ئارام عه‌لی عه‌زیز
* ئایا ئاگری جەنگی غەززە، كە ئەمڕۆ گەیشتۆتە لوبنان، سوریا و عیراقیش دەگرێتەوە؟
- بەڵێ!
* ئایا ئەگەری هەیە، ئاگری جەنگەكە بگاتە سنوورەكانی توركیاو، توركیاش بگرێتەوە وەكو سیاسەتمدار و میدیای توركیا باسی لێوە دەكەن؟
- بەڵێ!
* ئایا دوای وەڵامدانەوە و لێدانی ئێران لەلایەن ئیسرائیلەوە، ئیران وەڵام دەداتەوە؟
- بەڵێ!
* ئایا هەڵكشانی پێكدادانەكان، ناوچەكە بەرەو جەنگێكی سەرتاسەری دەبات؟
- بەڵێ!
* ئایا لەو حاڵەتانەدا، هەرێمی كوردستان دەبێتە گۆڕەپانێكی جەنگ و توركیا و ئێران لەشكركێشی دەكەنەسەر؟
- بەڵێ!
* ئایا ئیسرائیل و توركیا و ئێران لەو ململانێ و هاوسەنگییە تازانەی كە هەیە هەوڵی راكێشانی هێز و لایەنە كوردییەكان بۆ بەرەی خۆیان دەدەن؟
- بەڵێ!
* ئایا هێز و لایەنە كوردییەكان، بە تایبەت هێزەكانی سوریای دیموكرات و پەكەكە لە ململانێی نێوان ئیسرائیل – توركیادا دەبن بە هێلكەی قوبان؟
- بەڵێ...
* ئایا ئەم جەنگ و باهۆزی گۆڕانكارییە گەورەیەی خۆرهەڵاتی ناوەڕاستی گرتۆتەوە، نەخشەی سایكس- پیكۆ هەڵدەوەشێنێتەوە، هاوسەنگیی هێز و نەخشەی تازەی لێدێتە كایەوە و فرسەتێك بۆ كورد فەراهەم دەكات؟
- بەڵێ، بەڵام...
«بەڵام»ی مەسەلەكە لەوەدایە، كە مەسەلەی كورد یەك مەسەلە نییە، بەڵكو چەند مەسەلەیەكە، سیستەمی ستەمكاریی ئیقلیمیی كە داگیركەرانی كوردستان پارچەیەكن لێی و لەسەر پشتی دابەش و داگیركردنی كوردستان و بزركردنی كورد لە ناو مێژوودا دروستكراوە، بە پێی تیۆری دژایەتی ئایین و شارستانیەت داڕێژراوە، كە بەردی بناغەی سیستەمی ستەمكاریی جیهانییە. ئینگلیز و فەرەنسا دوای جەنگی یەكەمی جیهان، رۆڵی سەرەكیان هەبوو لە دووبارە داڕشتنەوەی سنووری دەوڵەتانی پاشماوەی ئیمپراتۆریەتی عوسمانیی و بە گورگان خواردوو دانی كورد و دامەزراندنی كۆماریی سوریا و توركیا و عیراق و لوبنان، دابەشكردنی خاك و سەرزەمینی كوردستان بە پێی رێككەوتننامەی سایكس – پیكۆ.
* ئایا ئەو هەموو مەسەلەیە، كە خۆی لە چەندین بازنەدا دەبینێتەوە، هەرهەمویان پێكەوە بە شێوەیەكی بابەتیی و زاتیی كۆسپن لەبەردەم كورد و كوردستانیش وەكو بێشكچی دەڵێ:»كۆڵۆنییەكی نێودەوڵەتییە»، دەتوانرێت لە شەو و رۆژێكدا بەرتەرەف بكرێن و تێپەڕێنرێن، بەم عەقڵیەت و فكر و هێز و سیاسەتەی، كە حزبەكانی كوردستان هەیانە؟
- نەخێر!
كەواتە چی بكەین؟ دەبێت مەسەلەكە تەنها لە باسوخواسی رۆژنامە و میدیادا نەمێنێتەوەو حزبەكان باش دەرك بەوە بكەن كە باهۆزەكە هەمووان دەگرێتەوە، بابە گەورەكانی هەمووان نامێنێت، لەبەرئەوە پێویستە هەمووان بكەونە حاڵەتی ئامادەباشیەوە، بۆ رووبەڕووبوونەوەی مەترسییەكان و قۆستنەوەی ئەم فرسەتە گەورەیەی دێتە كایەوە، لەسەرووی هەموویاندا، پێویستە یەكێتی و پارتی خۆیان بۆ رووبەڕووبوونەوەی ئەو گۆڕانكارییە چاوەڕوانكراوانەی ناوچەكە ئامادەبكەن و تای هەڵبژاردن تێپەڕێنن و بەرنامەیەكی ئاوارتەی تێروتەسەلی هەمەلایەن دابنێن. كورد گوتەنی: « تۆ ئەوەی لەسەر خۆتە بیكە، ئەوەی دیكە لەسەر خودا».
