تەها عەبدوڵڵا
داوی ئەوەی لەمانگی پێنجی ئەمساڵ دەستكرا بە هەڵدانەوەی گۆڕێكی بەكۆمەڵ لە باكووری قەزای تەلەعفەر لە سنووری پارێزگای نەینەوا، تا ئێستا 134 رووفات دەرهێنراون. لێپرسراوانی سنوورەكەش رایدەگەیەنن: بەهۆی سەختیی شوێنەكەوە كارەكان بە سستی بەڕێوەدەچێت.
حسێن دەرمان ئەندامی مەڵبەندی نەینەوای یەكێتیی نیشتمانیی كوردستان و كەسایەتیی ئێزدی، لە لێدوانێكدا بۆ كوردستانی نوێ رایگەیاند: ماوەی دوو مانگە دەستكراوە بە پڕۆسەی هەڵدانەوەی گۆڕێكی بەكۆمەڵی سەردەمی تیرۆریستانی داعش، كە نزیكەی 500 قوربانی تێدایە و زیاتر كوردانی ئێزدی شەنگالن، لەگەڵ توركمانی شیعە و خەڵكی سنوورەكە، وتیشی: تا ئێستا نزیكەی 134 رووفات دەرهێنراون، پڕۆسەكەش بەردەوامە، بەڵام بەهۆی ئەوەی رووفاتەكان لە قووڵایی زەویدا زیندەبەچاڵكراون، كاری دەرهێنانیان سست و زەحمەتە بۆیە كاتی زیاتری دەوێت، كە پڕۆسەی هەڵدانەوەكە بە سەرپەرشتی دامەزراوەی شەهیدان و دەستەی گۆڕە بەكۆمەڵەكانی عیراق و بە هاوكاریی نوێنەری نەتەوەیەكگرتووەكان و ژمارەیەك رێكخراوی خێرخوازی بەڕێوەدەچێت.
ئەوەشی خستەڕوو كە دوای تەواوبوونی رێوشوێنەكان سەرجەم رووفاتەكان لە زێدی خۆیان بە خاك دەسپێردرێن، بەتایبەتی لە قەزای شەنگال و گوندەكانی دەوروبەری، بەوپێیەی زۆربەی ئەو شەهیدانە كوردی ئێزدین و دواتر پڕۆسەی بەخاكسپاردنی رووفاتەكانی تر بەڕێوەدەچێت.
روونیشیكردەوە كە گۆڕەبەكۆمەڵەكە دەگەڕێتەوە بۆ سەردەمی دەسەڵاتی تیرۆریستانی داعش لە پارێزگای نەینەوا و دەوروبەریدا و بەدیاریكراویش دەكەوێتە باكووری قەزای تەلەعفەرەوە.