لە ماوەی سەردەمی حكومڕانی رژێمی بەعسی رووخاودا، گەلێك نەهامەتی و دەردەسەری و زوڵم و ستەمی سیاسەتی بەعەرەبکردن و راگواستن و تەسفیر بەسەر خەڵكی عیراق بەگشتی و كۆمەڵانی خەڵكی كوردستان بەتایبەتی و ناوچەكانی خانەقی و دەوروبەریدا بەتایبەتی تر سەپێنرا ، هەر بۆیە شار و شارۆچكەكانی خانەقی و دەڤەری گەرمەسێر لە هەموو رووییەكەوە پەراوێزخران، كە جگە لە وێرانكاری و رووخاندن نەبێت ھیچ پرۆژەیەكی خزمەتگوزاریی و ئاوەدانكردنەوە و نۆژەنكردنەوەیەك دەرفەتی پێ نەدراوە لە شاری خانەقی جێبەجێ بكرێت.
مێژووی دوور و نزیك شایەتی ئەوەن كە خانەقی یەكێكە لە شارە دێرینەكان، شاری پێكەوەژیان و برایەتی و تەبایی و خاوەن مێژووییەكی گەش و پرشنگدارە لە هەموو بوارەكانی ژیانی (سیاسی، ستراتیژی، كشتوكاڵی، ئابووری، بازرگانی، كۆمەڵایەتی و پێگەی جوگرافی و رۆشنبیری، ئەكادیمی و فەرهەنگی، ھونەری، وەرزشی و... ھتد).
هەروەها لەدوای رووخانی رژێمی بەعسەوە بەهەمان شێوەی سەردەمی پێشوو وەک پێویست ئاوڕ لە خانەقی و شارۆچکە و دێهاتەكانی دەورەبەری نەدراوەتەوە، تەنها ئەوە نەبێت كە بە هەوڵی یەكێتیی نیشتمانیی كوردستان و حكومەتی هەرێمی كوردستان و هەوڵە كەسییەكان هەندێك كارو پرۆژەی خزمەتگوزاری بۆ شارەکە و دەوروبەری ئەنجامدراون، كە ئەمەش ناكاتە ئەوەی شارەكە بەباشی ئاوەدان كرابێتەوە و تەواوی كەموكوڕییەكانی چارەسەركرابێت.
بەڵام دەتوانین بڵێین ئێستا پێویستە لەلایەن پەرلەمانی عیراق و حكومەتی فیدراڵ و دەسەڵاتی خۆجێی پارێزگای دیالە و حكومەتی هەرێمی كوردستانیشەوە كار لەسەر ئەوە بكرێت كە شاری خانەقیی مێژوویی بكرێت بە پارێزگایەكی خنجیلانەی شایستە و گرنگ بۆ عیراق و كوردستان، هەروەها ئەوكات بە گرنگییەوە ئاوڕێكی بەپەرۆشانە لەم شارە مێژووییە بدرێتەوە و كار و پرۆژەی خزمەتگوزاریی پڕ بایەخی بۆ جێبەجێ بكرێت. بۆیە ئەنجامدانی ئەو دەستكەوتە لەڕووی ستراتیژی و سیاسی و ئابووریی و نەوت و كانزاكان و زانستی و بازرگانی و كۆمەڵایەتی و كشتوكاڵییەوە بایەخی تایبەتی خۆی دەبێت بۆ عیراق و كوردستانیش، هەروەها كردنەوەی زانكۆی خانەقی دەبێتە دەستكەوت و شاكارێكی دیكەی گرنگ بۆ خەڵكی ناوچەی خانەقی و دەوروبەری، چونكە لەڕووی زانستی و ئەكادیمی و مرۆییەوە ئەم شارە گەلێك دەوڵەمەندە، دواجار خەڵكی خانەقی و تەواوی ناوچە كێشە لەسەرەكانی گەرمەسێر بە هەموو پێكهاتەكانییانەوە بەرەو ئایندەیەكی گەش دەڕوانن.
