هێمن ئەحمەد
ماوەی نۆ مانگە فەرمانبەرانی گرێبەستی ئاسایشی خۆراك كە ژمارەیان هەزار كەسە مووچەیان وەرنەگرتووە، بۆ ئەو مەبەستەش رۆژی 23/7/2024، لە بەردەم بینای پارێزگای كەركوك گردبوونەوە.
د.ئەحمەد كەركوكی:
بەدواداچوونم بۆ دواكەوتنی مووچەكانیان كردبوو، دەركەوت گرفتەكە لە وەزارەتی دارایی عیراقە و بەڵێنی چارەسەركردنیان پێدام
لەوبارەیەوە د.ئەحمەد كەركوكی ئەندامی ئەنجومەنی پارێزگای كەركوك، بەكوردستانی نوێ-ی راگەیاند: پێشووتر بەدواداچوونم بۆ دواكەوتنی مووچەكانیان كردبوو دەركەوت گرفتەكە لە وەزارەتی دارایی عیراقە و بەڵێنی چارەسەركردنی كێشەکەیان پێدام، بەڵام بەداخەوە ئێستا وەزارەتی دارایی عیراق بیانووی ئەوە دەهێنێتەوە كە لە كەركوك بۆشایی ئیداری هەیە كە ئەویش ئەوەیە كەس نییە ئیمزا لەسەر لیستی مووچەكانیان بكات.
وتیشی: نووسراو لەڕێگەی نوێنەرانی كەركوكەوە بۆ ئەنجومەنی وەزیرانی عیراق دەكەین بۆ ئەوەی لەو بابەتە بكۆڵێتەوە و چارەسەری كێشەی مووچەی كارمەندانی گرێبەستی ئاسایشی خۆراكیش بكات.