36 ساڵ لەمەوبەر گەلەکەمان لەسەر دەستی رژێمی ستەمکاری بەعس لەژێر تایتڵی ناڕەوای (ئەنفال) دا بە هەشت قۆناغ رووبەڕوی دڕندانەترین تاوان بۆوە کە سەرەڕای کۆمەڵکوژی وبێ سەروشوێنکردنی 182 هەزار منداڵ وگەنج و پیری کورد، گشت سیمایەکی ئاوەدانیشی لە نزیکەی پێنج هەزار گوند و شارۆچکەی ناوچەکانی کوردستاندا سڕییەوە.
تاوانی ئەنفال برینێکی وەهای لەسەر دڵمان و لە کۆهزری گەلەکەماندا دروستکرد کە ئازارێکی نەبڕاوەیە و بۆ ساڕێژی ئەو برینە قووڵە، بۆ سڕینەوەی شوێنەوارەکانی ئەو کارەساتە ناخهەژێنە، پێویستە هەموو لایەکمان لە حکومەتی هەرێم وحکومەتی فیدراڵی و ئەنجومەنی نوێنەران بەوپەڕی لێپرسراوێتییەوە هەوڵەکانمان چڕتڕ بکەینەوە بۆ خزمەتکردنی هەمەلایەنە و زیاتری زیانلێکەوتوانی ئەو کارەساتە.
هەرچەندە لە ساڵی 2008 وە دادگای باڵای تاوانەکان لە عیراق کەیسی ئەنفالی وەک تاوانی جەنگ و دژە مرۆیی ناساندوە، بەڵام قەبارەی تراژیدیاکە و دەرهاویشتە و لێکەوتەکانی ئەنفال، پێویست دەکات لەسەر ئاستی نێودەوڵەتیش دیسان وەک تاوانی قڕکرنی بە کۆمەڵ و جینۆساید بناسرێت و گەلی کوردستانیش بە دابینکردنی تێکڕای مافە دەستوورییەکانی بۆ یەکجاری لە ئایندەی خۆی دڵنیا بکرێتەوە. یەکێتیی نیشتمانیی کوردستان بۆ ئەو ئامانجانەی سەرەوە بێ درێغ لە خەباتدا دەبێت.
ـ درود بۆ رۆحی قوربانیانی کۆمەڵکوژیی ئەنفال، سڵاوی ئەمەک و وەفاداری بۆ خۆراگریی کەسوکاری ئەنفالکراوان.
مەکتەبی سیاسیی
یەکێتیی نیشتمانیی کوردستان
