وادیارە دوای كەركوك، وێستگەی داهاتووی كۆنفرانسی ئامادەكاریی بۆ دووەمین دیداری یەكێتی كە نەریتێكی جوانی یەكێتیی نیشتمانیی كوردستانە وەك حزبێكی سیاسی هەڵقوڵاوی نێو جەماوەرەكەی، رانیە دەبێ، شەمەندۆفێرەكە لەپێناوی بەرجەستەكردنی سەرنج و پێشنیاری كادرانیدا، بە ئاراستەی گۆڕانكاری و نوێبوونەوە هێندە نابا لە دەڤەری راپەڕینیشەوە دوایین ئەركەكانی خۆی بۆ دیداری گشتی كۆدەكاتەوە.
بیرمە یەکەم سەرنج کە لە فۆڕمی وتارێکدا هەڤاڵ قوباد تاڵەبانی خستیەڕوو، ئاماژەدان بوو بەوەی کە «دیداری یەکێتی» وەک دەوای بەهێزکردنەوەی پێگەی شایانی یەکێتی و دەستپێکی هەنگاوەکانی نوێبوونەوە و چاکسازیی، بۆ دانانی نەخشە و پلانی ستراتیژیی ئەم وێستەگەیەی خەبات لە سەرجەم ئاستەکاندا سوودی لێ وەردەگیرێت، تا یەکێتی بتوانێت لەگەڵ رەوتی پێشكەوتن و پێشهات و گۆڕانكارییەكانی هەرێم و ناوچەكەدا خۆی بگونجێنێت.
ئێمە لە ناوچە و شارەکاندا تراموای کۆنفرانسەکانی دیدارمان هەر لە موسڵەوە وەک یەکەم وێستگە تا سلێمانی بینی، لە هەرکامێکیان قسەوباس و رامانی بەشدارانی، ئەدگاری جوان و بە قەدری نەخشاند.
«ئیدارەی راپەڕین» کە نزیکەی نیو ملیۆن کەسی تێدا نیشتەجێیە، بۆ یەکێتی و سەرکردایەتییەکەی، گرنگی و بایەخی خۆی هەیە، لەپاڵ شانازییەکانی شۆڕشی راپەڕینی پیرۆز، یەکێتی هەرگیز نادیدەی ناگرێ کە لە سەرجەم کێبڕکێ دیموکراسییەکاندا، هەمیشە ئەم سنوورە پێشەنگایەتی بۆ پاوان و مسۆگەر کردووە.
پێشنیازەکە ئەوەیە؛ با جیا لە وێستگەکانی دیکەی، وێڕای دەستەبژێران و رێکخەرانی دووەمین دیدار، «سەرپەرشتیاری گشتی دیدار» و «لێپرسراوی سكرتارییەتی سەرۆک مام جەلال» خۆشی حزوری لە گفتوگۆکاندا هەبێت، جگە لە تۆمارکردنی راسپاردەی ئه‌مه‌ك و دڵسۆزیی و په‌رۆشیی كادرە هزر کراوەکانی یەکێتی، دەروازەی لیژنەکانی کۆنفرانسی راپەڕین بەدەنگی دلێری لایەنگرانی یەکێتی لە دەرەوەی ئۆرگانەکانەوە، كه خه‌مێكی قووڵی نوێگه‌ریی و ئاراسته‌ی دنیابینی لە سنگیاندا په‌نگ ده‌خوا و دەکرێ واڵا بکرێت بۆ ئه‌جێندای دیدار و لەم سنوورە سوودی لێ ببینرێت.
لەگەڵ ئەوەشدا جگە لە کار و ئەندێشەی حزبی، «کۆنفرانسی دووەمین دیدار»، لەم سنوورە پێویستە هه‌ڵوەسته‌ی زیاتر لەسەر بەهێزکردن و پێشخستن و پێشکەشکردنی «خزمەتگوزاریی» بکات کە یەکێکە لە ئامانجەکانی دیدار خۆی و یەکانگیریشە لەگەڵ رەخنە و سکاڵا و خواستی چەندین ساڵەی جەماوەری دەڤەرەکە، قسەی جدیی و پێشنیازی بەجێش له‌بارەی باشترکردنی ئەدای حوکمڕانی و گۆڕانکاریی لە هەندێک دامەزراوەدا کۆبکاتەوە کە نزیک بە دوو دەیەی دەورانی دوای راپەڕینە لەشوێنی خۆیدا بەتەواوی وەستاوە.!
ئەم پێشنیازانە هەم لە روانگەی هاوڕایی و لێكتێگه‌یشتن بۆ راسپارده‌کانی دوای کۆنفرانس بە ئامانجی پڕاکتیزەکردنی بنەمای «پاداشت و سزا» لەدوای دیداری گشتییەوە بۆ تەواوی جومگەکانی حکومڕانی سوودی دەبێ، هەمیش بەرچاو روونیمان دەداتێ لە دیاریکردنی ئه‌رك و به‌رپرسیارێتیی کەسانی شایستە بۆ رووبەڕووبوونەوە و چارەسەرکردنی ئاستەنگە کارگێڕییەکان و كۆی پڕۆژه چەقبەستووەکان لە جوگرافیایەکی تایبەتی وەک دەڤەری راپەڕیندا.
