ئەمڕۆ یەکشەممە، شێخ جەعفەر شێخ مستەفا، جێگری سەرۆکی هەرێمی کوردستان، پێشوازیکرد لە یان برێم، کونسوڵی گشتیی فەرەنسا لە هەرێمی کوردستان.
لە کۆبوونەوەکەدا دوایین پێشهاتە سیاسیی و ئەمنیەکانی ناوچەکە، پەیوەندييهكانى فەرەنسا لەگەڵ عیراق و هەرێمی کوردستان، پڕۆسەی چاکسازی و یەکخستنەوەی پێشمەرگە و بەڕێوەچوونی هەڵبژاردنی پەرلەمانی کوردستان، تاوتوێکران.
هەر لەو کۆبوونەوەیەدا هەردوولا جەختیان لە بەردەوامبوون و برەودان بە پەیوەندییەکانی نێوان فەرەنسا لەگەڵ عیراق و هەرێمی کوردستان کردەوە، هەروەها یەکگرتوویی و یەکڕیزی نێوان لایەنە سیاسییەکانی هەرێمی کوردستانیان بە گرنگ زانی و هاوڕابوون لەسەر ئەوەی کە دەبێت کێشەکانی نێوان هەولێر و بەغدا بە گفتووگۆ لە چوارچێوەی یاسا و دەستوور چارەسەر بکرێت.
لە بەشێکی تری کۆبوونەوەکەدا، هەردوولا تیشکیان خستەسەر پڕۆسەی هەڵبژاردنی پەرلەمانی کوردستان و هیوایان خواست پڕۆسەکە لە کەشێکی ئارام و دیموکراسیانەدا بەڕێوەبچێت.