لە رۆژگاری ئەمڕۆدا بە هۆی فراوانبوون و بەرەوپێشچوونی ژیان و هۆكارەكانی پێشکەوتن و تەكنۆلۆژیا بەئاسانی دەتوانین ئاشنای زۆربەی یان بگرە سەرجەم كەلتورەكانی جیهان ببین، لەو نێوەندەشدا دەتوانین ئەرک و مافی ژن ببینین. دەتوانین بزانین ئایا کەلتورە جیاوازەكان چۆن سەیری خانمان دەکەن و چۆن مامەڵەیان لەگەڵدا دەکەن و رۆڵی خانمان چۆن هەڵدەسەنگێنن؟
هەمووان چاویان لەسەر وڵاتانی رۆژئاواو ئەوروپایە، بەڵام ئایا لە وڵاتانی رۆژئاوا مافی خانمان دەستەبەر کراوە؟
نابێت ژن یەکسان بکرێت بە پیاو
لەراستیدا نەخێر، ئەوەی لە رۆژئاوا روودەدات مافی یەکسانیی مرۆڤە بۆ هەمووان وەک یەک دابەش کراوە، ئەمەش قورسایی خۆی هەیە، چونکە ئەوەی باس دەکرێت و دەوترێت لەگەڵ واقیعی ژیاندا جیاوازیی زۆری هەیە، بۆیە بە رای من نابێت ژن یەکسان بکرێت بە پیاو، لەبەرئەوەی ژن مەخلوقێکی پیرۆزی گەردوونە، دەبێت وەک ژن بوونی خۆی رێزی لێ بگیرێت و مافی خۆی پێبدرێت، پێویست ناكات بەراورد بکرێت بە رەگەزی بەرامبەری، چونكە پیاوانیش پیرۆزیی خۆیان هەیە و ئەرک و مافی خۆیان هەیە.
ئەوەی دەمەوێت بیڵێم چ ژن و چ پیاو هەر یەکەیان لە پێگەی بەرپرسیارێتیی خۆیاندا جوانن، هەر یەکەیان بە روانگەی ژیان بینینی خۆیان سەرکەوتوو دەبن، بۆیە نابێت و ناکرێت بەراورد بە یەک بکرێن.
