راپۆرت: ناوەڕۆک دانیشتنی یەکەمی دووەمین دیداری یەکێتی

دووەمین دیداری گشتی یەکێتییی نیشتمانیی کوردستان، بە ئامادەبوونی سەرۆک بافڵ جەلال تاڵەبانی، سەرۆکی یەکێتی و بەسەرپەرشتی قوباد تاڵەبانی، سەرپەرشتیاری دیداری یەکێتی لە هۆڵی یانەی پێشمەرگە لە سلێمانی دەستیپێکرد.

زیاتر لە 12 هەزار و 500 ئەندام و لایەنگر
سەرەتا د.یوسف گۆران، سكرتێری لیژنه‌ی باڵای دووه‌مین دیداری یه‌كێتیی نیشتمانیی كوردستان لە وتەی دەستپێکی دیداردا رایگەیاند: پاش بەستنی 9 کۆنفرانس لە شارە جیاجیاکانی کوردستان و بەشداریکردنی زیاتر لە 12 هەزار و 500 ئەندام و لایەنگری یەکێتی ئەمڕۆ لە شاری شاران، لە سلێمانی گەیشتینە دیداری گشتی یەکێتی و دووەمین دیدار بەڕێوەدەبەین.
وتیشی، زۆر قسەو گفتوگۆ لەسەر دەرئەنجامی دیداری پێشوو خرایەڕوو، ئەمڕۆ هەندێک لە دەرئەنجامەکان باس دەکەین، لە دیداری یەکەم 468 پرۆژە و پێشنیار پاش رێکخستن و یەکخستنی، لامان گەڵاڵە بوو، لەنێوانیاندا زیاتر لە 60٪ی پێشنیارەکان جێبەجێکراوەو ئەوەی ماوەتەوە کاری لەسەر دەکرێت، هیوادارم دیداری دووەم پێشنیار و پرۆژەی زیاتری بۆ بەهێزتر کردن و رێکخستنەوەی یەکێتی هەبێت، لەم دیدارەدا زیاتر لە 547 پرۆژە و پێشنیار و راسپاردە کۆکراونەتەوەو هیوادارین لەم دوو رۆژەدا فراوانتر و دەوڵەمەندتر بکرێت.
دەشڵێت، بەناوی لیژنەی باڵای دیدارەوە دڵنیاتان دەکەینەوە کە بیرۆکە و پێشنیاری ئەمڕۆتان دوای پەسەندکردنیان لەلایەن سەرکردایەتی یەکێتییەوە دەکەینە بەردی بناغەی سیاسەتی گشتیمان لە چاکسازی و راستکردنەوەی رێڕەوی حوکمڕانی لە هەرێمەکەمان، دەشبێتە بەرنامەیەکی گشتی بۆ هەڵبژاردنی ئایندە و بەهێزکردنی رەوتی کوردستانیبون و پەیوەندی لەگەڵ کوردستانیانی سەرجەم ناوچەکە و جیهان.

پرسە گرنگ و هەنوکەییەکانی ناو یەکێتی
دواتر قوباد تاڵەبانی سەرپەرشتیاری دیداری یەکێتی رایگەیاند: "لە دیداری پێشوو پێموتن کە یەکێتی حزبێکە بە ئاسانی لاواز ناکرێت، کاتی بەستنی دیداری یەکەم کاتێکی زۆر هەستیار بوو بۆ یەکێتی، رووبەرووی چەندین تەحەدی ناوخۆیی و دەرەکی ببوینەوە، کەس پێی وانەبوو بتوانین لەو کاتەدا و بەهەبوونی ئەو هەموو کادرە و 13 لیژنە دیدار بەڕێوەببەین و تاوتوێی هەموو پرسە گرنگ و هەنوکەییەکانی ناو یەکێتی و هەرێمی کوردستان بکەین، بەڵام کردمان و کردتان، لەو دیدارە راسپاردەکان پێشکەشکران و لەنێوان دیداری یەکەم و دووەم کۆنگرەیەکی سەرکەوتومان بەست و تێیدا کاک بافڵ وەک سەرۆکی یەکێتی هەڵبژێردرا و بەڵێنیدا یەکێتی یەک بخاتەوەو کێشەکانی یەکێتی چاک بکات و هەموو هەوڵی بخاتەگەڕ بۆ سەرخستنی یەکێتی و جێبەجێشیکرد، لێرەوە دەبێت سوپاسی بکەین بۆ هەموو هەوڵەکانی بۆ بەرزکردنەوەی ئاست و پێگەی یەکێتی، لەدوای ئەو دیداری یەکەمیش دوو هەڵبژاردنی سەرکەوتومان ئەنجامدا و دەنگ و کورسیمان زیادی کرد و پێگەی یەکێتیمان گەڕاندەوە، کەچەنەدین بەڵێن درا و هەندێکیان جێبەجێکراون و لەپەرلەمانی کوردستان هیچ حزێک ناتوانێ 50+1 پێکبهێنێت و هاوسەنگی هێزمان رێکخستەوە، ئێستا لەسەروبەندی پێکهێنانی حکومەتین و ئەو هێزە وای لەیەکێتی کردووە بەهێزی خۆیەوە بەشداری هەموو دانوستانەکان بێت و ببێتە هیوا بۆ جێبەجێکردنی خواست و داواکارییەکانی خەڵکی هەرێمی کوردستان".
وتیشی، ئەم دیدارە لە کاتێکی زۆر گونجاودا دەبەسترێت، داواتان لێدەکەین سەرەڕای پێکهێنانی لیژنەکان و ئامادەکردنی رەشنووسەکان، لەم دوو رۆژەدا ئەبێت هەموو ئەو بابەتانە جێبەجێ بکەین تاکو یەکێتی ببێتە خاوەن روئیایەک سیاسەت و هەیکەلیەت و نوێنەرایەتی خۆی و پەیمانی خۆی بۆ کۆمەڵانی خەڵکی کوردستان نوێ بکاتەوە، لە چوارچێوەی دەرئەنجامی دیداری یەکێتی سیاسەتێکی هەبێت کە بتوانێت بیچەسپێنێت لەناو حکومەتی داهاتوو، بەو سیاسەتەوە بچێتەوە ناو جەماوەری خۆی لەبەردەم هەڵبژاردنی داهاتوودا.

لەم دوو رۆژەدا دەرفەت وەربگرن
دەشڵێت: یەکێتی حزبێکی زیندووە و سەلماندویەتی، کۆبوونەوەی ئێوەش لێرە دووبارە ئەیسەلمێنێتەوە، بەشێکی زۆرتان چەندین ساڵ ئەتانناڵاند بەدەست ململانێکانی سەرەوە، هەمووتان ئەتانوت ئێوە لەسەرەوە چاک بن ئێمە لە خوارەوە کێشەمان نییە، ئێمەش بەقسەمان کردن و ئێستا لەسەرەوە چاکین، بەڵام لە خوارەوە کێشە هەیە، بۆیە لێرەدا رەخنە دەگرین و پەنجە دەخەینە سەر کێشەکان، پێشنیار پێشکەش دەکەین تا ببێتە راسپاردە و بتوانین جێبەجێی بکەین، هیوادارم لەم دوو رۆژەدا دەرفەت وەربگرن و بەشداری هەموو پانیڵەکان بکەن، رای خۆتان بڵێن چونکە گرنگە بۆ داڕشتنی سیاسەتی یەکێتیی نیشتمانیی کوردستان، تاکو ئەو سەرکردایەتییە بەهێزەی ئەمڕۆ بەهێز و کاریزمای کاک بافڵەوە جێبەجێی بکات.
لە بەشێکی تری دیدارەکە لەرێگای ڤیدیۆیەکەوە پەیامی عومەر شێخ موس، دەستەی دامەزرێنەری یەکێتیی نیشتمانیی کوردستان پێشکەشکرا و رایگەیاند: بەگەرمی پیرۆزبایی بەستنی ئەم دیدارەتان لێ دەکەم، هیوای سەرکەوتنی گەورەتان بۆ دەخوازم، ئومێدەوارم لەسەر رێباز و پرەنسپە سەرەتاییەکانی یەکێتی بەردەوام بن بۆ خزمەتی گەل و نیشتمان، ئاڵای یەکێتی هەموو کات بەرز و شەکاوە بێت، سەرکەوتوو سەرفراز بن.
دواتر د. لەتیف رەشید، سەرۆک کۆماری عیراق رایگەیاند: "یەکێتی حزبێکی گەورە و گرنگی کوردستانی عیراقەو مێژویەکی پڕ سەروەری هەیە، تکا ئەکەم ئەو مێژووەی بپارێزرێت و رێگا بەکەس نەدرێت ئەو مێژووە تێکبدات، یەکێتی لە سەرەتای دروستبوونییەوە باوەڕی بە دیموکراسی و مافی چارەی خۆنووسین و مافی مرۆڤ هەبووە، رۆڵێکی سەرەکی و کاریگەری لە پاراستنی مافی کورد و پێشکەوتنی بوارەکانی سیاسی و رۆشنبیری و کۆمەڵایەتی و بەرەنگاربونەوەی دیکتاتۆریەت هەبووەو هەزاران رۆڵەی تێکۆشەری شەهید بووە.

سیاسەتی چەپکە گوڵەکە
وتیشی، هەزاران سڵاو بۆ رۆحی سەرکردەی مەزن سەرۆک مام جەلال و سەرجەم شەهیدانی یەکێتی، هیوادارم هەموو کاتێک لە ئامۆژگارییەکانی سەرۆک مام جەلال سود وەربگرین کە یاد و یادگاری بەچەند کتێبێکیش باس ناکرێت، مام جەلال نەک هەر بۆ گەلی کوردستان بەڵکوو بۆ ئازادی هەموو خەڵکی عیراق لەدەست رژێمی دیکتاتۆری بەعس خەباتی دەکرد، سەرکردەیەکی ئازا و رۆشنبیر و لێهاتوو ئازادیخواز بوو، باوەڕی بە کوردستانیەتێکی یەکگرتوو هەبوو، لەسەرمانە هەموو لایەک بەڕێزەوە باسی تێکۆشانی ئەو سەرکردەیە بکەین و ئامۆژگارییەکانی پەیڕەو بکەین، داواتان لێدەکەم کەلەسەر رێبازی سەرۆک مام جەلال بڕۆین و سیاسەتی چەپکە گوڵەکە لەناو یەکێتی و لەگەڵ دۆستەکانمان جێبەجێ بکەین و یەکێتی بپارێزین و هەوڵی بەرەو پێشبردنی بدەین و یەکێتی بە گەورەیی بهێڵینەوە، چونکە بۆ پاراستنی هاوسەنگی دیموکراسی لەهەرێم و عیراق زۆر گرنگە.
دواتر، شێخ جەعفەر شێخ مستەفا، لێپرسراوى ئەنجومەنى پارستنى بەرژەوەندیە باڵاکانى یەکێتیى نیشتمانیى کوردستان رایگەیاند: "دیدارى دووەمى یەکێتیى نیشتمانیى کوردستان، ئەمڕۆ ئێمە نەک تەنها بۆ بۆچوون و رێکخستن لێرەین، بەڵکو بۆ نوێبوونەوە کۆدەبینەوە و چەند گونجاوە کە ئێمە لە بەهاردا ئەم کارە بکەین، وەرزێکە کە هەڵگرى رووحى گەنجبونەوە و هیوا و لە دایکبون و نوێبوونەوەیە، وەک چۆن ئێستا شاخ و دۆڵەکانى کوردستان دواى زستانێکى دور و درێژ زیندوو دەبنەوە، یەکێتییەکەشمان دەچێتە قۆناغێکى نوێى گەشەکردن و یەکڕیزى و یەک ئامانجەوە، خوشک و برایان یەکێتیى نیشتمانیى کوردستان لە ئاسودەیى لەدایک نەبووە، لەخۆڕاگریدا لەدایکبووە، لە هۆڵەکانى ئیمتیازاتدا دروست نەبووە، بەڵکو لە دۆڵى شۆڕش و دڵى خەونبینیندا دروست بووە، یەکێتیى ساڵى 1975 دامەزرێنراوە.

بەرەنگاربوونەوەى ستەمکارى
وتیشی، دەنگى گۆڕانکارى و هێماى کوردستانێکى پێشکەوتنخواز و ماڵى ئەو کەسانە بووە کە بوێرى خەیاڵى میللەتێکى ئازاد و دیموکراتیان ویستووە، لە رۆژانى سەرەتاى شاخەوە، بەرەنگاربوونەوەى ستەمکارى بۆ دامەزراندنى سەربەخۆیى گەلەکەمان هەنگاویناوە، لە دواى راپەڕینى ساڵى 91 لە دروستکردنى ئیدارەیەکى کوردستانییەوە تا بەشداریکردنمان لە داڕشتنى دەستورى عیراقدا یەکێتى دەست بە دەست لەگەڵ خەڵکدا رۆیشتووە، گونجان و پەرەسەندن وە هەمیشە بەرگرى لە بنەماکانى دادپەروەرى یەکسانى و کەرامەتى میللەتەکەمان کردووە.
راشیگەیاند: بە زریانى سەختدا تێپەڕین کاتەکانى ململانێى ناوخۆیى هەڕەشەى دەرەکى و تەحەداى سیاسى بەڵام هەموو جارێک بە خۆڕاگرى هەستاوینەتەوە، بۆچى؟ چونکە ئێمە لە حزبێک زیاترین ئێمە دیدگایەکین بۆ شەهیدان و بەڵێنێکین بۆ گەلەکەمان و نەوەکانى داهاتوو، ئەم مەکۆیە تەنها کۆبوونەوەیەک نییە، بەڵکو بانگەوازێکە بۆ کردنەوەى بۆ ئەو بەڵێنانەى کە بە خەڵکمانداوە، ئەمڕۆ لە خاڵى وەچەرخاندندا وەستاوین، کوردستان و ناوچەکە رووبەڕوى تەحەداى ئاڵۆزى دەبنەوە، لە ڕووى سیاسى ئابورى کۆمەڵایەتى، گەلەکەمان چاوەڕوانى وەڵام دەکات، بۆ سەقامگیرى بۆ هەڵوێستى بۆ ئەو بەرپرسیارێـتیەى ئێمە وەک یەکێتیى گوێبگرین و سەرکردایەتى بکەین، پابەندبونمان بە بەڵێنەکانمانەوە بین، پێویستە دەرگاى دەرفەتەکان بکەینەوە، چاکسازى لە دام و دەزگاکاندا بکەین، ئیلهام بەخش بین بۆ داهێنان لە ناو حزبدا، با یەکێتیى ببێت بە ماڵى ووزە و بیرۆکەى بوێر و هێزى بەکۆمەڵ، بەمشێوەییە رێز لە رابردوومان دەگرین، بەمشێوەییە داهاتوومان مسۆگەر دەکەین، با پێکەوە بەرەو پێشەوە بچین، سەرمان بەرزبێت، دڵمان یەکگرتوو چاومان لە ئاسودەیدایە، بژى یەکێتیى، بژی رووحى ئازادى، بژى خەڵکى کوردستان، سوپاس بۆ ئێوەش.