نزار ژاژڵەیی
ماوەی نزیکەی نۆ ساڵ لەگەڵ ھێرۆخان لە نزیکەوە کارم ئەکرد لە تەلەفزیۆنی خاک وەک بێژەر، بۆ ئەڵێم لە نزیکەوە، چونکە ڕۆژانە خۆی ئەھاتە لامان و تێبینی و سەرنجی ئەدا بەھەموان، ھەر لە بەڕێوبەرەوە تا ھەموو کارمەندەکان، ھەمیشە پێی ئەوتین ھەر شتێک لە بەرژەوەندیی خەڵکە و لە ھەر شوێنێک شتێکی نا ڕاستان بینی بەرنامەی لەسەر بکەن و بەدواداچونی بۆ بکەن. نموونەی بەرنامەی بەرنامە و بەرنامەکانی تایبەت بە کێشەی ھاووڵاتی کە زۆر ھاوڕێمان ئامادە و پێشکەشی ئەکرد و ھێرۆخان زۆر پشتیوانی لە بەرنامەکان ئەکرد.
گۆڤاری خاک یەکێک بوو لەو ئاوێنانەی کە هێرۆ خان زۆر سەیری دەکرد و زۆر خەیاڵ و ئامانجی خۆشی تیا ئەبینییەوە، هەر لەبەر ئەوەش هەمیشە لە یەکەم لاپەڕەی خاکدا هەموو جارێک وتارێکی تایبەت بەو کاتەی تیادا ئەنووسی کە پێویست بوو، تەنانەت لە یەکێک لە ژمارەکانی خاکدا هێرۆخان بە کاک ئاکۆ غەریب و برادەرانی وتبوو لەم ژمارەیەدا هیچ شتێک نانووسم و با ئەو لاپەڕەیە بە سپێتی بمێنێتەوە چونکە ئەوەندە کێشە و داواکاری و نادادی هەیە نازانم لەسەر کامیان بنوسم. ھەروەھا زۆر پشتیوانی گەنجان و لاوان و منداڵان و ژنان و ھونەرمەندان و زۆربەی چین و توێژەکانی تریش بوو، نموونەی سەنتەری گەنجان و مناڵپارێزی کوردستان و ھاوکاری گرووپە ھونەریەکان بوو، دەزگایەکیشی دانابوو بۆ ھاوکاری ئەو کەسانەی کە نەخۆشبوون و لە ناو ھەرێمی کوردستان یان لە دەرەوەی کوردستان پێویستیان بە چارەسەر ھەبوو، هاوکاریی دەکردن.
راگەیاندنی زۆر خۆش ئەویست و ھەمیشە ئاگای لێی بوو، پشتیوانی ئازادی کاری ڕاگەیاندنی ئەکرد،
ژینگەشی زۆر خۆش ئەویست، ھەمیشە پشتیوانی ئەوانە بوو کە گرنگییان بە سەوزکردنی کوردستان ئەدا.
پارێزەرێکی گەورەی ئەرشیفی شۆڕش و نەبەردیەکانی ھێزی پێشمەرگەی کوردستان بوو. زۆربەی وێنە و ڤیدۆکان ھێرۆخان تۆماری کردون.
گرنگی زۆری ئەدا بە رێزگرتن و خزمەتکردنی خەڵکانی بە تەمەن، ھەر لەبەر ئەوەش خانەی بەساڵاچوانی دروستکرد بۆ خزمەتکردن و حەوانەوەی ئەو کەسانەی کە شوێنی حەوانەوە و توانایان نییە. مووچەی بۆ سەدان کەس بڕیبۆوە کە پێویستیان بە ھاوکاری بوو.
زۆربەی کات گوێی ئەگرت و زۆر ورد و بە دیقەت بوو، ھەوڵی ئەدا بۆ چارەسەری کێشەکان. زۆر بە رەحم و عاتفی بوو، بە نەخۆشی و مردنی ھەموو کەسێک زۆر بێتاقەت ئەبوو بەتایبەت ئەو کەسانەی کە بەشێوەیەکی ناھەق ئازار ئەدران جا بیناسینایە یان نا،
ئەمانە و سەدان سیفاتی جوان و بەخشش و ئینسانیانەی ھێرۆخان، وای لێ کردبوو ھەموان پێیان دەوت (دادە ھێرۆ).
لێرەوە پێی ئەڵێم دادە ھێرۆ، ھیوادارم سەلامەت و تەندروست بیت، تۆ زۆر ھاوکاری ھەموانت کرد بەڵام بەداخەوە رەنگە ئێستا ھەمومان جگە لە وەفا و خۆشەویستی بۆ تۆ ھیچمان پێ نەکرێت. زۆر شتی باش و جوان و مرۆڤانە لە تۆو سەرۆک مام جەلال فێربوین، ھیوادارم ھەموان کەمێک لەئێوە وەربگرین و بتوانین خزمەتی پێ بکەین.
سڵاو لە خەباتی شاخت.
سڵاو لە مێژوی خزمەتت بە مێژوویی شۆڕشی نوێ.
سڵاو لەو ھەموو خزمەتەی کە بە گەنجان و ڕاگەیاندن و مناڵان و بەتەمەنەکان و ھونەرمەندان و کچان و ژنان و ھەموانت کرد،
ھیوادارم بەسەلامەتی و تەندرسییەکی باشەوە بگەڕێیتەوە بۆ ناو کوڕ و کچەکانت، چونکە تۆ ھەمومانت بە کوڕ و کچی خۆت ئەزانی.
بێ سەرۆک مام جەلالی و بێ تۆییمان زۆر پێوە دیارە. بیرت ئەکەم.
