ئاوات كۆكەیی
تێكۆشەری ناوداری كوردستان و فەرماندەی دێرین قادر خەبات، ناوێكە لەگەڵ هەموو حەرفەكانی شۆڕشگێڕی و بەرخوداندا ئاوێتە بووە، ناوێكە لەگەڵ قەندیل و شۆڕش و هەڵوێست و نەبەزیندا دێت و بەر گوێمان دەكەوێت.
ئەرشیفەكەی مام خەبات پڕە لە نامە و نووسراوی سەركردە و فەرماندەكانی ئەوی رۆژێی شۆڕش، لەناو دێڕەكانی ئەو نامانەدا ئەوەمان چنگ دەكەوێت (قادر خەبات ئەمین و رازگر بووە، خەمخۆری پەیداكردنی چەك و تەقەمەنی بووە، كۆكەرەوەی كوڕە ئازا و بەجەرگەكان بووە، مشوورخۆری پەیداكردنی نان و پێخۆر و شوێن و پێگەی ئارام بووە بۆ تێكۆشەران و... تاد.)، بە كورتی هەرچییەكیان پێویست بووبێت نامەیەكیان ئاراستەی مام خەبات كردووە و ئیتر لێی بێخەم و دڵنیابوون، چونكە سوور دەیانزانی كە ئیتر ئەوە قادر خەباتە و كوڕێكە بۆ خەبات خوڵقاوە، بەهەق پیاوی تەنگانە و رۆژگاری سەختە، پیاوی كارقایم و خاوەن بەڵێن و هەڵوێست و ئەركە گرانەكانە، ئەگەر سەری دانابێت هەر دەبێت ئەوەی پێی سپێردراوە، جێبەجێی بكات.
خەباتنامە
قادر حەمەد مینە ناسراو بە قادر خــەبات، ساڵی 1937 لە گوندی (خەزێنە)ی بناری چیای قەندیلی باڵەكایەتی لەدایكبووە، ساڵی 1955 چۆتە ریزەكانی پارتی دیموكراتی كوردستان و دوای ماوەیەك كراوە بە لێپرسراوی رێكخراوی سەرشێخانی پارتی، ساڵی 1961 لە هەڵگیرسانی شۆڕشی ئەیلول بۆتە پێشمەرگەو چەندین پلەی پێشمەرگایەتی بڕیوە.
ساڵی 1972 پەیوەندیی كردووە بە رێكخستنەكانی كۆمەڵەی رەنجدەرانی كوردستانەوە.
چالاكانە بەشداریی شەڕەكانی ساڵی 1974ی كردووە دژی رژێمی بەعس، كاتێكیش كە لە ساڵی 1975دا بڕیاری كۆتایی هاتنی شۆڕش درا لەلایەن سەركردایەتیی شۆڕشەكەوە، مام خەبات جگە لەوەی لەگەڵ ئەو بڕیارەدا نەبوو، لەگەڵ هیچكام لەو تێكۆشەرانەشدا نەبوو كە چوونە ئێران، یان رادەستی حكومەتی عیراق بوونەوە، بەڵكوو لە قەندیل مایەوە و وەك پێشمەرگەیەكی سەربەخۆ سەنگەری چۆڵ نەكرد، ئەوەندەی پێشیكرا چەك و تەقەمەنی شاردەوە، ئەمەش دووربینیی مام خەبات دەردەخات بۆ سەرلەنوێ بەرپاكردنەوەی شۆڕش و دروستبوونەوەی مەفرەزەی چەكدار.
بە دامەزراندنی یەكێتیی نیشتمانیی كوردستان و سەرهەڵدانەوەی شۆڕشی نوێ، راستیی بیركردنەوەكەی مام خەبات دەركەوت و شۆڕشیش سودی زۆری لەو كارقایمیەی ئەو تێكۆشەرە بینی، ئەویش لەسەر داوای سەركردایەتی یەكێتی لە 14/4/1976 یەكەم مەفرەزەی پێشمەرگەی لە بناری قەندیل پێكهێنا.
قادر خەباتی نەمر، بەهۆی لێهاتوویی و قارەمانێتییەوە هەر زوو ئەركی فەرماندەیی كردنی پێشمەرگەی پێدرا، لە فەرماندەی مەفرەزەوە تا ئەوەی لە ساڵی 1979 كرایە جێگری فەرماندەی هەرێمی 7ی باڵەك، ساڵی دواتریش كرایە فەرماندەی هەرێمەكە.
دوای پێكهێنانی تیپەكانیش كراوەتە فەرماندەی تیپەكانی 74ی باڵەك و 93ی سەفین و 99ی بیتوێن، ساڵی 1988یش ئەندامی مەكتەبی عەسكەری و لێپرسراوی سەربازیی سەرسنوور بووە.
لە راپەڕینی 1991دا رۆڵێكی باڵای هەبووە لە رزگاركردنی شارو شارۆچكەكان، بەتایبەت شارەكانی هەولێر و كەركوك، لە رزگاركردنی كەركوكیشدا بەسەختی برینداركراوە.
دوای راپەڕین وەك كادرێكی سەركەوتوو و فەرماندەیەكی لێهاتوو درێژەی بە پێشمەرگایەتی داوە و چەندین پلەی سەربازیی پێدراوە، لەوانە: فەرماندەی هێزی 12ی باڵەك، كارگێڕی مەكتەبی عەسكەری و ئەندامی فەرماندەیی گشتی هێزی پێشمەرگەی كوردستان.
لەژیانی پێشمەرگایەتیشدا بەشداریی و سەرپەرشتی دەیان داستان و نەبەردیی هێزی پێشمەرگەی كوردستانی كردووە، لەوانە: داستانی كەڵەكی باڵەییان و ئیشكۆری بناری سەفین و بناری قەڵاتوكان و ماویلیان و بناری قەندیل و دۆڵی خانەقاو دەرگەڵە و وەرتێ و دەشتی هەولێر و كێوەڕشی رانیە و هەڵەبجە كە لەوەی هەڵەبجەدا بەسەختی بە چەكی كیمیایی برینداربووە.
سەرپەرشتی یەكەم هێزی كردووە كە لە هاوینی 1976دا لە قەندیلەوە بەرە و بادینان بەڕێكەوتووە.
قادر خەباتی نەمر لە ساڵی 1978دا جەنابی مام جەلال و سەركردایەتی ی.ن.ك و شۆڕشی نوێی لە برسییەتی و گەمارۆی هەردوو رژێمی بەعس و شای ئێران دەربازكردووە، هەروەها خاوەنی ئارشیفێكی گەورەی نامە و وێنە و بەڵگەنامەی شۆڕشی نوێیە.
ئەندامی هەرسێ كۆنفرانسەكانی كۆمەڵە و كۆنگرەكانی یەكەم و دووەم و سێیەمی ی.ن.ك بووە، میدالیای رێزلێنانی وەك پێشمەرگەی مەفرەزە سەرەتاییەكانی شۆڕشی نوێی پێبەخشراوە، وێڕای پێدانی چەندین میدالیا و خەڵات و رێزلێنانی تر.
لەژیانی پێشمەرگایەتییدا بەگشتی 16جار بریندار بووە.
بەهۆی بەردەوامیی لە خەبات و تێكۆشاندا ناسناوی (خەبات)ی پێدراوە.
بــــەداخــــەوە، ئێـــــوارەی رۆژی 30/9/2013، دوای ململانێیەكی سەخت لەگەڵ نەخۆشیدا، كۆچی دوایی كرد و چووە كاروانی هاوڕێ شەهیدەكانییەوە.
