لە دەروونزانی و كۆمەڵناسیدا، پەروەردەی ژەهراوی یان پەروەردەی رەش، بریتییە لە رێگا نەریتییەكانی پەروەردەی منداڵ كە سەركوتكاری و توندوتیژی و سزا و لێدانی جەستەیی بەسەریدا زاڵە، بەلای بیرمەندانی ئەم رەوتەوە، پەروەردەی رەش(من)ی كۆمەڵایەتیی باڵا دەچێنێت و منداڵ بۆ ژیانی داهاتووی بەهێز دەكات و تەواوی هەست و ئەندامەكانی دەخاتە خزمەت ئەركە كۆمەڵایەتییەكانەوە.
لە پەروەردەی ژەهراویدا هەندێك سروت بەكاردەهێنرێت و كە هەموویان نكوڵیكردنن لە پێداویستییە بنچینەییەكان و بۆ جێبەجێكردنی رەهای سیستمن وەك پراكتیزەكردنی ئازارچەشتن (بە ئازاری دەروونیشەوە)، سەرپەرشتیی گشتگیرانەی منداڵ (فەرمانڕەوایی بەسەر جەستە و رەفتاریدا، ملكەچی، قەدەغەكردنی درۆ و شتی تر). بەلای میللەرەوە ئەم جۆرە مامەڵەیە لەگەڵ منداڵدا، لە نەوەیەكەوە بۆ نەوەیەكی دی دەگوێزرێتەوە‌و وەك پیرۆز و پاكژ دەپارێزرێت و پەیڕەودەكرێت.
ئەلیس میللەر (1923-2010) دەرووننناس و فەیلەسوفێکی پۆڵەندییە، ئەم ژنە بەو كتێبانە ناوبانگی پەیداكرد، كە دەربارەی خراپیی مامەڵەی دایك و باوك لەگەڵ منداڵدا، دەینووسین و بۆ چەندین زمانی زیندوو وەرگێڕدراون. میللەر تا كۆتایی تەمەنی بۆ دۆزینەوەی قۆناغی منداڵی بەشێوەیەكی زانستی تێكۆشاوەو ساڵی 1985 نووسیویەتی: لە بیست ساڵی كاركردنم وەك دەروونشیكار، تێبینیم كرد و بەتەواوی تێگەشتم، كە خەڵكی نكوڵی لەو شۆكانە دەكەن كە لەقۆناغی منداڵیدا رووبەڕووی بوونەتەوە‌و هێشتا باوك و دایكیان هەر بە نموونەیی دەزانن. میللەر مۆدێلی شۆكی بەرفراوان كرد بۆ سەرجەم شێوەكانی مامەڵەی خراپ لەگەڵ منداڵدا بەتایبەتی (لێدانی منداڵ) و دواتر ناوی لێنا پەروەردەی ژەهراوی.
دیارترین كتێبەكانی میللەر: (درامای منداڵی بەهرەمەند) ساڵی 1979، لەم كتێبەدا ئەم بابەتانە باس و راڤە دەكات: رواڵەتەكانی ئەو كەسێتییەی لە منداڵیدا بەرەو رووی جۆرەكانی شۆك بۆتەوە، كاردانەوەی توندی لەدەستدانی خۆشەویستی لە قۆناغی منداڵیدا، خەمۆكی و پارانۆیا، زیندانی ناوخۆیی، بازنەی داخراوی بێزاری، یادەوەرییە چەپێنراوەكان و هۆكارەكانی خەمۆكی و چۆنییەتی باڵابوونی شۆكی منداڵی لای گەورەكان.
كتێبی(پێویست ناكات تێبینی بكەیت) ساڵی1981. رۆمانێكە و بەشێوازێكی نیمچە ئەكادیمی نووسیویەتی و تێیدا رەخنە لە دەروونشیكاری دەگرێت و تۆمەتباری دەكات بەوەو لە شێوازەكانی پەروەردەی رەش یان ژەهراوی دەچێت و دەڵێت: پشكنینم بۆ تیۆری پاڵنەری فرۆید كرد كە بریتییە لە ئامرازێك بۆ سەرزەنشتكردنی منداڵ لەسەر رەفتاری سێكسی ناپەسەند بەلای گەورەكانەوە.
كتێبی (وێنەكانی منداڵ ساڵی 1986) ئەم كتێبە كلیلێكی رێ پێنەدراوە بۆ ژیاننامەی نیچە و پیكاسۆ و كۆلۆیتز و پاستەر و كیتۆن.
كتێبی (مەعریفەی رەتكراوە ساڵی 1988) ئەم كتێبە زیاتر تاكەكەسییە و تایبەتە بەخۆیەوەو باس لەو بەدرەفتارییانە دەكات كە لە منداڵیدا تووشی هاتووە.
كتێبی(رووخاندنی دیواری بێدەنگی 1990) لەسەروبەندی رووخانی دیواری بەرلیندا نووسیویەتی، تێیدا باسی كەلتوری مرۆڤایەتی دەكات و ئەو دیوارە میتافۆریكەی كە كۆمەڵگە (ناوەندە ئەكادیمییەكان، پزیشكانی دەروون، پیاوانی ئایین، سیاسەتمەداران و ئامرازەكانی راگەیاندن) لەپاڵیدا پارێزگاری لەخۆی دەكات لەڕێی نكوڵیكردن لە لێكەوتە وێرانكارییەكانی بەسەر عەقڵی منداڵەوە، كە دەرئەنجامی مامەڵەی خراپن لەگەڵ منداڵدا.
كتێبی(جەستە هەرگیز درۆ ناكات ساڵی2005) شیكاری كەسێتی و بەرهەمەكانی دیستۆیفسكی و چیخۆف و برۆست و كەسانی تر دەكات.
