دوای ساڵانێكی زۆر لە شەڕ و جەنگی ناوخۆ لە سوریا، ئابووریی ئەو وڵاتە بەرەو داڕمانێكی گەورە چووە، بە تایبەتی لەم ماوەیەی دواییدا، بەهۆی دابڕانی تەواوی نێوان ناوچەكانی ئیدارەی خۆسەری و ناوچەكانی ژێردەستی حكومەتی دیمەشق، كە پێشتر هەماهەنگییەكی ئابووریی باش لە نێوانیاندا هەبوو، بەڵام كەللەڕەقی دیمەشق وایكردووە، پشكی وڵاتەکە لە داهاتی ناوچەكانی ئیدارەی خۆسەریی كەم بكات، لەبەر دژەكرداری ئیدارەی خۆسەری بەرامبەر بە پیلان و خەونەكانی دیمەشق بۆ دووبارە كۆنترۆڵكردنەوەی ئەو ناوچانە.
راپۆرتە مەیدانییەكان ئاماژەیان بۆ ئەوە كردووە، خراپیی بژێویی و سیاسەتە خراپەكانی حكومەتی دیمەشق، تووڕەیی خەڵكی زیاتر كردووە، ئەمەش بە روونی لە چەند رۆژی رابردوودا دەركەوتووە، لەنێو هاووڵاتیانی سوریا بەگشتی، لەم رووەشەوە، رۆژنامەی ئەخباری لوبنانی، باسی لە خراپی بارودۆخی بژێوی و ئابووریی خەڵكەکە كردووە.
شارەزاییانی ئابووریش باسی ئەوە دەكەن کە رەنگە سوریا بكەوێتە نێو تەنگژەیەكی نوێی قورسەوە، بەتایبەتی كە نرخی لیرەی سوری ماوەی دوو مانگە بەردەوام دادەبەزێت، لەگەڵ ئەوەشدا حكومەتی سوریا رازی نییە دەست لە پڕۆژەی خۆی هەڵبگرێت بۆ بەرزكردنەوەی نرخی نەوت و بەنزین، بەرامبەر بە بەرزكردنەوەی مووچەی فەرمانبەرانی دەوڵەت و خانەنشینان بۆ 100 %.
ئەمەش مەترسیی رێوشوێنەكانی ئەم دواییەی حكومەت زیاتر دەكات و كاریگەریی سلبی و روونیشی بەسەر بارودۆخی ئابووریی و بژێوی خێزانەكانی سوریاوە دەردەخات، كە لەڕووی ئابووری، كۆمەڵایەتی و تەندروستییەوە ماندوون، لە كاتێكدا رژێمیش هیچ دەستپێشخەرییەكی نییە بۆ كەمكردنەوەی قورسایی بارودۆخی ئابووری لەسەر هاووڵاتیانی وڵاتەکە.
لەگەڵ ئەوەی سیاسەتی «نایەقینی» لەنێوان دیمەشق و ئیدارەی خۆسەریدا هەیە، جگەلەوەش ئایندەی نادیاری نێوانیان، بەڵام ئاساییكردنەوەی بارودۆخی ناوخۆیی زۆر لە قورسایی سەر دیمەشق لادەبات لەڕووی ئابوورییەوە، هەروەها هەوڵ و ماندووبوونێکی زۆریش لەڕووی سیاسییەوە بۆ ئیدارەی خۆسەری دەگێڕێتەوە، بۆ دانوستانێكی چاوەڕوانكراو، دوای ئەوەی زۆرێك لە دیدارەكانی نیوان هەردوولادا شكستی هێنا.
ئێستا گوشارێکی زۆری دەرەكی لەسەر دیمەشقە، لەپاڵ گوشارە ناوخۆییەكاندا، بەڵام ملدانی رژێم بۆ دەنگ و داوای گەلی سوریا زۆر باشترە لەوەی بەدەنگ لایەنە دەرەكییەكانەوە بچێت كە تەنها كار بۆ بەرژەوەندیی خۆیان دەكەن، لەكاتێكدا بەرژەوەندیی و ژیانی گەلانی سوریا لە مەترسیدایە، بەهۆی ئەو جەنگە بەردەوام و بارودۆخە ئابوورییە خراپەی هەیە، لەسایەی نەبوونی هیچ دەستپێشخەرییەكی ناوخۆیی و دەرەكی بۆ چارەسەركردنی قەیرانی سوریا.
دیمەشق دوو چارەسەری لەبەردەمدایە، یەكەمیان: رێكەوتنە لەگەڵ ئیدارەی خۆسەری لەڕووی سیاسی، سەربازی و ئابوورییەوە، ئەوەش ئابووریی وڵات باشتر دەكات، هەرچەندە سستیش بێت، دووەم: داننان بەوەی رژێمی سوریا ناتوانێت بە تەنیا بەرگەی قورسایی هەموو بەرەكان بگرێت، بۆیە دەبێت واز لە غروری سیاسیی و پەنابردنە بەر قەرزی دەرەكی بهێنێت بۆ كەمكردنەوەی قەیرانی ئابووری لە سوریا.
و: گۆران
