تەها عەبدوڵڵا
27 ساڵە سەرژمێریی گشتی لە عیراقدا نەكراوە، بڕیارە 29ی تشرینی دووەمی ئەمساڵ بكرێت. دوێنێش دەستەی باڵای سەرژمێریی گشتیی دانیشتووان لە هەرێمی كوردستان و عیراق بۆ هەمان مەبەست كۆبووەوە و تاوتوێی دوایین ئامادەكارییەكان بۆ سەرژمێریی گشتی، كرا.
هیچ مەرامێكی لەپشتەوە نەبێت
لە كۆبوونەوەكەدا، كە بە سەرۆكایەتیی دكتۆر دارا رەشید وەزیری پلاندانانی حكومەتی هەرێم و ئامادەبوونی ژمارەیەك وەزیر و بریكار و پارێزگارەكان و سەرپەرشتیارانی ئیدارە سەربەخۆكانی هەرێم، بەڕێوەچوو. بەوردی باس لە هەنگاوەكانی ئامادەكاری بۆ سەرژمێریی گشتی كرا بەتایبەت ئەو كۆبوونەوە و دیدارانەی لەگەڵ حكومەتی عیراق بۆ ئەو مەبەستە كراون. لەوبارەیەشەوە وەزیری پلاندانان رایگەیاندووە: پێداگریی هەرێم بۆ سەرژمێرییەكی سەركەوتوو ئەوەیە ئەنجامەكانی لە بەرژەوەندیی گشتیی دانیشتووانی عیراق و هەرێمدا بێت بەبێ جیاوازی و هیچ مەرام و مەبەستێكی سیاسی لەپشتەوە نەبێت.
د.خەلیل ئیسماعیل:
بەدووری دەزانم بكرێت
سەبارەت بەو باسە، پ.د.خەلیل ئیسماعیل مامۆستای زانكۆ و شارەزای بواری سەرژمێریی دانیشتوان، لە لێدوانێكدا بۆ كوردستانی نوێ، پێیڕاگەیاندین: بەگوێرەی ئەزموونی 20 ساڵەم لە سەرژمێریدا، بەدووری دەزانم عیراق ئەو پرۆسەیە لەمساڵدا بكات، هۆكاری ئەوەش سیاسییە و لێپرسراوانی عیراق وایدەبینن سەرژمێریی گشتی لەم كاتەدا وادەكات رێژەی راستەقینەی كورد لە هەرێم و لە ناوچەدابڕێنراوەكان دەربكەوێت، ئەوەش بەدڵی ئەوان نابێت، بۆیە بیانووی جۆراوجۆر دەدۆزنەوە تا سەرژمێریی گشتیی دانیشتوان نەكرێت.
راستی و دروستی دەردەخات
هەر سەبارەت بەو پرسە، سۆزان مەنسور ئەندامی ئەنجومەنی نوێنەرانی عیراق بەكوردستانی نوێ-ی وت: ئێمە هیچ بیانوویەك نابینین بۆ جێبەجێنەكردنی سەرژمێریی گشتیی دانیشتووان، ئەگەر حكومەت پێیوایە گرفت هەیە، ئێمە دەڵێین ئەنجامدانی سەرژمێری؛ خۆی چارەسەری ئەو گرفتانە دەكات. وتیشی: بەهۆی بارودۆخی سیاسی و ئەمنیی عیراق لە سەردەمی رژێمی بەعسدا، پێكهاتەی كۆمەڵگەی عیراقی تاڕادەیەكی زۆر گۆڕانكاری تێداكراوە و بەشێكی زۆر لەوانەی ئاوارە و دەربەدەربوون، ئێستا زۆربەیان گەڕاونەتەوە وڵات و شوێنەكانی خۆیان، بۆیە سەرژمێری؛ راستی و دروستی رێژەی دانیشتوان دەردەخات و پێویستیشە دووربێت لە مەرامی سیاسی و دەستتێوەردانی لایەنەكان.