لدویڤ ئامارێن ل دەزگەهێن میدیایێ دهێنە بلاڤكرن، بتنێ رێژا 30 % ژ ئاوارەیێن شنگالێ ڤەگەریاینە سەر دەڤەرێن خوە و ئەڤێن مایی، پڕانییا وان دناڤ كەمپاندا دژین و بەشێ مەزنێ وان ل سنوورێ پارێزگەها دھوكێ و ئیدارا سەربەخۆییا زاخۆدانە و دڤان 10 سالێن بوریدا، نە ل وەرزێ زڤستانێ چادر دشێت وان ژ سرۆسەرمایێ بپارێزیت و نە ژی ل وەرزێ هاڤینێ چادر دشێت وان ژ گەرما هاڤینێ بپارێزیت. ئەگەر پەیوەندیێ ب لایەنێن حكومی ژی بكەی، دێ بێژن كارئاسانی بۆ هەمی ئاوارەییان هاتیەكرنێ، كو ڤەگەرن سەر دەڤەرێن خوە و رێكخراوێن بیانی ژی ب هەمان شێوە كارئاسانییان دكەن بۆ هەر كەسێ حەزا ڤەگەڕیانێ هەبیت، د بەرامبەردا ئاوارەیێن دناڤ كەمپاندا ژیانێ دكەن، گازندێ ژ وێ چەندێ دكەن كو هێشتا سەقامگیرییا شنگالێ نە یا پاراستییە و ژبەر هێزێن جودا یێن ل وێ دەڤەرێ هەین، ژ روویێ ئەمنیڤە مەترسیێن خوە هەنە و ژروویێ ژیانكرنێ ژیڤە، ئاستێ خزمەتگوزارییان گەلەك یێ كێمە. وەك دهێتە زانین ژی، ئێك ژ ئەگەرێن نەڤەگەریانا خەلكێ شنگالێ بۆ سەر دەڤەرێن خوە، دزڤریتە بارێ نە سەقامگیریێ دەڤەرێ و نەبوونا ئیدارەیەكا رێڤەبرنێ، ئەڤە ددەمەكیدا پشتی دەستبكاربوونا ئیدارا نو یا نەینەوا، گوھوڕانكاری بۆ پوستێ 20 قایمقام و رێڤەبەرێن ناحیێن نەینەوا هاتیە ئەنجامدان و دناڤدا ژی، قایمقامەكێ نوی بۆ شنگالێ هاتیە دەستنیشانكرنێ، بەلێ تا نوكە ئەو قایمقامە دەستبكارنەبوویە، ئەڤە د دەمەكیدایە هەر ژ سالا 2017ێ دوو ئیدارە ل شنگالێ دروست ببوون و دوو قایمقام بۆ هاتبوونە دانان، ئێك ل دھوكێ بوو و ئێك ل شنگالێ و پرسیارا بەردەواما لدەف خەلكێ شنگالێ دروست دبیت، ئایا تا كەنگی دێ چارەنڤیسێ وان و خێزانێن وان دناڤ چادراندا مینیت؟
ئایا دێ كەنگێ دشێن ڤەگەڕنە سەر ژیانا خوە ل دەڤەرێن خوە و ژیانا خوە یا ئاسایی و بێ ترس بەنە سەر؟!
