رۆژی 31 ئابی 1996، واتا ئەو رۆژەی دەبابەكانی بەعس پەرماری هەولێریاندا و شكۆی حكومەتی هەرێم و پەرلەمانی كوردستانیان شكاند، ئەوانەی بەرگرییان كرد و رووبەڕووی لەشكری بەعس بوونەوە، پێشمەرگەی خاكپارێز و دڵسۆزی راستەقینەی پیرە هەولێر و كوردستان بوون، ئەگەرچی پیلانەكە ناوخۆیی و دەرەكی بوو، ئەگەرچی هێرش و پەلامارەكە بەربڵاو و ترسناك بوو، بەڵام هێزی پێشمەرگەی كوردستان، پارێزەری راستەقینەی كورد و كوردستان تا دواسات و ئەوەی لەتوانادابوو كردیان بۆ بەرگریكردن لە پایتەخت و لە شكۆی دامەزراوەكانی حكومەتی هەرێم و دەسەڵاتە خۆماڵییەكەی، لەو پێناوەشدا ژمارەیەكی زۆر لە كوڕانی ئازاو دلێر، لەو پێناوەدا گیانی خۆیان بەخشی و شەهیدكران.
یەكێك لەو شەهیدانە، تەها دێمەكاری بوو، كەسێكی هێمن و خۆشەویست و بە ئەمەك، دڵسۆزی رێبازی مام جەلال و كوردایەتی و دۆزی رەوای گەلەكەی بوو، گۆشكراوی خانەوادەیەكی نیشتمانپەروەر و خاوەن قوربانییە.
ژیاننامەكەی
شەهید تەها محەمەد داود مەحمود، لەدایكبووی رۆژی 12/1/1957ی گوندی (دێمەكار)ی ناحیەی دیبەگەی قەزای مەخمورە.
لە راپەڕینی ساڵی 1991 بۆتە پێشمەرگە و بەشداریی كاریگەرانەی كردووە لە رزگاركردنی شار و شارۆچكەكانی سنووری پارێزگای هەولێردا.
برایەكیشی كە ناوی (داود) بوو، ساڵی 1988 لە نەبەردییەكدا لە شاخی كونەكۆتر شەهیدكراوە.
شەهید تەها پێشمەرگەیەكی ئازای لەشكری تایبەت بوو، بەشداریی چەندین شەڕی پێشمەرگانەی كردووە.
بەداخەوە، رۆژی 31/ 8/1996 لە گوندی سێبیران- هەولێر، شەهیدكرا.
حەیدەر مەنتك
