ئەگەرچی سەرۆكی ئەمریكا و وەزارەتی دەرەوەی وڵاتەكەی، تائێستا لەسەر سیاسەتی خاوكردنەوەی گرژییەكانی ناوچەی رۆژهەڵاتی ناوەڕاست بەردەوامن، بەتایبەتی ئاگربڕی نێوان ئێران-ئیسرائیل، كۆنترۆڵكردنی جەنگی غەززە، سەقامگیریی سوریا، بەردەوامیی پرۆسەی سیاسیی عیراقی دوای داعش، درێژەكێشانی ئاسایشی ناوچەی كەنداو، چارەسەری كێشەی یەمەن، گەڕانەوەی ئارامیی زیاتر بۆ لوبنان و نەهێشتنی هۆكاری پشێویی باشووری ئەو وڵاتە، پرۆسەی ئاشتیی توركیاو زۆر دۆسێی تر، بەڵام هاوكات هەموو ئەم دۆسێیانە، وەك تارمایی هەڕەشەی ناسەقامگیركردنەوەی ناوچەكە، كۆتاییان نەهاتووە.
هەندێ گۆڕەپان هەن، هەر خۆیان تائێستا ئارام نین و گرژی و جەنگیان تێدایە، وەك غەززە، یەمەن، ناوبەناو باشووری لوبنان و هەندێ ناوچەی سوریاو هەندێ سنووری عیراقیش، بۆیە زەمینەی ئەنجامدانی هەڵبژاردن، لەناو ئەم ژینگە ئیقلیمی و ناوچەییەدا، بۆ وڵاتێكی وەكو عیراق، بێ كێشە نییە. ئەمە جگە لەوەی ئەمریكا خۆیشی، وەك زلهێزێك، ئەگەر بەبیانووی سەپاندنی ئاشتییش بێت وەك ناوبەناو سەرۆك ترەمپ باسیدەكات، بژاردەی دەستێوەردانی سەربازیی وڵاتەكەی لە هەلومەرجی ناوچەكەدا، ناشارێتەوە.
راستە لە عیراقدا ئامادەكاری بۆ هەڵبژاردن كراوە، راستە بە سەدان قەوارەو هاوپەیمانێتی و لیست و كاندید بڕیاری بەشدارییان لە هەڵبژاردندا داوە، بەڵام هاوكات كۆمەڵێك ئاڵنگاریش هەن، لەوانە: دۆخی نائارامی ناوچەكەو تارمایی جەنگ و توندوتیژییەكانی، بەتایبەتیی لەرزۆكیی ئاگربڕی ئێران – ئیسرائیل، كە رەنگە لەگەڵ نزیكبوونەوەی كاتی هەڵبژاردنی عیراقدا، مەترسیی سەرهەڵدانەوەی دەستپێبكات و كاریگەریشی لەسەر تەرازووی هێز لەناوخۆی عیراقدا ببێت!.
ئاڵنگارییەكی تر، قۆناغی كەمپینی هەڵبژاردنە، كە تیایدا فاكتەری دارایی سیاسی و كڕینی وەلاو رێڕەوی بانگەشەو كێبڕكێ، گرژیی خۆیان هەیەو ئاسایی بەڕێوە ناچن. ئاڵنگارییەكی تر، مەترسیی تێوەگلانی عیراق خۆیەتی لە جەنگدا لەگەڵ ئیسرائیل، یان بەئامانجگرتنەوەی بنكە سەربازییەكانی ئەمریكا، ئەوەش بەهۆی گروپە چەكدارەكانەوە كە نەیاری تەقلیدیی هەردوولان و هەریەكە لە ئەمریكا و ئیسرائیلیش زوو زوو هەڕەشەی رامكردنیان دەكەن.
كێشەیەكی تر، فراوانبوونی بازنەی بایكۆتكردنی هەڵبژاردنە. هەندێ هێز هەن، بەهەر ئارگیۆمێنتێك بێت، لەناو ئەم ژینگە ئاڵۆزە لۆكاڵی و هەرێمایەتییەدا، نەك هەر بایكۆتی هەڵبژاردنیان جاڕداوە، بەڵكو هۆكاری ساردكردنەوەی هێزی ترو كاراكتەری زۆری دیكەی سەربەخۆو بێلایەنن لە چوونە هەڵبژاردنەوە، وەك چۆن كاریگەرییان لەسەر بژاردەی شەقام و رێژەی بەشدارییان دەبێت، لەوانە: رەوتی سەدر، كە خاوەنی بنكەی جەماوەریی فراوانە، بەتایبەتی لەناو شیعەكاندا، ئەوەش بە بەڵگەی بەدەستهێنانی 73 كورسی پەرلەمانی لە هەڵبژاردنی 2021دا.
هەروەها هاوپەیمانێتیی نەسر-ی حەیدەر عەبادی، كە ئەویش رووكارێكی تری سیاسیی شیعەی عیراقە و بەشداریی هەڵبژاردن ناكات. رەوتی هێڵی نیشتمانی-یش بە رابەرایەتیی عەزیز ئەلروبێعی، كە رەوتێكی چاكسازیخوازی مەدەنی و لیبراڵە و بایكۆتیان كاریگەریی لەسەر هەندێك لە گەنجان و سەربەخۆكانیش هەیە لە هەڵبژاردندا. هەروەها بزووتنەوەی سەربەخۆی تەوازون كە دەستەبژێرێكن لە خەڵكانی ئەكادیمی و كۆمەڵایەتیی عیراق لە موسڵ، ئەوانە و هێز و رەوتی تریش لە عیراق و كوردستانیش.
ئەوەی كە بە پلەی یەكەم، پرسیار لەسەر بەڕێوەچوون یان نەچوونی هەڵبژاردنی ئەم جارەی عیراق دەكات، هەلومەرجی هەرێمایەتییە. عیراق، لە ئێستاوە تا كاتی ئەنجامدانی پرۆسەكەو جیاكردنەوەی دەنگەكان، پێویستیی زۆری بە سیاسەتی خۆپاراستن هەیە لە گرژییەكانی ناوچەكە. بەردەوامبوونی ئەم سیاسەتە تائێستا بە تەواوی گرەنتی ناكرێت. راستە ئیرادەی رەسمیی دەوڵەت بەم ئاراستەیەیە، بەڵام لە عیراقدا دیاردەی دەوڵەتی قوڵیش هەیە كە دەشێت لە چركەساتی ئیستسنائیدا كاریگەرییان لەسەر بڕیاری سیاسیی رەسمیی دەوڵەت هەبێت، بەتایبەتی لە پرسی تێوەگلان یان نەگلاندنی عیراق لە گرژیی و توندوتیژییەكانی ناوچەكەدا.
