ئاوات كۆكەیی
شەهید مەحمودی مامەعەزە
شەهیدی فەرماندە مەحمود عەزیز ناسراو بە مەحمودی مامەعەزە، لەدایكبووی ساڵی 1954ی گوندی (هۆرین)ی بناری بەمۆیە.
ساڵی 1976 پەیوەندیكردووە بە رێكخستنەكانی كۆمەڵەی رەنجدەرانی كوردستانەوە و ساڵی 1978 بووە بە پێشمەرگە.
لەژیانی پێشمەرگایەتیدا كەسایەتییەكی خۆشەویست و فەرماندەیەكی دیار و ناسراو بووە، چەندین پلەی پێدراوە، لەوانە: فەرماندەی مەفرەزە و كەرت و تیپ و لەشكر، بەردەوام لە سەنگەری پێشەوەی داستان و نەبەردییەكانی هێزی پێشمەرگەبووە، بەشداریی زۆر داستان و نەبەردیی كردووە، بەڵام لەهەریەك لەنەبەردی و داستانەكانی وەك: رزگاری، قەیوان- ماوەت، ئالان و حاسڵ، گرتنی سەربازگەی دوودارەو شەڕەكانی دەشتی گەرمیان و دۆڵی قەرەداغ و شاخی زەردە، رۆڵی كاریگەر و كەموێنەی بینیوە.
هەروەها لە دوای ئۆپەراسیۆنەكانی ئەنفال لەگەڵ خێزان و منداڵەكانی و مەفرەزەكەی، لە گەرمیان و ناوچەكانی قەرەداخ مایەوە و بەشێوەی پارتیزانی درێژەی بەخەباتی پێشمەرگایەتیدا.
شەهید مەحمود، خەباتگێڕو پارتیزانێكی خۆڕاگرو بەورە بوو، لەكاتێكدا ئەو سەرقاڵی خەباتی پارتیزانی بوو، كەچی لەلایەن چەند كەسێكەوە خیانەتی لێكراو لە ئەشكەوتی (دەربەندسورێن) هێرشیانكردە سەر خێزانەكەی و لەئەنجامدا هەریەك لە (قارەمانی برای و شێركۆی كوڕی و محەمەد عەلیاوەیی هاوڕێی پارتیزانی و پێشمەرگایەتیی) بەناحەق شەهیدكران و هاوسەر و منداڵەكانی دیكەیشی برینداركران، بەڵام ئەو كۆستە گەورەیە هیچ لە ورە و قارەمانێتی شەهید مەحمودی كەمنەكردەوە و تا راپەڕین لەگەرمیان و قەرەداخ مایەوە.
لە راپەڕینی ساڵی 1991دا رۆڵی بەرچاوی هەبووە لە رزگاركردنی بناری بەمۆ و دەربەندیخان و شاری خانەقیندا.
شەهید مەحمود وەكچۆن لە خەباتی شاخ و پارتیزانیدا پێشڕەوبوو، لەخەباتی شاریشدا كادرێكی ماندونەناس و دڵسۆزبووە، ساڵی 1993 هەوڵ و ماندوبوونێكی زۆریدا تا توانی بەهاوكاری حكومەت هێڵی كارەبا بگەیەنێتە زۆرێك لەگوندەكانی بناری بەمۆ.
لەسەر دەستی ئەو چەندن كێشەی گەورەی كۆمەڵایەتی ناوچەكە كۆتایی پێهاتووە، هەر لەبەر ئەو دڵسۆزی و مرۆڤدۆستییەی بوو لەلایەن دانیشتوانی بناری بەمۆوە بە سەرۆك عەشیرەتی (شەرەفبەیانی) هەڵبژێردرا و ئەویش تا دواساتاكانی ژیانی ئەوشەرەفەی بە دڵسۆزی و ئەمانەت و لەخۆبوردووییەوە پاراست.
بەداخەوە، رۆژی 12/10/1996 لەناوچەی (سەرتەك)ی زێدی باوباپیرانی، شەهیدكرا و چووە كاروانی سەروەرانەوە.
شەهید خاڵەبەكر كەڵەكنی
شەهیدی فەرماندە ئەبوبەكر عەلی قادر ناسراو بە خاڵەبەكر كەڵەكنی، لە دایكبووی ساڵی 1964ی خانەوادەیەكی نیشتمانپەروەر و شۆڕشگێڕی گوندی (كەڵەكن)ی نزیك سلێمانییە، هەر لەگوندەكەیان چۆتە قوتابخانە و تاپۆلی سێیەمی ناوەندی خوێندووە.
ساڵی 1978 پەیوەندیكردووە بە رێكخستنەكانی كۆمەڵەی رەنجدەرانی كوردستان، یەكێك بووە لەو ئەندامانەی رێكخستن كە وەك پێشمەرگەی ناوشار چالاكی نواندووە.
ساڵی 1984 خەباتی شار و شاخی پێكەوە گرێدا و بووە پێشمەرگە لە تیپی پارێزگاریی مەڵبەندی یەك، ساڵی 1985 لەسەر داوای خۆی گوازراوەتەوە بۆ تیپی 31ی سلێمانی و ماوەیەكیش لە دەستەی پارێزگاریی سكرتێری گشتی یەكێتیی نیشتمانیی كوردستان بووە.
لە دوای ئۆپەراسیۆنەكانی ئەنفال لە ساڵی 1988دا، یەكێك بووە لە پێشمەرگە پارتیزانەكانی رەتڵی شارباژێڕ و سەرپەرشتیی مەفرەزەیەكی كردووە، لەلایەن هەڤاڵ مام جەلال-ەوە میدالیای زێڕینی پارتیزانیی پێ بەخشراوە.
لەژیانی پێشمەرگایەتیدا بەشداریی چەندین داستان و نەبەردیی قارەمانانەی كردووە و دووجاریش بەسەختی بریندار كراوە.
بەشداریی بەرچاوی هەبووە لە راپەڕینی ساڵی 1991 بەتایبەت لە شارەكانی سلێمانی و كەركوك و ناوچەكانی دەورووبەریان.
لە دامەزراندنی حكومەتی هەرێمی كوردستاندا كرا بە ئەفسەر لە فەوجی یەكی پارێزگای سلێمانی و پاشان كرا بە لێپرسراوی میحوەرێك لە سنووری شاری سلێمانی.
بەگشتی لە دوای راپەڕین چەندین ئەرك و لێپرسراوێتی گرنگی پێ سپێردراوە و دڵسۆزانە جێبەجێی كردوون، دوا پلەشی فەرماندەی لەشكر بووە.
بەداخەوە، شەوی 14\15/10/1997 لە گوندی (ئاقوبان)ی سنووری هیران و نازەنین، شەهیدكرا.
ساڵی 1992 لەگەڵ خاتوو (سروە) چۆتە ژیانی هاوسەرییەوە، خاوەنی كچێك و دوو كوڕە، ساوێن، شاهێن، خاڵە.
منداڵی سێیەمی بەماوەیەكی كەم لە دوای شەهیدبوونی خۆی هاتۆتە دنیاوە، بۆیە لەخۆشەویستی باوكی ناونراوە (خاڵە).
