لە رۆژگاری نوێدا پرۆسەی بەرهەمهێنانی ترێند چ وەك رووداوێكی خۆرسك ـ ی خۆسەپێن بەسەر یادگەی وەرگران، یانیش بەرەنجامی پرۆسەیەكی عەقڵانیی مەدروس بۆ كەمەندكێشكردنی بەكاربەر و مۆنۆپۆڵكردنی سەرنجیان بۆتە مۆد، ئەم ترێندانە لە هەر كایەیەك بن و هەر ئامانجێكیان لە پشت بێت، ئەو مانایە ناگۆڕێت كە بووەتە بەشێك لە كارلێكی هاوبەشی نێوان بەكاربەرانی سەكۆ كۆمەڵایەتییەكان، بەڵام كاتێك فۆڕمی ترێندەكان بە سیاسیی دەكرێت و حزب دەبێتە كارخانەی بەرهەمهێنان، ئیدی ترێندە سیاسییەكان دۆخێكی نوێتر لە كارلێك دروست دەكەن، بەڵام ئەم فۆڕمەیان بە تەنها لە نێوان بەكاربەراندا نامێنێتەوە، بەڵكو دەكەوێتە نێوان پارت و فانەكانەوە و ماركێتینی سیاسی لە شێوەی تازەیدا دەردەكەوێت.
دەكرێت كەسایەتی بافڵ جەلال تاڵەبانی بكرێت بە نموونە و پێوانەكردنی ئەم پرۆسەیە لە گواستنەوەی گریمانە بۆ واقیع
ترێندی سیاسی
روونتر بڵێین تایبەت بە ترێندی سیاسی و پرۆسەی بەرهەمهێنانی نێواخنی ئامانجدار، هەروەك هاشتاگەكانی سۆشیال میدیا «ترێندی سیاسی» لەوە تێپەڕیووە كردەی خۆڕسكی ئاسایی فانەكانی میدیای نوێ بێت، بەڵكو گۆڕاوە بۆ دۆخێك لە دەستكاریكردنی سیاسیانەی ئامانجدار كە لەرێگەیەوە پەیامە درێژەكان بە ئاماژەی كورت دەكرێن بە ترێند بۆ كۆنتڕۆڵكردنی رای گشتی و گۆشكردنی بەكاربەران لەسەر جۆرێك لە بیركردنەوە و بڕیار، لە رووکاردا رەنگە بەكاربەرانی سەكۆ و پلاتفۆرمەكان بۆ ویست و ئارەزوو، بۆ چالێنج و لاساییكردنەوە كار لە فەزای ترێندەكاندا بكەن و دووبارەیان بكەنەوە، بەڵام دواجاریش هەر كردەی لاساییكردنەوە و بەرهەمهێنانەوەی بە شێوەی دیكە، واتای هاوبەشیكردن لەگەڵ بیرۆكە و تێڕوانینە سەرەكیەكان دەگەیەنێت، كەوابێت ترێندە سیاسییەكان چەندە پێخۆری فرێند و فان و فۆڵۆوەرسەكانی میدیای نوێیە، بەهەمان شێوەش گوزارشتە لە باڵادەستی و كاریگەریی رەوتێكی سیاسی یان كەسایەتی و رابەرێكی سیاسی. پلاتفۆرمەكان ئاستی بەكارهێنانیان فراوان و گشتگیرە، لەبەرئەوە هەموو كەسێك توانای رۆڵ بینینی لەو پانتاییەدا هەیە، دەشکرێت وەك چۆن بۆ ئامانجی گەورە و گرنگ بەكاربێت بە هەمان پێوانە بۆ ئامانجی مەترسیدار و چەواشەكردنی رای گشتیش بخرێتە كارەوە، لێرەوەیە هێزە سیاسییەكان بە دروستكردنی سوپای ئەلەكترۆنی و كۆكردنەوەی میلیشیای سۆشیال میدیا كارا دەبن تا لە بەرهەمهێنانی ترێندەكان دەور ببینن، ئەو دەورە گۆڕەپانێكی نوێی بۆ ململانێی سیاسی دروست كردووە و هێز و كەسایەتییەكان كردویانە بە پانتاییەكی تازە بۆ سەلماندنی باڵادەستی و هەژموون.
جۆری ترێندەكان دەگۆڕێن
ئەگەرچی جۆری ترێندەكان بە گوێرەی سروشت و تایبەتمەندیی پلاتفۆڕمەكانی سۆشیال میدیا دەگۆڕێن و هەر یەكێك لە سەكۆ كۆمەڵایەتییەكان جۆرێك لە تایبەتمەندییان بە ترێند بەخشیوە، بەڵام دەقیق هەموویان لەوەدا كۆدەبنەوە، كە سەرچاوەیەكی گرنگی گۆشكردنی سیاسی و مۆنۆپۆڵكردنی ئارەزومەندانەی بەكاربەرانن و بۆ ئامانجی سیاسی گەورە بەكاردێن. بەدەر لەوەش ترێند دیاردە تازەکەی ناو میدیای نوێ لە كایەی سیاسیدا زۆربەی جار بۆ ئاستی رەزامەندیی كۆمەڵگا لە كارەكتەرێكی سیاسی دەگەڕێتەوە، بەو مانایەی خودی پرۆسەی بەرهەمهێنان و چۆنیەتی و چەندیەتی ترێندەكان نیشانی دەدات، كە سیاسەتمەدارێك چەندە لە ئاستی میللی پەسەندكراو و گوێ لێگیراوە و چۆن پەیام و رەفتار و جوڵە و سروشتی مرۆییەكەی شایستەیە خەڵك لە فۆڕمە بەكاربەرەكەی میدیای نوێدا تەقلیدی بكاتەوە.
رستەیەكی سەرنج راكێشی رۆژنامەنووسی ئەمریكی (لینهارت پیچ) لەبارەی بەكارخستنی ترێند لە ململانێی هەڵبژاردنەكانی ئەمریكا و بەتایبەت لە گوتاری باراك ئۆبامادا سەرنج راكێشە، كاتێك دەڵێت «سیاسییەكان بە تەنها ئەركیان بەرهەمهێنانی ترێند نییە، بەڵكو گواستنەوەی جیهانی گریمانەكراوی نێو ترێندەكانە بۆ واقیعی سیاسی»، بە گواستنەوەی ئەم دیدە بۆ كوردستان، ئەكرێت كەسایەتی بافڵ جەلال تاڵەبانی بكرێت بە نموونە و پێوانەكردنی ئەم پرۆسەیە لە گواستنەوەی گریمانە بۆ واقیع، چونكە كۆی ترێندە بەرهەمهاتووەكانی ماوەی رابردوو لە «لۆمارێ» و «زابخودێ» و ئەوانی دیكەش، بە تەنها وشەی ئاسایی بێ واتا و مەغزا نین، بەڵكو دەلالەتی پشت هەریەكێكیان جگە لەوەی رووداوێك دەگێڕێتەوە، هاوكات نەخشەڕێگایەكیشە بۆ دروستكردنی خودی رووداو خۆی، واتا بە تەنها ئاماژە نییە بۆ گێڕانەوە و چیرۆكخوانی قۆناغ و پرسێك، بەڵكو رێگایەكە بۆ بوونیادنانی رووداوێكی سەربەخۆ و واقیعی، ئەویش لەرێگەی جێگیركردنی وەك ترێندی سەر زمان و ناو دڵی خەڵك و بەكاربەرانی تۆڕە كۆمەڵایەتییەكان.
دەبێتە واقیعێكی بەرجەستە
لە هەڵمەتی بانگەشەی هەڵبژاردن، چونكە بەشێكی گرنگی ئەو پرۆسەیە لەناو سەكۆ كۆمەڵایەتیەكانەوە بەڕێوە دەچێت، دەكرێت لە ئێستاوە هێز و باڵادەستی هەر هێزێك دیدە بكرێت، بەو پێیەی لە ئێستادا شاشەكان بە ترێندی سەرۆك بافڵ روپۆشكراون، بەڵگەیە كە لەبەردەم قۆناغێكداین، كە بەیەكخستنی ترێندەكان دەتوانین بڵێین «زابخودێ رێڕەو راستدەكەینەوە و دەیانڕوخێنین و دەشیان نێرینەوە لۆ مارێ»، ئەوكاتەش جیهانە گریمانەییەكەی سۆشیال میدیا دەبێتە واقیعێكی بەرجەستە.
