لە میدیای تورکییەوە

پاشماوەی قاعیدەیەكی سەربازی لە حەسەن كێف دۆزرایەوە

 

لەكاتی ئەو هەڵكۆڵینە شوێنەوارانەی كە لە ناوچەی حەسەن كێفی باتمان ئەنجامدراوە، وێرانە پێكهاتەیەكی سەربازیی تەمەن 1600 ساڵ دۆزرایەوە.
لە قەڵای حەسەن كێف كە دەكەوێتە قەزای حەسەن كێف، یەكێكە لە شوێنەوارە كۆنەكانی مێژووی مرۆڤایەتی، بەشی مێژووی هونەر لە زانكۆی ماردین، كە بەردەوامە لەسەر كنە و پشكنینەكانی، پێكهاتەیەكی سەربازیی دۆزییەوە كە دەگەڕێتەوە بۆ سەردەمی رۆمانەكان.
لە كاتی هەڵكۆڵینە شوێنەوارییەكان كە بۆ یەكەمجار لە ساڵی 1984 لە حەسەن كێف دەستی پێكردووە، پاشماوەی كەلتوری جۆراوجۆری سەردەمی ئاشوورییەكان، ساسانییەكان، سەردەمی بیزەنتینییەكان، سەردەمی چوار خەلیفەی ئەمەوی، عەباسی، حەمدانی، ئەیوبی، ئیلخانی و سەردەمی عوسمانی و كۆمارییەكان دۆزراونەتەوە.
لەنێو ئەو دۆزراوانەی كە دەستنیشانكراون، ساڵی پار فیگەرێكی ئەسپی تێراكۆتا لە سەردەمی ئاسن و قاپێكی چاككەرەوەی گەستنی سەگ و پێوەدانی دووپشك و مار دۆزراونەتەوە
ئاژانسی ئەناتۆلیا

بەستنی كۆنفرانسی ئایندەی فەلەستین

كۆنفرانسی ئایندەی فەلەستین كە دوێنێ 15ی ئۆكتۆبەر لەلایەن پارتی داد و گەشەپێدانەوە رێكخرا و بڕیارە ئەردۆغان ئامادەی بێت، تێیدا باس لە داهاتووی فەلەستین دەكرێت و راستەوخۆ بە زمانەكانی توركی، ئینگلیزی و عەرەبی پەخش دەكرێت.
سیركایا جێگری ئاكەپە رایگەیاند: وەزیرەكان، دیپلۆماتكارانی نێودەوڵەتی، باڵیۆز و سەرۆك و نوێنەرایەتییەكان و هەروەها ئەندامانی باڵای پەرلەمان و سەرۆكی كۆمیسیۆنەكانی نەتەوە یەكگرتووەكان و یەكێتیی ئەوروپا بەشداری كۆنفرانسەكە دەكەن.
سیركایا بە ئاماژە بەوەی كە لە یەكەم دانیشتنی كۆنفرانسەكەدا باس لە داهاتووی فەلەستین و دیپلۆماسی دەكرێت،  رایگەیاند: وەزیری دەرەوەی توركیا و وەزیری دەرەوەی ئوردن وتار پێشكەش دەكەن، دواتر لە چەند دانیشتنێكدا باس لە جەنگی غەززە و چۆنیەتی چارەسەركردنی كێشەی فەلەستین دەكرێت لە رووی یاسای نێودەوڵەتییەوە.
ئاكشەم

ئەردۆغان بۆ رۆژئاوا:
كەی ئیسرائیل دەوەستێنن؟

 
رەجەب تەیب ئەردۆغان سەرۆك كۆماری توركیا دوای كۆبوونەوەی ئەنجومەنی وەزیران ئاماژەی بەوەدا، ئەو ئاگرەی بەهۆی هێرشی ئیسرائیلەوە بۆ سەر غەززە داگیرساوە، لەلایەن حكومەتی ئێستاوە بە بیروبۆچوونی كۆنەپەرستی ئایینییەوە بە تەواوی بە ناوچەكەدا بڵاوبووەتەوە، ئەردۆغان وتی، «دواین هێرشەكانی ئیسرائیل بۆ سەر لوبنان دەریخست كە نیگەرانییەكانمان چەندە رەوایە». ئەردۆغان بە ئاماژەدان بە هێرشەكانی ئیسرائیل بۆ سەر هێزەكانی نەتەوەیەكگرتووەكان، پرسیاری لەوە كرد ئایا كاتی وەستاندنی ئیسرائیل نەهاتووە؟ راشیگەیاند: نەتەوەیەكگرتووەكان نەیتوانی سەربازەكانی خۆی بپارێزێت، دەركەوت كە چەند بێدەسەڵاتە.
  سەبارەت بە ریفۆرمی دەستوریش، ئەردۆغان تەئكیدی كردەوە، ئەوان دەیانەوێت بەشێكی ئەو ماددانە لابەرن كە كودەتای سەربازیی 12ی ئەیلولی 1980 دایناون و ئەوان بە هیچ شێوەیەك دەستكاری 4 ماددەی یەكەمی دەستوور ناكەن، كە گوزارشت لە ناسنامە و بنەماكانی جمهوریەت دەكاتەوە. 
یەنی شەفەق

 

״زوو یان درەنگ، ئیسرائیل و توركیا بە شەڕ دێن״

ئایدن ئۆنال سیاسەتمەدار و پەرلەمانتاری پێشووی توركیا، پێی وایە «ئەو دەستدرێژییە بەدخوازانەی ئیسرائیل كە دەیان ساڵە لە ناوچەكەدا بەردەوامە، بە ناچاری زوو یان درەنگ شەڕ و ململانێی چەكداری لەگەڵ توركیا بەدوای خۆیدا دەهێنێت».
ئۆناڵ لە وتارێكیدا لە رۆژنامەی یەنی شەفەق رایگەیاندووە: ئەردۆغان لە كۆبوونەوەی پەرلەمانتارانی ئاكەپە لە 15ی ئایاردا رایگەیاندووە كە «حەماس لە غەززە نوێنەرایەتیی هێڵی پێشەوەی بەرگری لە ئەنادۆڵ دەكات».
هەروەها لە وتارەكەیدا بەبۆنەی كردنەوەی ساڵی سێیەمی خولی یاسادانانی بیست و هەشتەمین لەبەردەم پەرلەماندا، ئەم لێدوانەی فراوانتر كرد و هۆشداریدا لەوەی ئیسرائیل تەماحی خاكی توركیا دەكات، مەودای نێوان توركیا و ئیسرائیلیش لە ئەگەری داگیركردنی لوبناندا كەم دەبێتەوە بۆ 170كیلۆمەتر، ئەوكاتەیش ئیسرائیل  ناوەستێت.
توركپرێس