شەهیدی نەمر عوسمان مەجید ناسراو بە عوسمان نەمەڵی، لەدایكبووی ساڵی 1956ی گوندی (نەمەڵ)ی بناری شارەزوورە، ساڵی 1978 پەیوەندیی كردووە بە رێكخستنەكانی كۆمەڵەی رەنجدەرانی كوردستانەوە، وەك تێكۆشەرێكی خەباتی نهێنی رۆڵی گرنگی گێڕاوە لەو سەردەمەدا، بەتایبەت دوای شاڵاوەكانی ئەنفالی 1988 هێندە ئازا و چاونەترس بووە ناسناوی (نەبەز)یان پێ بەخشیوە.
هەمان ساڵ لە تیپی سێی سوپای رزگاری كوردستان(سرك) بووە بە پێشمەرگە و لێپرسراوێتیی بەشێكی تیپەكەی لە ئەستۆ بووە.
بەشداریی كاریگەرانەی هەبووە لە چەندین چالاكی و كاری رێكخراوەییدا و رۆڵی بەرچاویشی هەبووە لە گەیاندنی پێداویستییەكانی وەك: تەقەمەنی و خۆراك و دەرمان بۆ پارتیزانەكانی سنووری قەرەداخ و شارەزوور.
لە راپەڕینی ساڵی 1991دا بەشداریی بەرچاوی هەبووە، هەروەها خەمخۆرانە هەوڵیدا بۆ پاراستنی بەڵگەنامە و كەلوپەلەكانی دام و دەزگاكانی رژێم و لەو رووەشەوە جێگە دەستی دیاربوو.
ساڵی 1994 كراوەتە فەرماندەی تیپ لە سنووری مەڵبەندی 9ی شارەزوور و ساڵی 1999 كراوەتە جێگری فەرماندەی هێزی سێی لە شكری شارەزوور، دەرچووی خولی دووەمی فەرماندەیی بوو لە كۆلێژی سەربازی قەڵاچوالان.
لە قۆناغەكانی خەباتیدا بەشداریی چەندین نەبەردیی كردووە و دووجاریش بە سەختی برینداركراوە.
بەداخەوە، 4\5/10/2000 لە (كورتەك)ی بناری قەندیل لە شەڕێكی نەخوازراودا، شەهیدكرا.
