نزیکەی 200 ھەزار گەشتیار بەبۆنەی پشووەکانی جەژنی رەمەزانەوە روویان لە ناوچە گەشتیارییەکانی ھەرێمی کوردستان کردووە کە زۆربەیان خەڵکی ناوەڕاست و باشووری عیراقن.
ئارام شوانی وتەبێژی بەڕێوەبەرایەتی گەشتوگوزاری سلێمانی بە کوردسات نیوزی راگەیاند، نزیکەی 75 ھەزار گەشتیار سەردانی سنووری پارێزگای سلێمانیان کردووە.
نەریمان فازڵ، وتەبێژی بەڕێوەبەرایەتی گەشتوگوزاری ھەولێریش رایگەیاند، تا سێیەم رۆژی جەژن نزیکەی 56 ھەزار گەشتیار روویان لە سنووری پارێزگای ھەولێر کردووە.
ھاوکات چیا قاسم، بەڕێوەبەری گەشتوگوزاری ھەڵەبجە وتی، بەھۆی پشووەکانی جەژنەوە زیاتر 58 ھەزار گەشتیار روویان لە ھەڵەبجە کردووە و پێشبینی دەکەن ژمارەکە زیاد بکات.
لەلایەکی دیکەوە شیمال ھروری، وتەبێژی گەشتوگوزاری دھۆک وتی، لەگەڵ تەواوبوونی پشووەکانی جەژن ئاماری گەشتیاران بڵاودەکەنەوە، چونکە تائێستا ئاماری تەواویان بەردەست نییە، بەڵام بەپێی زانیارییەکان ھاتنی گەشتیاران بۆ دھۆک وەک پێویست نەبووە و بەراورد بە ساڵانی رابردوو کەمیکردووە.
