ئا: فاروق سه‌عید حه‌سه‌ن
زۆربه‌ی ئه‌و قه‌رزانه‌ی عیراق كردوویه‌تی بۆ خه‌رجیی به‌كاربردن بووه، له‌بری ئه‌وه‌ی له وه‌به‌رهێناندا به‌كاری بهێنێت، له راستیدا خه‌رجیی له به‌كاربردندا هیچ به‌شدارییه‌كی نابێت له باشتركردنی تێكڕای به‌رهه‌می ناوخۆییدا
مه‌نار ئه‌لعوبێدی سه‌رۆكی دامه‌زراوه‌ی ئاینده‌ی عیراقی تایبه‌ت به شیكاریی ئابووری ئاشكرایكرد، قه‌رزی ناوخۆیی عیراق ته‌نیا له ماوه‌ی یه‌ك ساڵدا گه‌یشتۆته 13 تریلیۆن دینار و چاوه‌ڕوان ده‌كرێت كێشه‌یه‌كی ئابووریی گه‌وره‌ی لێبكه‌وێته‌وه، چونكه ده‌كاته %4ی تێكڕای به‌رهه‌می ناوخۆیی و چاره‌سه‌ری كێشه‌كه‌ش پێویستی به ویستێكی سیاسی به‌هێز و پلانی ئابوورییانه‌ی درێژخایه‌ن هه‌یه.
ئه‌و بڕه قه‌رزه‌ی عیراق له 2024دا له ناوخۆی وڵاتدا قه‌رزیكردووه، له كۆی قه‌رزه ناوخۆییه‌كانی عیراق بۆ ساڵه‌كانی 2020 تا 2023 زیاتره، له‌به‌ر ئه‌وه به ئاستێكی مه‌ترسیدار داده‌نرێت.
قه‌رزی گشتیش زیاد ده‌كات
به وته‌ی سه‌رۆكی دامه‌زراوه‌ی ئاینده‌ی عیراق، ئه‌م به‌رزبوونه‌وه‌یه‌ی ئاستی قه‌رزه ناوخۆییه‌كان، وایكردووه قه‌رزی گشتیی عیراقیش له‌گه‌ڵ خۆیدا به‌رز بكاته‌وه و ئێستا تێكڕای قه‌رزه‌كانی سه‌ر عیراق گه‌یشتۆته %25ی تێكڕای به‌رهه‌می ناوخۆیی، هه‌رچه‌نده له زانستی ئابووریدا ئه‌و رێژه‌یه له قه‌رز ئاساییه، به‌ڵام ئه‌وه‌ی كه ئاسایی نییه ئه‌وه‌یه، ئه‌گه‌ر قه‌رزه‌كانی سه‌ر عیراق هه‌موو ساڵێك به‌و راده‌یه زیاد بكات، له‌گه‌ڵ ئه‌گه‌ری دابه‌زینی نرخی نه‌وت له داهاتوودا، له‌وانه‌یه ببێته هۆی ئه‌وه‌ی قه‌رزه‌كانی سه‌ر عیراق بگاته %60ی تێكڕای به‌رهه‌می ناوخۆیی، ئه‌وه‌ش ئاستێكی مه‌ترسیداره و كاریگه‌ریی گه‌وره‌ی ده‌بێت له‌سه‌ر پۆلێنی متمانه‌ی عیراق له‌سه‌ر ئاستی نێوده‌وڵه‌تی.
ئاراسته‌كردنی قه‌رز
مه‌نار ئه‌لعوبێدی جه‌ختی له‌سه‌ر ئه‌وه كرده‌وه، كاتێك قه‌رز ده‌كرێت ده‌بێ به ئاراسته‌یه‌كی پۆزه‌تیڤانه به‌كار بهێنرێت، ئێستا كێشه‌كه‌ی عیراق له‌وه‌دایه، كه زۆربه‌ی ئه‌و قه‌رزانه‌ی كردوویه‌تی بۆ خه‌رجیی به‌كاربردن بووه، له‌بری ئه‌وه‌ی له وه‌به‌رهێناندا به‌كاری بهێنێت، له راستیدا خه‌رجیی له به‌كاربردندا هیچ زێده‌باییه‌ك ناخاته سه‌ر ئابووریی نیشتمانی و هیچ به‌شدارییه‌كیشی نابێت له باشتركردنی تێكڕای به‌رهه‌می ناوخۆییدا.
سه‌رچاوه: سۆمه‌رییه نیوز
