لاپەڕەی سەروەران
ئەفسەر و تێكۆشەری كۆچكردوو جەلال ئەحمەد خەلیل، لە دایكبووی ساڵی 1954ی شاری قەڵادزێیە، قۆناغی سەرەتایی و پۆلی دووەمی ناوەندی هەر لەو شارە خوێندووە.
ساڵی 1967 بۆتە پێشمەرگەی شۆڕشی ئەیلول لە هێزی كاوە-كەتیبەی تۆپخانە و دوای ماوەیەكیش كراوەتە فەرماندەی تۆپخانەكە، پێشمەرگەیەكی بە دەستوبرد بووە و رۆڵی گرنگی گێڕاوە، تا نسكۆی ساڵی 1975 بەردەوام بووە.
هەر لە دامەزراندنی یەكێتیی نیشتمانیی كوردستاندا پەیوەندی كردووە بە رێكخستنەوە، بەیاننامەی دامەزراندنی یەكێتیی لە ناوشاری قەڵادزێدا دابەشكردووە، ئەندامێكی چالاك و ئازای خەباتی نهێنی بووە و چەندین چالاكی گرنگی ئەنجام داوە.
شەوی 17\18/9/1976 و دوای ئەنجامدانی چالاكییەكی گەورە لەناو شاری قەڵادزێدا، لە رێگەی سەركردەی نەمر رەسوڵ مامەند و شەهید ملازم تایەری عەلی والی بووە بە پێشمەرگە و هەمان ساڵ كراوە بە فەرماندەی مەفرەزە.
جەلال ئەحمەد خەلیلی نەمر، بەهۆی ئازایی و دڵسۆزییەوە بۆ خەبات و كوردایەتی، ببووە جێگەی متمانەی پێشمەرگە و لێپرسراوانی شۆڕش، بەهۆی ئەوەشەوە چەندین پلەی پێسپێردراوە، وەك: ساڵی 1979 كراوەتە فەرماندەی كەرتی مەكتەبی عەسكەری، ساڵی 1982كراوەتە فەرماندەی تیپی 99ی بتوێن، ساڵی 1986یش كرایە لێپرسراوی گەنجینەی چەك و تەقەمەنی لە مەكتەبی عەسكەری.
بەشداریی دەیان داستانی قارەمانانەی كردووە، وەك: رزگاركردنی ناحیەی بێتواتە، بالیسان، دۆڵی خەلەكان، ناوچەی بتوێن و دەیان نەبەردیی دیكە، لە ئەنفالیشدا دانەبڕاوە و لەگەڵ هێزی پێشمەرگەدا پاشەكشەی كردووە بۆ سەر سنوورەكان و بەشدارییەكی چالاكانەی كردووە لە راپەڕینی ساڵی 1991دا.
دوای پێكهێنانی یەكەم كابینەی حكومەتی هەرێمی كوردستان و دامەزراندنی دام و دەزگاكانی دەوڵەت بەردەوام بووە لە خزمەت و ساڵی 1994 بە پلەی نەقیب لە بەڕێوەبەرایەتی ئاسایشی دهۆك دامەزراوە، دواتر گوازراوەتەوە بۆ ئاسایشی سلێمانی و لەوێ بەردەوام بووە لە خزمەتكردن تا كۆچی دواییكردووە، دواپلەشی عەمیدی ئاسایش بووە.
چەند جارێك هەڤاڵ مام جەلال خەڵاتی كردووە و ساڵی 2010ش میدالی رێزلێنانی كۆمەڵەی پێشمەرگە دێرینەكانی كوردستانی لەلایەن خاتوو هێرۆ ئیبراهیم ئەحمەدەوە پێبەخشراوە.
بەداخەوە، رۆژی 15/7/2011 كۆچی دوایی كرد و گەیشتەوە بەكاروانی هاوڕێ شەهیدەكانی.
