بەهەر هۆكارێك بێت پشتگوێ بخرێت، نە ململانێی ئیداری، نە سیاسی، چونكە ئەو ژیانی پێكەوەیی و پێکەوەژیانەی خانەقی لەهیچ شوێنێكی عیراقدا نییە.
