پەیامەکەی عەبدوڵڵا ئۆجەلان بۆ پرسی ئاشتی ئەرێنییە، بەڵام قۆناغەکە لایەنی سێیەمی گەرەکە، وەک گەرەنتیکار و چاودێری پرۆسەکە.
لەوەش گرنگتر ئەوەیە، دەوڵەتی تورکیا ئامادەگیی جددی هەبێت بۆ سەرخستنی پرۆسەی ئاشتی و پێشکەوتنی ئەو پرۆسەیە کە 41 ساڵە جەستەی کورد و تورک خوێنیان لێ دەتکێت.
ئەوەی لەم قۆناغەدا لە بواری کردەیی دەبێتە گەرەنتی کار و پیشاندانی نییەتی ئاشتی، ئازادکردنی ئۆجەلان و زیندانە سیاسییەکانی ئەو وڵاتەیە؛ لە لایەکی ترەوە دەوڵەت دەستبەرداری سیاسەتی قەیوم و قۆڵبەستکردنی کوردان بێت و ئۆپراسیۆنەکانی رابگرێت، لە ناوخۆ و لە دەرەوەی تورکیا؛ بۆ سەرخستنی ئاشتیش گرنگە هەردوولا کرداری چەک خامۆش بکەن.
پرسی دانانی چەکی پەکەکە پێویستی بەگەرەنتیکاری نێودەوڵەتی هەیە؛ جگە لەوەش ئۆجەلان لە دۆخی 26 ساڵ زیندانداییە و زیندانیش لەژێر شەرت و مەرجدایە، گواستنەوەی ئۆجەلان لە ئیمرالییەوە گەرەنتی زیاتر دەدات بە قۆناغی ئاشتی؛ چیتر پێویست نییە دەوڵەت جەمسەری یەکەمی ئاشتی لە زیندان توند بکات.
پرۆسەکە گەرەکییەتی کە راستەوخۆ قەندیل بەشداریی دیالۆگ پێ بکات؛ نەک لە دوورەوە پەیامی بۆ بنێردرێت .دەکرێت لە قۆناغی یەکەمدا ئاگربەست رابگەیەندرێت و قۆناغ بە قۆناغ چەک دابنرێت و ئەوکاتە بە یاسا پرۆسەکە گەرەنتی بکرێت. دەوڵەت لەو بوارەدا دەتوانێت هەنگاوی ئەرێنی هەڵبهێنێت.
وەک سەرنجێک لە وەفدی دانوستانکار، ئەحمەد تورک-ی تێدایە، کە سەرۆکی شارەوانی ماردینە، ئەو سیاسییەی کورد کە تاوانبارکراوە لەلایەن تورکیاوە و قەیومیان لە جێی داناوە؛ ئەوەش وەڵامێک دەبێت کە زەمینەکە ماویەتی و پێویستی بە چاودێری یاسایی هەیە.
لە تورکیادا باشترین رێگەچارە، ئەوەیە کە بە یاسا گەرەنتی ئاشتی بکرێت، پرسی ئاشتی بە دیموکراسی و قبووڵکردنی جیاوازییەکانی کورد چارەبکرێت و گۆڕانکاری یاسایی و دەستووری بکرێت.
