پێش ئەوەی باسی دواپەیامی «ئاپۆ» بۆ ئاشتی و بابەتی سەدەی پێکەوەژیانی ئاشتیانەو ناسیونالیزمی ئەوی تر نەبین و دۆخی کەرکوک بکەم، بەلامەوە گرنگە، باسی ئەو سنوورە دروستکراوەی نێوان کوردان بکەم، کە بەلای کوردەوە هیچ ئەرزشێکی نییەو زۆرجار، یان هەمووجار ئاوەزو سۆزی کوردانە سەر لەبەری هەڵدەوەشێنێتەوە، ئەوکاتەی لەدواساڵی سەدەی خوێن و جەنگ و فرمێسکدا ئۆجەلان گیرا، گرتنەکەی وەک کۆستێکی گەورە دەرکەوت، تەنانەت وتیان مام جەلالیش بە هەواڵ و دیمەنەکە گریاوە، نازانم ئەمە بۆ بارزانیش وابووە یان نا؟.
لە خەیاڵدانی راستینەی کورددا شتێک نییە بە ناونیشانی کوردی ئێرەو کوردی ئەوێ، کاتێ کە کۆبانی دەکەوێتە بەر هەڕەشەو ناکەوێت، کوردی هەموو دنیا بە دڵ و بە گیان لەگەڵین، ئەوە بۆیە لە خانەقین و کەرکوک گەڕەک و بازاڕ بە ناوی کۆبانی دەنرێن، ئەمە بۆ ئۆجەلانیش وەسایە، هاوڕێیەکم لە چەمچەماڵ دوو کوڕە نازدارەکەی ناوناوە ئاپۆ و ئامەد، ئەوێ ساڵێ لە سەرپولی زەهاو دۆستێکی کورد پێی وتم، ئاواتەخوازم لە پێناوی کەرکوکدا شەهیدبم، ژینا لە ژینای ئەمینییەوە بوو بە ژینای هەموو کوردستان و هەموو دونیا، کورد، کوردی میللی پێکەوەن، ناکۆک سیاسییەکانن.
پەیامی ئۆجەلان زۆر بە دەردی کەرکوکیش دەخوا، سەدەیەک لەنکوڵی کردن، بێ شووناسی، سڕینەوە، دەبێت بە سەدەی پێکەوەژیان و دیموکراتی وەڵام بدرێتەوە، کورد هەمیشە کە لەڕووی جوگرافی و دیرۆکەوە کەرکوک بە کوردستانی هەقیقی دەزانێت، یەکجار نەیوتووە نابێت ئەوانی دیکەی لێبن، لێ ناسیونالیزمی ئەوی تر نەبینی نەتەوەکانی تر پێچەوانەی ئەمەیان کردووە، کەرکوک شارێکی بریندارەو خوێنی لێدەچۆڕێ، پێویستی بە دادوەری گوێزەرەوەو بە مرۆڤکردنەوەی ستەمکار و جەلادە، ئەمەش کاتی دەوێ، ئاخر تۆ بۆ پەنجا ساڵ پەروەردەی مرۆڤگەلێ بەو جۆرە بکەی کە دەشێ خاکی خەڵک بەخاکی خۆی بزانێ، مافی خەڵک بخوات، بکوژو ببڕو تاڵانچی بێ، پەنجا ساڵیش پەروەردەی دەوێ تا بڵێی ئەوەی پێشتر پێتوترا راست نەبوو نە خاک هی تۆیە، نە مافی ستەم و داگیرکاریت هەیە، ئەمە پێویستی بە پەروەردەکردنەوەی مرۆڤە.
ئەوەی ئۆجەلان بۆ پێکەوەژیان و دیموکراتی گەلان وتی، بە ساڵ و دووان جێبەجێ نابێ، کوشتنی گیانی ناسیونالیستانەی ئەوی تر نەبین، بوێری و بەرنامەو پەروەردەی دەوێت، ئەمە بەرتاقای ئەوەی بۆ باکوور راستە، بۆ باشوور و رۆژهەڵات و رۆژئاواش راستە، هەندەی ئەوەی بۆ ئامەد دروستە، بۆ کەرکوک و کرماشانیش وەسایە، پێکەوەژیانی ئاشتیانەی گەلان، تاکە چەکی تێکشکاندنی ئەو تاریکییەیە، کە سەت ساڵی رەبەقە، ترسێکی گەورەی خستوەتە دڵی نەتەوەی سەردەستەوە، کە لای وایە، ئەگەر بواری ئازادی و هەناسەدانی ئەوانی تر بدات، ئیدی تەخت و تاراجی ئەو هەڵدەتەکێ، بەهەمان ئەم پێوەرە منداڵەکانی خۆی واپێگەیاندوە، کەدەبێ رقیان لەوی تر بێ، مادام داوای ئازادی و خۆخاوەنی دەکات.
هەڵوەشاندنەوەی ئەم درۆیانە قوربانی و کاتی دەوێت، بەرتاقای ئەوەی کە نەتەوەی ستەملێکراو دەبێ قەرەبوو بکرێتەوە، ستەمکاریش پێویستی بە هێنانەوە دۆخی مرۆیی و لێسەندنەوەی خەیاڵی نەک هەر خۆ خاوەنی ئەو خاوەنیشە.
