ئەحمەد شەرع كە هێشتا لە بەشێكی وڵاتاندا وەك تیرۆریست داواكراوە، لە ماوەكانی رابردوودا لە پاریسی پایتەختی فەرەنسا بوو، ئەو فەرەنسایەی كە هاووڵاتییەکانی (دادگای پشكنین) و قەڵای (باستێڵ)یان لە 14/8/1789 رووخاند و ئیتر لەوێوە بۆ ئەمڕۆ، فەرەنسا بووە لانكەی دیموكراسی و كرانەوە و ئازادی. هەفتەی رابردووش سەرۆكی گەورەترین زلهێزی جیهانیی (دۆناڵد ترەمپ) لە سعودیە پێشوازی لە شەرع كرد و 45 دەقیقە كۆبوونەوە.
لەبەر هەر هۆیەك بێت، ئەم هەفتەیە شەرع ئامادەنەبوو بچێتە بەغدا و بەشداریی لە لووتكەی کۆمکاری عەرەبی 34 بكات كە دوێنێ لە بەغدا كرا، ئەمە سەرەڕای ئەوەی لەلایەن بەشێك لە دەسەڵاتی سیاسی و حكومەتەوە دڵنیایی پێدرابوو و هەروەها حەمید شەتری سەرۆكی دەزگای هەواڵگریی عیراقی، نامەیەكی سەرۆك وەزیرانی گەیاندبووە شەرع و دڵنیایی پێدابوو كە كاربە بڕیاری دادگا ناكرێت بۆ دەستگیركردنی وەك تیرۆریستێكی داواكراو.
ئەوەی لێرەدا پرسیاری جەوهەرییە، ئەوەیە ئایا بەغدا لە سیاسەت و یاریكردنی نێودەوڵەتی بەرامبەر شەرع بێئاگا و دوورەپەرێزە، یان نەخێر؟ هەرچی ترەمپ-ە خوێندنەوەیەكی ماددی بۆ شەرع هەیە و هەرچی ماكرۆنی سەرۆكی فەرەنساشە هێشتا سوریا بە موستەعمەرەی خۆیان دەزانێت.
پشتبەست بە دیداری شەرع و ترەمپ لە ریاز پێش لووتكەی جامیعەی عەرەبی لە بەغدا، پاشان دیداری ماكرۆن و شەرع-یش لە كۆشكی ئەلیزێ لە پاریس، دەتوانین بڵێین ئەو عیراقییانەی كە دەسەڵاتدار و هێزی دەوڵەت بوون، لەبارەی رێگەدان بە بەشداریی شەرع لە لووتكەكەدا، بڕیارێكی سیاسیی دروستیان دابوو، بەڵام ئەو هێزە عیراقییانەی كە پێیاندەوترێت (هێزی نادەوڵەتیی) و خاوەن بڕیاری بەهێزن لە عیراقدا، هەڵەیان كرد كە لە رێگەی هەڕەشە و دەستگیركردنەوە، شەرع-یان گەیاندە ئەو بڕوایەی نەیەتە بەغدا و (شەیبانی) وەزیری دەرەوە بنێرێتە لووتكەكە.
بەشدارینەكردنی سەرۆکی سوریا لەم لووتكەیەدا، پێیوتین: لەلایەكەوە هێزە نادەوڵەتییەكان (ئەو هێزانەی سەربە دەوڵەت نیین و بوونیان هەیە و بڕیاریشیان پێدەدرێت) زۆرجار توانیویانە پەیوەندییەكانی عیراق لەگەڵ وڵاتانی دەرەوە و ناوچەكەدا بخەنە دۆخێكی خراپ و مەترسیدارەوە، لەلایەكی تریشەوە عیراق هێندە ژیرانە دەركەوتەیەكی وەك شەرع-ی نەخوێندەوە كە ئەگەرچی هێشتا ناوی لە لیستی تیرۆردایە، بەڵام مادام پاریس و واشنتن و ریاز و ئەنقەرە مامەڵەی لەگەڵ دەكەن، ئەوا پێویستە بەغداش مامەڵەی لەگەڵدا بكات و ئەو ئەمری واقیعە قبوڵ بكات، چونكە لەدوای ساڵی 1979وە ئەم لووتكەیە دەرفەت بوو بۆ عیراق پەیوەندییەكانی لەگەڵ سوریا کارا بكاتەوە و رووخساری ئەم لووتكەیەش جیاوازتر لە هەر لووتكەیەكی دیكە، پیشان بدات.
