هەر ژنەك دشێت ببیتە خودان كارێ خوە یێ تایبەت

دیدار: هونەر

ئێك ژ ژنێن شیایی تورێن كومەلایەتی بێخیتە دخزمەتا پیشەییا خوەدا، بۆ كوردستانێ نوێی بادینان گوت: «چ كارەك یێ ب زەحمەت نینە، ئەگەر مرۆڤی ئیرادە هەبیت و مرۆڤی بڤێت خوە پێش بخێیت و ئەڤا ئەز دبێژم بۆ هەمی ژنانە، ئەڤێن حەز دكەن ببنە خودان پرۆژەیێن خوە یێن تایبەت». ناڤێ وێ (تازی گولی) یە و كارێ دروستكرنا كەرەستێن جوانكاریێ یە و ئونلاین دفرۆشیت. تازیێ زێدەتر گوت: «داخوازی ل سەر ڤان كەرەستان هەیە و نە بتنێ بۆ ژنان، بەلكو مە كەرەستێن جوانكاریێ یێن زەلامان ژی یێن هەین و فرۆشتنا مە ژی برێكا ئونلاینە، كو مە پەیچێ خوە یێ تایبەت هەیە و برێكا تورێن كومەلایەتی گەلەك باشترە بەراورد دگەل دكانێ، دەما من دكان بۆ كارێ خوە كرێ كری، بۆ ماوێ چار هەیڤان ئەز تێڤەمام، لێ وەك پێدڤی شۆل نەبوو و من دەرێ دكانێ گرت و من پەیچەك ل سەر تورێن كومەلایەتی ڤەكر و هەر كەسەك برێكا ئونلاین دشێت، داخوازا وان تشتان بكەن یێن وان پێدڤیاتی پێهەی و دشێن زێدەتر پرسیارێ ل سەر بكارئینانێ یان ئەو تشتێ بەردەست بكەن و ژبەركو كەرەستێن مە هەمی خومالینە، داخوازی ژی زێدەتر یا ل سەر هەی».  دەما مە ژێ پرسیاركری، چاوان شییا فێری دروستكرنا كەرەستێن جوانكاریێ ببیت؟ گوت: «بۆ ماوێ سالەكێ ئەز بەشداری خولەكا نێڤدەولەتی بووم و دبوارێ ڤی كاریدا من چار باوەرنامە بدەستڤەئیناینە و ئەڤ كەرەستێن ئەز چێدكەم، ئەز ل مالێ دروست دكەم و بۆ خوە ژی بكاردئینم و د فرۆشم ژی و كارەكێ ژڤی رەنگی ژبەركو ب پیستی ڤەگرێداییە، بوویە كارەكێ هەستیارە و رەنگە هەمی ژن نەشێن پێ راببن ئەگەر چ خولێن فێركرنێ وەرنەگرن». دەما مە پرسیار ژێكری، شیرەتا تە بۆ وان كچ و ژنان چییە ئەڤێن بۆ خوە ل كارەكی دگەرن و دەرفەتا چوونا ژدەرڤە نەبیت؟ تازیێ گوت: «هەمی دشێن كاری بدەست خوڤە بینن ئەگەر حەزبكەن، بۆ نموونە دشێن كارگەهەكا بچیكا شیرینییا د مالێدا ڤەكەن، دشێن خارنان دروست بكەن و دشێن نانی پێژن و رێكێن بەرچاڤكرنێ ژی یێ ب ساناھی كەفتین، دشێن برێكێن ئونلاین و پەیچێن تورێن كومەلایەتی تشتێن خوە بەرچاڤ بكەن و بڤێ رێكێ دێ بنە خودان داهات و دێ شێن خێزانەكێ ژی برێڤەبەن ئەگەر حەزبكەن».