ئەو ناونیشانەى سەرەوە، مەبەستمان شیکردنەوەى خانووى قوڕ نییە، مەبەستم چەمکێکى سیاسییە کە پەیوەندیى بە ژیانى بەشێکى زۆرى ئەم گەلەوە هەیە، واتە ئەو کەسانەى لە ژیاندا رەنجێکى زۆر دەدەن، بەڵام هێشتا باش ناژین، کە بە هێز و بازووى خۆیان ژیان دەستەبەر دەکەن.
ئەمانە لە ئێستا و داهاتووشدا هێزێکى کاریگەرى گەورەى ناو کۆمەڵگەن، بوون و دەبن، ئەم هێزە لە یەکبووندا لە توانایاندایە گەورەترین گۆڕانکارى لەناو کۆمەڵگەدا دروستبکات، کاریگەریى بۆ سەر هەموو بزووتنەوەیەکى سیاسى و کۆمەڵایەتى ناو کۆمەڵگە هەیە.
لە مێژوودا کاریگەرترین کەرەستەى شۆڕش و خەبات و تێکۆشان و گۆڕانکارى بوون.
بۆیە دەبێت دیداری یەکێتی لە چاکسازییەکەی و بەرنامەکەیدا گرنگی و رۆڵی زیاتر بدات بەو چینە.
ئەوەى من لەو وتارە مەبەستمە ئەو چەمکەیە کە سەرۆک مام جەلال لە چەندین شوێن و کاتى جیاواز و هەم لە کۆنگرەکانیشدا جەختى لەوە کردۆتەوە کە دەبێت بگەڕێینەوە بۆ خانووە قوڕەکان، ئەویش ئەوەیە کە هێزێکى وەک یەکێتى پەیوەندیدار بەم چەمکەوە، دەبێت رابەرایەتى ئەم گوتارەى خۆی بکات لەناو تاکەکانى کۆمەڵگەدا، بۆئەوەى بتوانێت ئەو بنەما ئەخلاقییە بچەسپێنێت، کە یەکێتى خۆى پێوە پەیوەست کردووە.
هەر بۆ ئەم مەبەستەش سەرۆک مام جەلال لە چەندین بۆنەدا ئەم وشەیەى وەک چەمکێکى سیاسى و ئابوورى و کۆمەڵایەتى بۆ سەرکردە و کادر و ئەندام و پێشمەرگە و لایەنگرانى باسکردووە تا لە سێیەمین کۆنگرەدا بۆتە بەرنامەى کارى حزب.
دیارە کەسێکى وەک مام جەلال گرنگى ئەو باتە دەزانێت چەندە، لە هەلومەرجى سیاسى ئەوکات و بۆ ئێستاش بۆ هێزێکى وەک یەکێتى کە دەیەوێت لە خەبات و تێکۆشان بەردەوامبێت، پێیوایە بابەتێکى ئاوا چەند مرۆڤانەیە کۆمەڵگەیەکى ئاسوودە بەرهەم دەهێنێت، یەکێتی وەک هێزێکى سۆشیال دیموکرات لە پەیڕەو و پڕۆگرامى خۆیدا بۆ چارەسەرى کێشەکانى ئەم هێزە کۆمەڵایەتییە بۆتە بیرۆکەیەک بۆ چارەسەرکردنى کێشەکانى ناو کۆمەڵگە.
خانووە قوڕەکان بۆچى بۆ یەکێتى گرنگە؟
یەکێتیى نیشتمانیى کوردستان لە مێژووى دامەزراندنییەوە وەک هێزێکى شۆڕشگێڕ بە بیرى مارکسى – لینینى وەک فیکرێکى چەپى رادیکاڵ هاتۆتە مەیدان و خەباتى کردووە، زۆربەى زۆرى ئەو هێزە کۆمەڵایەتییەى کە داینەمۆى بەردەوامى شۆڕش بوون، خەڵکى جووتیار و کرێکار و زەحمەتکێش و دەستەبژێرێکی رۆشنبیر بوون، لەسەر دەستى ئەم هێزە یەکێتى بەردەوام بووە، شەهیدەکانى، کەم ئەندامەکانی و زەرەرمەنداکانى هەر لە تاکەکانى ئەم هێزە کۆمەڵایەتییە بوون.
بۆیە هەموو تێکۆشەرێک لەناو مێژووى ئەم حزبەدا چیرۆکى خۆى هەبووە.
لە بارودۆخى سیاسیى ئێستاى کوردستاندا، لە ئەنجامى ئەو گۆڕانکارییە خێراییانەى کە لە کوردستاندا بەدیهاتوون، لە ئەنجامى کاریگەرییەکانى بە جیهانیبوون و دەرکەوتنى رۆڵى هێزە گەورەکانى دنیا لە رووى ئابووریى و سیاسییەوە، جۆرێک لە بیرکردنەوەى هێناوەتە بەرهەم کە بۆتە هۆى دروسبوونى تێڕوانینێک بۆ شێوازى کارکردن.
ئامانجەکانى یەکێتی فەرامۆشکراوە و نەتوانراوە لەسەر دادپەروەرى و یەکسانیخوازى کە لە شوناسى یەکێتیدایە، کارى بۆ بکرێت، یان وەک خۆى ئەدا بکرێت، لە ئێستاى کوردستاندا بەشێکى زۆرى خەڵکى هەست بە نادادپەروەریى دەکەن، بۆیە دیدار دەبێت ئەو پەیوەندییەی خەڵک کە لاوازە بووە چارەسەری بکات، لە دیدى تاکەکانى کۆمەڵگەوە سیاسەتى حزبەکانى کوردستان پیشتیوانی کردنە لە گەشەکردنى سەرمایەداریى و بازرگانى و کۆمپانیا.
دەبێت دیداری یەکێتی کار لەسەر گێڕانەوەی یەکسانی و دادپەروەریی بکات و زیاتر و روونتر پابەندبێت بە پرەنسیپەکانى بنجینەى کارکردنى گوتارى خۆیەوە، کە گوتاری یەکگرتوو، کار لەسەر راسپاردەکانی دیدار بکات
*ئەندامى مەڵبەندى 24ى راپەرین
