ناوەندی توێژینەوەی یاسایی لە وەزارەتی داد، پێشانگەیەک بۆ تەواوی ئەو كتێب و گۆڤار و بڵاوكراوانە دەکاتەوە، کە بە هەرسێ زمانی كوردی، عەرەبی و ئینگلیزی، لەلایەن ناوەندەکەوە چاپ و بڵاوكراونەتەوە.
شیلان عارف بریکاری وەزارەتی داد بە کوردستانی نوێ-ی راگەیاند: پێشانگەی داد بۆ كتێب، لە ماوەیەكی نزیكدا دەكرێتەوە و لە داهاتووشدا زیاتر فراوانی دەكەین و كتێبی زیاتری تێدا نمایش دەكەین، چ ئەوانەی ناوخۆی هەرێمی كوردستان و چ ئەوانەی دەرەوەی هەرێم.
وتیشی: ئامانج لەو پێشانەگەیە بۆ بڵاوكردنەوەی هۆشیاریی یاساییە، بۆ دەستڕاگەیشتنی یاساناسان و خوێندکارانە بە سەرچاوە گرنگ و جیهانییەكانی بواری یاسا.
راشیگەیاند: پێشانگەكە دەكەینە سەكۆیەك بۆ بڵاوكردنەوەی رۆشنبیری و هۆشیاریی یاسایی و دەبێتە ماڵێك بۆ یاساناسان و ئەوانەی لە بواری یاسادا، كاردەكەن .
ئاشکراشیکرد: ناوەندی توێژینەوەی یاسایی لە وەزارەتی داد لەساڵی 2020ەوە دامەزراوە، تا ئێستا، 25 كتێبی بواری یاسای چاپ و بڵاوكردووەتەوە، 25 نامیلكەی تریشی بە چاپ گەیاندووە و 12 ژمارەی گۆڤاری ناوەندەكەی بەناوی (گرێبەستی كۆمەڵایەتی) بڵاوكردووەتەوە، هەر ئەو ناوەندە چوار ژمارەی گۆڤارەكەی تایبەتكردووە بە بڵاوكردنەوەی توێژینەوەكانی ناو ئەو كۆنفرانسانەی لە ماوەی چوار ساڵی رابردوودا، سازیكردبوون.
هەولێر، تەها عەبدوڵڵا
