.jpg)
ئا: سدیق عه‌واڵی
تیپی تۆپی پێی پێشكه‌وتووانی یانه‌ی پێشمه‌رگه‌ی سلێمانی، كە له خولی نایابی یانه‌كانی عێراقدا به‌شداره، ئه‌نجامی چه‌ند یارییه‌كی قوناغی یه‌كه‌می وه‌ك پێویست نه‌بووه، بەڵام تا راده‌یه‌ك یارییه‌كانی ئه‌م دواییه‌ی ئاست و پلانی یاریكردنی هه‌نگاوی باشتری بڕیووه و ئه‌نجامه‌كانی دڵخۆشكه‌رن، بۆ زیاتر ئاگاداربوون له ئاستی تیپه‌كه و پلانی داهاتووی یاریكردنیان، ستادیۆم چاوپێكه‌وتنێکی له‌گه‌ڵ (رێباز سدیق) راهێنه‌ری تیپه‌كه کردووە.
* ئاماده‌كاریی تیپه‌كه‌تان له چ ئاستێكدایه؟
_ به‌وپێیه‌ی لەم خوله‌كه‌دا یانه‌كان له كێبڕكێی به‌هێزدان و پێویستیان به پاڵپشتیی دارایی هه‌یه، پار ئێمه له روی خەرجكردنی پاره‌وه سێیه‌م یانه بووین، به‌ڵام له ئێستادا چوارده‌یه‌مین یانه‌ین له‌و رووه‌وه، بۆیه له ماوه‌ی گواستنه‌وه‌ی زستانه‌ی یاریزاناندا رووبه‌رووی كێشه بووینه‌وه و حه‌وت یاریزانمان دوورکەوتنه‌وه، نه‌مانتوانی یاریزانی دیكه بە بۆندی گه‌وره بهێنینه ریزی تیپه‌كه‌وه.
* ئه‌و یاریزانانه‌ی كه دوورخرانه‌وه، چۆن شوێنیان پڕكرانه‌وه؟
_ له‌راستیدا، زۆر یاریزانی به‌توانا و به‌هره‌مه‌ندی كوردمان هه‌ن كه به‌شداری خوله‌كانی كوردستانیان كردوه، به‌چه‌ند یاریزانێكی لاوان و پیشكه‌وتووانی خۆمان، پێكهاته‌ی تیپه‌كه‌مان تۆكمه‌تر كردوه و بڕە پاره‌یه‌كیش بۆ یانە‌كه گه‌ڕاوه‌ته‌وه.
* چه‌ند یاریزانی پیشه‌گه‌ر له‌ریزی تیپه‌كه‌تاندا هەن؟
_ دوو یاریزانی پیشه‌گه‌ر و سێ یاریزانی عه‌ره‌ب له‌ریزی تیپه‌كه‌ماندا هەن، ئه‌وانی دیكه‌ش یاریزانی به‌توانا و لاو و به‌هره‌مه‌ندی خۆمانن، هه‌ر بۆیه به تواناكانیان زۆر دڵ خۆشم و به‌پشتیوانی خوا داهاتووی باش چاوه‌ڕوانیان ده‌كات، هه‌روه‌ها یانه‌ی پێشمه‌رگه خۆشی قوتابخانه‌ی پێگه‌یاندنی ده‌یان یاریزانی به‌توانایه و له‌و یاریزانانه‌ش سوودمان وه‌رگرتووه.
* به‌رنامه‌ی مه‌شق و راهێنانه‌كانتان چۆنە؟
_ چه‌كی به‌هێزی تیپه‌كه‌مان، مه‌شق و راهێنانه و ئێمه له پلانێكی سێ ساڵه‌داین، ته‌نها كارمان له‌سه‌ر ئه‌نجامه‌كان نییه، به‌ڵكو ده‌مانه‌وێت بۆ سێ ساڵ سیستمێكی یاریكردنی تایبەت بە خۆمان دروست بكه‌ین و چه‌ند یاریزانێکی كورد بونیادبنێین، هه‌ر بۆیه ریتمی پلان و كاركردنی یانه‌كه وایكردوه كه زۆربه‌ی یانه‌كانی دیكه چاویان له سه‌ر یاریزانانی تیپه‌كه‌مانبێت.
* چۆن ده‌ڕواننه ئاستی یانه به‌شداره‌كانی خوله‌كه؟
_ زۆربه‌ی یانه‌كان به دوو پێكهاته‌ی ئاماده‌كراوەوه ده‌بینرێن، جگه له پێكهاته‌ی سه‌ره‌كی بۆ یاریكردن، هه‌ر یانه‌یه‌ك پێكهاته‌ی یه‌ده‌گی هه‌یه، ئه‌مه وێڕای نرخی هه‌ر یاریزانێك كه له‌سه‌روو چه‌ند ملیۆن دینارێكه‌وه‌یه و زۆر جاریش هه‌ر یاریزانێك دێته خواره‌وه بۆ خولی نایاب، یانه‌كان به به‌رزترین بڕی بۆند كێبڕكێمان له‌گه‌ڵ ده‌كه‌ن.
* له كام هێڵی یاریكردندا گرفتتان هه‌یە؟
_ راسته به دوورکەوتنه‌وه‌ی دوو یاریزانی هێرشبه‌ر و یه‌ك به‌رگریكار، كێشه بۆ ئه‌و دوو هێڵەمان دروست بوو، به‌ڵام ئێستا تا راده‌یه‌كی باش به یاریزانانی كورد ئه‌و كێشه‌یه‌مان چارەسەر کردووە و نه‌مانهێشتووه زۆر كاریگه‌ری هەبێت.
* وه‌ك پێویست یانه‌كەتان،پاڵپشتی و هاوكاریتان ده‌كات؟
_ یانه‌كه‌مان به‌ته‌واوی پاڵپشت و هاوكارمانن، چ له كاتی بردنه‌وه بوو بێت یاخود دۆڕاندن، ئه‌وان به‌رده‌وام پاڵپشتیمان ده‌كه‌ن، خۆیان ده‌زانن كه به‌و بارودۆخه‌و توانا داراییە كه‌مه‌وه كێبڕكێی یانه به‌هێزه‌كانی عێراق ده‌كه‌ین، ئومێده‌وارم له یارییه‌كانی داهاتوودا تیپه‌كه‌مان ئه‌نجامی باش به‌ده‌ستبهێنێت.
* دوا په‌یامت چییە؟
_ زۆر سوپاستان ده‌كه‌م بۆ ئه‌م به‌سه‌ركردنه‌وه‌و پشتگیریه به‌رده‌وامه‌ی كه له‌گه‌ڵ تپه‌كه‌ماندا هه‌تانه و به‌رده‌وام له ناو یاریگاكاندا ده‌بینرێن.
پڕۆفایلی راهێنه‌ر:
_ رێباز سدیق ساڵح-له دایكبووی سلێمانی 1992.
_ ساڵی 2008 چووه‌ته تیپی تازه‌پێگه‌یشتووانی پێشمه‌رگه.
_له یانه‌كانی نه‌ورۆز و ئاشتی یاریی كردوه.
_ به‌هۆی خوێندنه‌وه، چه‌ند جارێك له‌یاریكردن دابڕاوه.
_ وه‌رزی (2023_2024) پۆستی راهێنه‌ریی تیپی یانەی پێشمه‌رگه‌ی سلێمانی وه‌رگرتوه.
.jpg)
