ئەندامێكی ئەنجومەنی نوێنەران رایدەگەیەنێت بڕیاری كۆتاییهێنان بە ئەركەكانی یۆنامی لە عیراق لەشوێنی خۆی نییە و بەپەسەندی نازانن، پێشیوایە تاكو ئێستا عیراق مەترسی تیرۆری لەسەرە و كێشەی بنەڕەتی لەنێوان پێكهاتە و لایەنە سیاسییەكاندا هەیە.
د.مەلا كەریم شوكر ئەندامی ئەنجومەنی نوێنەرانی عیراق بە كوردستانی نوێ-ی راگەیاند: ئێمە پێمانوایە داوایەكی لەوجۆرە بۆ کۆتاییهێنان بە ئەركەكانی یۆنامی لە عیراق لەشوێنی خۆیدا نییە و ناكرێت حكومەتی عیراق بیر لە هەنگاوی لەوجۆرە بكاتەوە، چونكە هێشتا ئەم وڵاتە مەترسیی تیرۆری لەسەرە و ناكۆكی قووڵی سیاسی لەنێوان پێكهاتە و لایەنە سیاسییەکاندا هەیە.
وتیشی: ئەركی یۆنامی لەهەموو جێگایەك بە عیراقیشەوە هاوكاریكردن و پاڵپشتیكردنی دەسەڵاتی جێبەجێكردنە لە ئەركەكانی خۆیدا، بۆیە بەپێویستی نازانین ئەو داوایە بكرێت.
پێیوایە: جگە لەوەی هاوكاری حكومەتە، هاوكات یۆنامی هاوكارە لە پرۆسەكانی هەڵبژاردن و چەسپاندنی بنەماكانی ئازادی و مافی مرۆڤ و هەروەها هەوڵی لەیەكترنزیكردنەوەی پێكهاتەكانی عیراق و نەهێشتنی ناكۆكییەكان دەدات.
د.مەلا کەریم شوکر تەئکیددەکاتەوە: پێویستە حكومەتی عیراق بەگوێرەی بەرژەوەندییەكانی خۆی بڕیاری پێویست بدات و رێگا بەدەستێوەردانی دەرەکی نەدات كاریگەریان لەسەر بڕیارێكی لەوجۆرە لەبارەی یۆنامییەوە هەبێت.
تەها عەبدوڵڵا