ئەسعەد عەزیز محەمەد
لەسەر سوچی بازاڕەكەدا بینیم، نەمدەزانی كێیە؟ ناوی چییە؟ ئەوەشم نەدەزانی من بۆچی بەدوای كەوتووم ؟
باڵایەكی بەرز و قژێكی درێژ و دووچاوی شینی دەریایی وكراسێكی ڕەشی لەبەردا بوو،هێزێكی ئەفسووناوی بۆلای ئەو ژنەی ڕاكێشام،بەڵێ زۆر جوان بوو،بەڵام لەنیگایدا خەمێكی یەكجار قووڵ خۆی نمایشدەكرد،لەڕووی تەمەنەوە وادەردەكەوت شەش یان حەوت ساڵ لەمن بچوكتر بێت،من تەمەنم لەسەرووی (35) ساڵە ،هیچ گومانم لەوەدا نیە ئەو ژنە تەمەنی لەسەرووی (27) ساڵ دەبوو، ژنێكی رێكپۆش و خانومان بوو، هێڵێكی جوانی تێدا هەبوو لە ئەوانەدا نەبوو كە ڕۆژانە بەبەرچاوماندا تێدەپەڕن، هەرچەندە هەموو كاتێك جوانی ژن مەستم دەكات بەڵام ئەمجارە دەمزانی كەجوانیەكەی نەبووەتە هۆكاری ئەوەی بەدوایبكەوم، ئەوەی زۆر پەستانی خستۆتە سەر بیرو هۆش و بیركردنەوەم ئەوە بوو،نەمدەزانی بۆچی لەنێو هەموو ژنانی بازاڕەكەدا تەنها ژنێك بۆتە جێگەی سەرنجم و هەربەوەشەوە نەوەستاوم كەسەیری بكەم و بەئارەزووی دڵی خۆم تێی بڕوانم بەڵكو وەك هەرزەكارێك هەنگاو بە هەنگاو بەدوای كەوتووم. ئەوەم باشدەزانی چیرۆكێك یان مێژوویەك یان ساتێكی تەمەنی ڕابردوو، من و ئەو ژنە پێكەوە كۆ دەكاتەوە، ئەوەندە هەوڵمدا گوشارم خستە سەر شریتی تۆماری عومری ڕابردووم، هیچم بەبیردا نەهاتەوە، تا ڕاوی ئەو ساتە یان گرێچنی ئەو چیرۆكە، یان خەت بهێنم بە ژێر ئەو مێژووەدا، نەمتوانی لەبەرئەوەی هیچ شتێكم لەبارەیەوە لەخەیاڵدا نیە، چیرۆكەكەیم لەبیرچۆتەوە، زۆر دڵنیام لەوەی هێزێكی موگناتیسی بەهێز ناخمی بەرەو لای خۆی ڕاكێشاوە، دەزانم هێزێك كەلەدەسەڵاتی مندا نیە، بووەتە هۆی ئەوەی بەبێ ویستی خۆم هەنگاوەكانم بەدوای هەنگاوەكانیدا بنێم، سیحرێك بەدوای ژنەكەوە پەلكێشی كردووم ،چەند جارێك ویستم هەڵوێستێك وەربگرم و لەبەدوادا ڕۆیشتنی ئەو ژنە پاشگەز ببمەوە، هەرگیز نەمتوانی لەسەرەتادا كە بینیم من لەوبەری شەقامەكەوە بووم، پرسیارێك و زانینێكی بەشێوەی مەتەڵ لەبیرمدا سەریهەڵدا، زانینەكە ئەوەیە ئەو ژنە دەناسم، یان ڕاستتر وایە بڵێم لەڕووخساریدا شتێك دەردەكەوێت ئەو ئاماژەیەم دەداتێ كەمن ئەو ژنە بناسم ، پرسیارەكەش ئەو ژنە كێیە؟ چ پەیوەندییەك من و ئەو ژنە پێكەوە گرێدەدات؟ زانینەكە هیچ وەڵامی پرسیارەكەی نەدایەوە، پرسیارەكەش نەیتوانی ببێتە هۆی وروژاندنی ئەو زانینە تا زانینی نوێ بەرهەم بهێنێت و بەدەستەوە بدات شوێن پێیم هەڵگرتبوو بەدواییدا دەڕۆیشتم هەنگاو بەهەنگاو بەدوایەوە دەڕۆیشتم، بەدەم ڕۆیشتنەوە دەمویست هەرشتێكم بەبیردا بێتەوە، بەڵام هیچم بەبیردا نەهاتەوە، بەڵام هەركە هەنگاوی دەناو بەپەلە دەڕۆیشت، منیش یەكسەر بەدوایەوە بووم، لەو ماوەیەی كەلاپەڕە كۆنەكانی بیرەوەرییەكانم لاپەڕە لاپەڕە هەڵدەدایەوە، هیچ دەزووویەكم نەدۆزییەوە من و ئەو بەیەكەوە ببەستێتەوە، ڕۆیشت تا گەیشتە دوكانی پێلاو فرۆشێك ڕۆیشتە ژوورەوە، لەنزیك ئەو دوكانەدا كتێبخانەیەك هەبوو خۆم بەخوێندنەوەی كتێبەكانەوە یان سەیركردنی ناونیشانەكان سەرقاڵ كردبوو، هەرچەندە بەدوای كەوتبووم بەڵام نەمدەویست هەستم پێبكات و لەوە تێبگات و بزانێت من بەدوایەوەم. نزیكەی پێنج خولەك لەپێشانگەی پێلاو فرۆشەكە مایەوە، كە هاتە دەرەوە كیسێكی نایلۆنی پێبوو بەوە دەچوو جوتێ پێلاوی كڕیبێت. منیش هەر لەچاوەڕوانیدا بووم.
لەسەر سوچی بازاڕەكەدا بینیم، نەمدەزانی كێیە؟، ناوی چییە؟ ئەوەشم نەدەزانی من بۆچی بەدوای كەوتووم؟
باڵایەكی بەرز و قژێكی درێژ و دووچاوی شینی دەریایی وكراسێكی ڕەشی لەبەردا بوو، هێزێكی ئەفسووناوی بۆلای ئەو ژنەی ڕاكێشام
چەند هەنگاوێكی لەولاتر پێشانگەیەكی جل وبەرگی ژنانەی لێبوو، لەوێش چەند چركەیەك سەیری جلەكانی كرد و دواتر خۆی كرد بەژووردا. بۆ یەك دوو خولەك مایەوە دواتر هاتە دەرەوە، بەسەر شۆستەكەدا دەڕۆیشت، نازانم چاوەڕوانی ئۆقرەی بڕیبووم یان پرسیارە بێ وەڵامەكانی ناو مێشكم بوو، گوڕ و وزەی خستبووە بەر جەستەم، هێز و تینی بەهەنگاوەكانم بەخشیبوو، رۆیشتنم خێراتر كرد. زۆر لێیەوە نزیكبووم ئەمەم ڕەنگە بەو نیازەوە كردبێت تا بتوانم لەڕوواڵەت و روخساریدا درك بەو نهێنیە ببەم كە بۆچی بەدوایدا دەڕۆم، بەدەم ڕۆیشتنەوە لەلای دارتووە گەورەكەی سەر شەقامەكە ڕاوەستا لەناكاو ئاوڕی داویەوە بۆ دواوە ئەوكاتە گومانم بەوە برد هەستی بەبوونم كرد. نازانم چ مەرامێكی لەوەدابوو هەنگاوەكانی هێواش كردەوە، ماوەیەكی تر ڕۆیشت و منیش هەر بەدوایەوەم، لەپێش دوكانی مۆبایل فرۆشێك جارێكی تر ڕاوەستاو تەماشای مۆبایلەكانی ناو پێشانگەكەی دەكرد ،چەند هەنگاوێك لەولایەوە ڕاوەستام بەلا چاوێكەوە سەرنجمیدا و سەیری كردم. بەئەسپایی ڕۆیشت خۆی كرد بەكافیتریایەكدا و بەبێ بیركردنەوە دوای كەوتم، لەسەر مێزێك بەتەنها دانیشت، نازانم بەمەبەستی نزیك دانیشتن بوو یان هەر مەبەستێكی نهێنی ناو دەروونم بوو بەرامبەری لەسەر مێزێكی تر دانیشتم. ئەوەی چاوەڕوانی نەبووم ڕوویدا، لەپڕ لەجێگەی خۆی هەستاو بەرەو لام هات و بەزمانێكی پڕلەنازەوە وتی: دەتوانم لەلات دابنیشم؟
وەك ئەتەكێتی پێشوازیكردن لەهاتنی لەبەری هەستام بەخۆشحاڵییەوە فەرمووم لێكرد. سوپاسیكردم و دانیشت، لەسەرەتادا خۆی پێناساندم كەناوی ( شەنگە)یە، ویستم منیش خۆمی پێبناسێنم ئەو بە زەردەخەنەیەك و نازێكی كچانەوە پێی گوتم: «دەتناسم تۆ ناوت (هەڵۆ) یەباوكت حاجی كەریمی بەقاڵە، زۆر سەرم سوڕما لەو زانیاریانەی لەبارەی منەوە هەیبوو، زۆر لەسەر خۆو بەزمانێكی شیرین گوتی: هیچ پێت سەیر نەبێت من وتۆپێش پانزە ساڵ لەمەوبەر دراوسێ بووین،ئەوكاتە ماڵمان لەگەڕەكی سەركارێز بوو، ئەو قسەی بۆمدەكرد و منیش گوێم هەڵخستبوو بۆ قسەو باسەكانی) پەیتا پەیتا بیرەوەرییەكانم بەبیردا دەهاتەوە، ئەوەم بەیاددا هاتەوە كە شەنگە خوشكی خەندەیە، تیشكی رووناكی لەنێو مێشكم كەوتە سەر ئەو زەمەنەی پەیوەندی سۆزداریم لەگەڵ خەندە هەبوو. شەنگە بەنەبرەیەكی حوزنەوە چیرۆكی خەندەی بۆ گێڕامەوە كەچۆن شویكرد و لەگەڵ مێردەكەیدا سەری خۆیان هەڵگرت تا ڕووبكەنە هەندەران بەڵام بەداخەوە خۆی و مێردەكەی و كچە تەمەن پێنج ساڵانەكەی لەدەریای ئیجەدا خنكان، دواوشە كەلەسەر زمانییەوە دەرپەڕی هەردوو چاوی پڕبوو لەئەسرین. پاش تەواو بوونی سەرگوزشتەی خەماوی خەندەی خنكا و ئەوسا زانیم ئەوەی پەلكێشی كردم بۆ بەدواكەوتنی شەنگە ئەو خەندەیە بوو كەهاوشێوەی هەمان خەندەی لەڕووخسار و نیگای خەندە دا دەدرەوشایەوە.بەشێوەی كەسێكی تێكشكا و هەڵگری خەمی زەمەنی ڕابردوو كەوتمە سەر شەقامەكە، ئێوارە لەباوەشی تاریكیدا بێ ئەوەی بەدوای هیچ كەس بكەوم، بەتەنها ملی ڕێگام گرت و ڕۆیشتم، لەدوای خۆم تاریكیم بەجێ هێشت.
كەركوك نیسان /2024
