لە کاتێکدا سەدان ساڵ بەسەر دامەزراندنی بزووتنەوەی فمێنستی، لە کەلتوری رۆژئاوادا تێپەڕدەبێت، هێشتا نەیانتوانیوە بە ئیمتیاز و مافە بنەڕەتی و سەرەکییەکانی خۆیان بگەن، هێشتا وەک ئامرازی وەبەرهێنانی منداڵ، گەرمکردنەوەی حەز و نان، لە جوغزی بەرتەسکی ماڵ و کارگە بازرگانییەکاندان، یان لەبەرامبەردا وەک بووڵەکەی کۆمپانیا سێکسیەکان، هەوێنی بەرژەوەندی سیستمە پیاوسالاری و زلهێزەکان، مامەڵەیان پێوەدەکرێ.
گەر بپرسین ئایدۆلۆژیای گۆڕانکاری کۆمەڵایەتی، بە بەشداری راشکاوانەی ژن، لەژێر چەتری شۆڕشی تەکنۆلۆجیادا لە کوێدایە، ئەی رۆڵی ژنی کورد لەکوێی ئەم هاوکێشە ئاڵۆزە جیهانییەدا قەتیس ماوە، ژن چۆن کەڵک لە ئامرازەکانی گەشەکردنی ئەو شۆڕشە جیهانییە وەربگرێ، بیخاتە خزمەتی گەشەی زهنی و فکری و سیاسی و زانستی و کۆمەڵایەتی خۆیەوە، یان بە پێچەوانەوە، ئەوانیش شان بەشانی رەگەزی پیاو، نەوەی نوکەی دیجیتاڵ و ماس میدیا، دەبنەوە خۆراکی هەژموونی عەولەمە و کاریگەرییە نێگەتیڤەکانی شۆڕشی تەکنۆلۆجیا و ستراتیجیەتی سیستمی سەرمایەداری، کە لە چەندین گۆشە و جەمسەرەوە، جڵەوی سەرکردایەتی ئەمڕۆیان کردووە و فەرمانڕەوایەتی تۆپی زەوی، لەسەر بنەما و بەرژەوەندییە باڵا و تایبەتییەکانی خۆیان، بە جۆرەها شکڵ و شێوە دەکەن، شەڕی ساردی بایۆلۆجی و جەرسوومییان لە سەرتاسەری دنیادا، لە دژی یەک دەستپێکردووە.
بە گشتی ئەوەندەی ئەم شۆڕشە گۆڕانکاری لەفۆرم و ستایل و فیگەری ژن و مرۆڤەکاندا کردووە، لە جەوهەر و ستراتیج، بیر و ئاگاییاندا گۆڕانکاری نەکردووە
زەنگێکی مەترسیدار
لە رۆژهەڵاتی ناوینیش (رۆژئاوای کوردستانی لێدەرچێ) دیاردەکە وەک زەنگێکی مەترسیدار، لە هەموویدا چەند بارە بۆتەوە، لەبەرئەوەی ئایدۆلۆجیای پیاوسالاریی و هەژموونی ئایین، لە سیستمی حوکمڕانی وڵاتاندا باڵادەستە و هێشتا دوانەی دین و دەوڵەت، لە یەک جیانەکراونەتەوە و بەیەکەوە تاکی کورد و رۆژهەڵاتیی دەئاژوون، ئەوە راستە توێژێک لە ژن، لە سایەی گەندەڵی سیاسی و سێبەری دەسەڵات و حوکمڕانیی پیاوسالاردا، لەسەر بنەمای باڵانسی جێندەری و سیستمی کۆتا، لەهەر یەک لەو وڵاتانە، لەسەر گۆشت و خوێنی قوربانیەکانی ژن، هەڵتۆقیون و وەک فیرعەون، بەسەر کۆی پرۆسەکەوە، بوونەتە خاوەنی جۆرەها پلەو پۆستی حکومی حزبی و جێندەری و رێکخراوەیی، بەڵام هەر خودی ئەم ژنانە خۆیان، بوونەتە دنیایەک مەترسیی و هەڕەشە و تەنانەت جۆرەها تراوما، بۆ سەر خودی ژن خۆی و پرۆسێسی ژن بوونەوە، هەروەها ئەوەندەی پرسی جێندەر وەک مارکە و تەجمیل و بڕاند و نرخ لێدەخوڕن، خودی رەوشەکە لێناخوڕن، هەر ناشزانن لێیخوڕن.
گۆڕانکاری لە فۆرم و ستایلی ژندا
بە گشتی و لە سەرتاسەری دنیاشدا، ئەوەندەی ئەم شۆڕشە گۆڕانکاری لەفۆرم و ستایل و فیگەری ژن و مرۆڤەکاندا کردووە، لە جەوهەر و ستراتیج، بیر و خەون و ئاگاییان گۆڕانکاری نەکردووە، تاکە شتێک ببووە مایەی ئومێد، دەنگدانەوەی رێكخراوە چەپ و مرۆڤدۆستەکان، سەرکەوتنی ژنی کورد بوو، لە ئەزموونی شۆڕشی رۆژئاوادا، کە رووبەڕووبونەوەی پەتای داعشی بەدوای خۆیدا هێنا، ئەویش لەبەرئەوەی ژن تێیدا بۆ یەکەمجار، بەدەر لەوەی بووکەڵە و سێبەری پیاو و ئایدۆلۆجیا بێ، ئاکتێکی سەربەخۆ و گیان لەسەردەستی ئاکتیڤ بوو، سەرکەوتوانە توانی فەرمانڕەوانیەتی بکات، ئاراستەی تەواوی تیۆرە باوەکان، لە هاوکێشە سیاسییەکانی شۆڕشەکانی پێش خۆی تێکبشکێنێ، جارێکی تر چەمکی ژن بوون، وەک بوونێکی کاریگەر و باڵادەست، لە یەکلاکردنەوە و وەرچەرخاندنی تیۆری سیاسیدا تۆمار بکات و ناوێکی تر بە فۆرمی ئیدارە و حوکمڕانی ببەخشێ، بەڵام چونکە ئەم وەرچەرخانە جۆرییە لە مێژووی ژن و مرۆڤایەتیدا، لەگەڵ هەیمەنەی بەرژەوەندییە باڵاکانی سیاسەتی رۆژئاوا و رۆژهەڵاتدا نەهاتەوە، بووە مایەی چاوتێبڕین و گەلەکۆمەی تورکی و نێودەوڵەتی، بەجۆرێک لە جۆرەکان ویستیان سەرکورت و کپی کەن.
