سۆزان حەمەتاتە
بەپێی پێشبینییەكانی كەشوهەوا بێت، زستانی ئەمساڵ باراناوی دەبێت، چونكە بەراورد بە ساڵی پار، تائێستا رێژەیەكی زۆر باران باریوە، لەگەڵ ئەوەشدا پێشبینییەكان بەهۆی گۆڕانكارییە ژینگەییەكانەوە هەندێكجار سەر و كورت دەكەن، بۆیە رەنگە ئەو بۆچوونەش ئاوەژوو ببێتەوە.
با گریمانەی ئەوە وەربگرین، پێشبینییەكەی بەڕێوەبەرایەتیی كەشناسیی هەرێمی كوردستان راست دەردەچێ، ساڵی باراناوی ساڵی خێر و خۆشییە ئەگەر ئامادەكاریی بۆ بكرێت و سوودی لێوەربگیرێت، ئەوەش دەوەستێتە سەر پلانی زانستیی حكومەت و دامودەزگا پەیوەندیدارەكانی، بەتایبەتت وەزارەتی كشتوكاڵ و بەڕێوەبەرایەتییە پەیوەندیدارەكان، لەگەڵ ئەوەش بكرێتە كاری پێشینە و بودجەی تایبەتی بۆ دابینبكرێت.
لە چەند ساڵی رابردوودا لە بەشێك لە ناوچە جیاوازەكانی كوردستان، باران بارینی زۆر، زیانی زۆری گیانی و مادی بەدوای خۆیدا هێنا، دوای ئەو چەند جارە زیان كەوتنەوەیەش كەچی سەرەتای زستانی ئەمساڵ، دیسانەوە باران بارین تەنگی بە چەند ناوچەیەك هەڵچنی و زیانی لەگەڵ خۆی هێنا.
ئاوی سەر زەوی و ژێر زەوی لە گرنگترین پێداویستییەكانی ژیانی خەڵك و وڵاتن، خێرا گەڕانێك بكە بە بەرنامە و ستراتیژی وڵاتاندا بۆ چۆنێتی مامەڵەكردن لەگەڵیدا، بۆت روون دەبێتەوە كە ئەوان چەند گرنگی پێدەدەن و سوودی كورت مەودا و درێژ مەودای لێوەردەگرن، هەروەها دەیكەنە هۆكاری وەبەرهێنانی زیاتر لە كەرتی كارەبا و كشتوكاڵدا.
تێبینی ئەوە دەكرێت هەرێمی كوردستان دروست مامەڵە لەگەڵ كەرتی ئاودا نەكات، هەروەها بەرنامەی وردی نییە بۆ گلدانەوەی باراناو و بەكارهێنانەوەی لە كەرتی كشتوكاڵ و ئاودێریدا، یان رێگریكردن لە زیانەكانی لە رووی مادی و گیانییەوە.
لەسەر دوو ئاست گرفتی گەورە هەیە:
یەكەم: لە دروستكردنی پڕۆژەكانی نیشتەجێبووندا، بەتایبەت نوێیەكان رەچاوی بەرنامەی وردی زانستی ناكرێت، بینیمان یەك بارانی بەهێزی ئەمساڵ چەند زیانی لە پڕۆژەكانی نیشتەجێبوون لە هەولێر و كەلار دا، هەروەها لە زۆر شوێنی دیكەیش. راستییەكەی نەبوونی پلانی زانستی و بوونی كەمتەرخەمییە.
دووەم: نەبوونی بەنداوی زۆر لە ناوچە جیاوازەكانی هەرێمی كوردستان دیسانەوە گرفت و كەمتەرخەمییە، با ساڵێكی باراناوی بێت، كە بەنداوی زۆر بۆ گلدانەوەی باراناو نەبوو، ئیتر چی سوودی دەبێت و چۆن دەتوانرێت لە داهاتوودا بەكاربهێنرێتەوە؟
پێویستە پلان هەبێت بۆ گلدانەوەی ئاوی باران