شەهرامی نازری: ئەوەی بە جوانی ماوەتەوە موزیکی کوردییە

08:25 - 2022-05-26
هەمەرەنگ
142 جار خوێندراوەتەوە

عەشق و خۆشەویستی من بۆ میوزیكی كوردی لە سەروو خۆشەویستیمەوەیە بۆ هەموو میوزیكەكانی تری  دونیا. میوزیكی كوردی پەیوەندی بە ناخ و نەتەوە و رەچەڵەكی منەوە هەیە. ئێوە گەر بە وردی سەرنج بدەن تەنانەت بەرهەمە فارسییەكانیشم لەژێر كاریگەری میوزیكی كوردیدان. ئەمە قسەی شەوالیەی ئاواز گەورە هونەرمەندی گۆرانی كوردی (شەهرامی نازری)یە كە دوای گەشتە درێژەكەی بەناو گۆرانی و ئاوازی ئێران و جیهاندا باس لە میوزیكی كوردی دەكات و دەڵێت: میوزیكی زۆربەی نەتەوەكان ئاڵوگۆڕی بەسەردا هاتووە، بەڵام ئەوەی بە جوانی و دەست لێنەدراوی ماوەتەوە میوزیكی كوردییە، هۆكارەكەش ئەوەیە كە كورد خاوەنی روحێكی شۆڕشگێڕانەیە و هەمیشە بەرگری لە كەلتور و فەرهەنگی خۆی كردووە.
نازری مەزن هەركات لە گەشت و كۆنسێرتەكانی ئەوروپا و ئەمریكا دەگەڕێتەوە ئۆغژنی بەوە دەشكێنێ كە بچێتەوە زێدی خۆی لە كرماشان لە نزیك تاقستان پڕ بە گەرووە گەرمەكەی بچریكێنێ و بڵێ:
خۆم كرماشانی فارسی نیەزانم
وە زوانی كوردی قەزات لە جیانم

عەندەلیبی خۆش خوانی ئێمە لە گەڕەكی بەرزە دەماخی كرماشان لەناو خێزانێكی ئاشنا بە میوزیك و شیعر و ئەدەب لەدایكبووە، هەر لە منداڵییەوە دایكی لەگەڵ شیعر ئاشنای ئەكات و باوكیشی كە تاڕادەیەك ئاشنای میوزیك بووە ئەوەی لە ئاواز و دەزگاكانی میوزیکی دەیزانی فێری كوڕەكەی كردووە، هێشتا حەوت ساڵ بوو كە یەكەم گۆرانی لە رادیۆی كرماشانەوە بڵاوكردەوە، لە یانزە ساڵیشدا چەندین گۆرانی لە رادیۆ و تەلەفزیۆنی ئێراندا پەخش كران. لە حزوری كۆمەڵێك موزیسیانی وەك عەبدوڵڵا خانی دەوامی، مەحمودی كەریمی، عەبدولعەلی وەزیری و حسێنی قەوامی پێگەیشت و ئەزموونی وەرگرت. دواتر لەبن دەستی مامۆستایانی وەك ئەحمەدی عەبادی و مەحمودی تاج بەخش و مەحمودی هاشمی فێری ئامێری سێتار بوو. بەرهەمی گەشتی شەوالیەی ئاوازی ئێمە بەناو دونیای عیرفان و ئاواز و شیعردا تا ئێستا زیاد لە 40 ئەلبوومی گۆرانییە. 
بەشێك لە ئەلبوومەكانی بریتین لە (گل صد برگ، كۆنسێرتی 1977 لەگەڵ گروپی كامكاران، صدای سخن عشق، باد صبا می آید، آتش درنیستان، لیلی و مجنون، ساز نو، آواز نو، آواز اساطیر، غم زیبا، ئۆركسترای سیدنی، كۆنسێرتی ئەرمەنستان). یەكێك لە ئارەزووەكانیشی ئەوەیە كۆنسێرتی ئەرمەنستان لە دیاربەكر و سلێمانی و هەولێر بەڕێوەببات و لەبەرئەوەی هەموو بەرهەمەكانی ئەم ئۆركسترایە كوردین، جگە لەوە دەیان خەڵاتی بەناوبانگی جیهانی پێبەخشراوە كە بەشێكیان بریتین لە (خەڵاتی شەوالییەی ئەدەب و هونەر لەلایەن دەوڵەتی  فەرەنساوە)، (خەڵاتی باشترین موزیسیانی عیرفانی جیهان لە فێستیڤاڵی فاس لە مەغریب)، (وەرگرتنی نازناوی لۆژیان دۆنۆر لەلایەن دەوڵەتی فەرەنساوە)، (خەڵاتی اسطورەی زیندوو لەزانكۆی UCLA)، (رێزلێنان لەلایەن زانكۆی هارڤارد بەهۆی رۆڵی نازری لە ناساندنی مەولانا بە دنیای خۆرئاوا و تازەگەری لە میوزیكدا)، بەڵام لەگەڵ وەرگرتنی ئەم هەموو خەڵاتە جیهانیی و بەناوبانگانەدا نازری مەزن پێیوایە هیچ خەڵاتێك هێندەی ئەو خەڵاتە دڵخۆشی ناكات و پێی سەربەرز نییە كە لەلایەن نەتەوەكەی خۆیەوە پێیدەبەخشرێت.

سەرچاوە:

بابەتە پەیوەندیدارەکان