غازی فەیسەڵ
سەرەتا سوپاسی دژە تیرۆری عیراق و هاوپەیمانان و یەکەی 70 ی یەکێتیی نیشتمانیی کوردستان دەکەین کە بەوپەڕی تواناوە پشتیوانمانن لە شەڕی دژ بە تیرۆریستانی داعش لە قەرەچوغ.
هەموولایەکتان شەش ساڵە هات و هاوار و داواکارییە چەند بارەییەکانی ئێمەتان لا روونە لەسەر داعشەکانی چیای قەرەچوغ کە 6 ساڵە داڵدەدراون و نە پەرلەمانی کوردستان و نە کابینەی 8 و 9 یش جورئەتیان نەکرد داعشەکان دەربکەن !
سنوورەکەمان بە خوێن و بە دەنگ و بە ماڵوێرانی دروستکەری ئەم دوو کابینەیە و باقی کابینەکانی تری هەرێمی کوردستان بوون و لە هەموو شۆڕشەکاندا باجی گەورە و قورسمان داوە، بەڵام بە هیچ شێوەیەک حکومەت دیفاعیان لێنەکردین و 6 ساڵ چاوەڕوانی مەرگی ئێمەیان دەکرد وەک گوندەکانی بناری قەرەچوغ مەرگ دارمان کەن، سەدان جووتیارمان ئاوارە و بێ ماڵ و بێ ژیان و گوزەران کراون.
ئەوانیش کۆمپانیاکانیان و بیری نەوت و کارگەی چیمەنتۆکەیان کار بکات چ باکیان بە تیرۆرکردنی جووتیاران و چۆڵکردنی گوندەکانە؟
پشوودرێژیی و خۆڕاگری بەشێک لە جووتیاران و دانیشتوانی ناوچەکەمان کۆتاییهات و چیتر قسە و بەڵێنەکانی کابینەی 9 لە سنوورەکەمان پشتی پێنابەسترێت.
هەموولایەکتان تێگەیشتن بۆچی شاخی قەرەچوغ 6 ساڵە بۆتە ئارامگا و مەنزڵگای داعش.
قسە زۆرن و بەشێکی ئێوە بیکەن، بەڵام بەڵێن بە خوێنی شەهیدان و خەڵکی نیشتمانپەروەر دەدەین چیتر بە بەڵێن و کات کوشتنی کابینەی نۆ نە باوەڕ دەکەین نە گوێشیان بۆشل دەکەین.
6 ساڵ ترس و تۆقاندنی جووتیاران و دانیشتوانی ناوچەکەمان و گوندە وێران و چۆڵەکانمان، ئاخر 6 ساڵە تەنها دوێنێ کارگەی چیمەنتۆکەتان راگیرا کەچی هاوارتان لێهەڵسا، بۆیە ئێمە تەواو بێ ئومێد بووین لە کابینەی نۆ 9 ی تاکڕەوی حکومەتی هەرێم.
لێرە بەدواوە با داعشە روو رەشەکانیش بزانن، چیتر دیفاعی شەڕ ناکەین و هێرشەکان بەردەوام دەبن تا یەک داعش لە قەرەچوغ مابێت و بەڵێنمان لە هاوپەیمانان و هێزە عیراقییەکان و یەکەی 70 و وەرگرتووە بەردەوام بین لە هێرشەکانمان بۆ شاخی قەرەچوغ.
دووبارە سوپاسی هەموو ئەو هێز و لایەن و رۆژنامە و کەسانە دەکەین کە ئەگەر بە وشەیەکیش پشتیوانی ئێمەیان کردووە دژی ئەو ناهەقیانەی بەرامبەر ناوچەکەمان دەکرێت .