ئەیاز هەركی
شەهیدی نەمر، میسر ئەلیاس خەڵەف ناسراو بە میسر شنگالی، لە دایكبووی ساڵی 1989ی خێزانێكی كوردپەروەری عەشیرەتی (مەنتكا)ی كوردی ئێزدییە لە گوندی (كۆچۆ)، دەرچووی قۆناغی سەرەتاییە.
ساڵی 2007 بە بنەماڵەوە پەیوەندییان كردووە بە رێكخستنەكانی یەكێتیی نیشتمانیی كوردستانەوە لە سنووری كۆمیتەی رێكخستنی كۆمەڵگەی (تل قەساب) لە قەزای شنگال، ئەندامێكی چالاكی رێكخستنەكانی یەكێتی بووە لە سنوورەكەی.
ساڵی 2013 بووە بە پێشمەرگە لە فەوجی سێی لیوای111ی یەكەی70، لە بنكەی مەشقی هێزەكانی 70 لە سلێمانی بەشداریی چەندین خول و راهێنانی سەربازیی كردووە، دوای ئەوە لە سنووری پارێزگای موسڵ و شنگال وەك پێشمەرگەیەكی ئازا و چالاك، درێژەی بە خزمەتی پێشمەرگایەتی داوە.
بەرەبەیانیی رۆژی 3/ 8/ 2014، كاتێك تیرۆریستانی داعش قەزای شنگال و دەوروبەرییان داگیركرد، شەهید یاسر ئەلیاس لەگەڵ پۆلێك لە پێشمەرگەكانی یەكێتی لەكاتی بەرگریی لە خەڵكی سنوورەكە، لە نێوان كۆمەڵگەی( تل قەساب) و گوندی (كۆچۆ)، كەوتنە ناو گەمارۆی دوژمن و شەڕێكی قارەمانانەیان كرد، لە ئەنجامدا و دوای نەمانی فیشەك، لەگەڵ 13 پێشمەرگەی دیكەی یەكێتیی نیشتمانیی كوردستاندا، شەهید كران، كە یەكێك لە شەهیدەكان، یاسر ئەلیاسی برای بوو.
شایانی بیرهێنانەوەیە، رۆژی 15/8/2014 دانیشتوانی گوندی (كۆچۆ) لەلایەن چەكدارانی داعشەوە بەشێوەیەكی دڕندانە جینۆسایدكران، كە تێكڕا 514 كەس شەهیدكران، هەروەها % 75ی دانیشتووانی گوندی (كۆچۆ) لایەنگر و ئەندامانی رێكخستنەكانی یەكێتی بوون و زۆرێكیش لەوان لە سلكی پێشمەرگە و پۆلیس و ئاسایش و حزب و بواری كۆمەڵایەتیدا، لە ریزەكانی یەكێتی لە ئەركدا بوون.
بەگوێرەی هەندێك سەرچاوەش ئەو راستییە دوپات كراوەتەوە، خەڵكی كۆچۆ بەهۆكاری ئاینی و باوەڕی سیاسییان كە سەر بە یەكێتیی نیشتمانیی كوردستان بوون، جینۆسایدكران.
