کۆمێنت

ئیزابێل ئەلەندی

10:30 - 2022-08-25
شیرین. ک
195 خوێندراوەتەوە

(20)

لەمێژە عاشقی ئەدبیاتی ئەمریكای لاتینم، لەو كاتەوەی یەكەم رۆمانی ماركیزم خوێندەوە، (كەس نییە نامە بۆ كۆڵۆنێڵ بنێرێت) ئەوەش یەكەم رۆمانی ماركیزە كە وەرگێڕی فەلەستینی «ساڵح عەلمانی» كردوویەتی بەعەرەبی، لەوە بەدواوە هەموو گەنجینەی ئەدەبی لاتینی وەرگێڕاوە بۆ زمانی عەرەبی، بەجوانترین شێوە، تەنانەت نووسەرە لاتینییەكان ستایشیان كردووە، بۆ نموونە ماریۆ بارگاس یۆسا دەڵێت: (بەهۆی ساڵح عەلمانییەوە ئێمەی نووسەرانی ئەمریكای لاتین لەلای خوێنەری عەرەب و خۆرهەڵات ناسراوین)، لەساڵانی نەوەدەكانەوە بەهۆی تەرجەمەكانی عەلمانییەوە توانیم جوانترین رۆمانەكانی (ماركیز، یوسا، ئێزابێل ئەلەندی) بخوێنمەوە جگەلە دەیان رۆمانی تری نووسەرە لاتینی و ئیسپانییە ناودارەكانی وەكو: ساراماگۆ، پاپلۆ نیرۆدا، ئەستۆریاس، خوان رۆڵفو..هتد.
ماڵی تارماییەكان، یەكەم رۆمانی ئەلەندی بوو خوێندمەوە، ئەوكاتە لەناو خوێنەری كوردا ناسراو نەبوو، ئینتەرنێتیش دەگمەن بوو، ئیتر لەهەر گۆڤار و بڵاوكراوەیەكی عەرەبیدا دیدار یان هەواڵێكیم ببینایە وەرمدەگێڕا بۆ كوردی و لەئەدەب و هونەر بڵاوم دەكردەوە، لێرەولەوێ سۆراغی كتێبەكانیم دەكرد هەتا دوایین كتێبی كە رۆمانێكە بەناوی (لە پشت زستانەوە) ساڵح عەلمانی وەریگێڕاوە، چاپی 2018یە لەدەفتەری ساڵی 2019دا نووسیوومە: (لەدوو كتێبی تری دەچێت رۆمانی خۆشەویستی و سێبەرەكان، یاداشتنامەی دروێنەی رۆژگاران..) ئەمەش رۆمانێكی لاتینی ترە كە وێنای ئەو پشێویە سیاسیی و هەژاری و توندوتیژییە دەكات كە ئەو وڵاتانە بەدەستییەوە دەناڵێن، هەموو ئەمەش تێكەڵە بەخورافات و سیحر و جوانییەكی تایبەت بەخۆیان، حیكایەتی ژنانێكە  لەدۆزەخی وڵاتەكەیانەوە هەڵدێن بۆ بەهەشتی تاراوگە، حیكایەتی خۆشەویستییە تا ئەوپەڕی مەستبوون تا كۆتاییەكانی تەمەن، جگەلەوەی هێڵی سەرەكی رۆمانەكە حیكایەتێكی نیمچە پۆلیسییە، بەسەرهاتی  ئیڤیلینە كە نموونەی ژنێكی لاتینییە لەئەمریكای باكوور، كۆتاییەكی شاد و حیكایەتەكان هەموویان بەردەوام دەبن، چونكە لەڕابردوویەكی دوورەوە دەستپێدەكات بۆ ئێستا، هەست بەكاڵبوونەوەی شێوازە لاتینییە تایبەتەكەی نووسەر دەكەم.. ).

وتارەکانی نوسەر