دەرچووان داوای چوونی وەبەرهێنەران دەکەن بۆ شارەکە

״لە هەڵەبجە، بە تەواوی ئاسانکاریی بۆ پرۆژەی وەبەرهێنان دەکەین״

‎‎راپۆرتی/ محەمەد تۆفیق نەورۆڵی

بەڕێوەبەری گشتیی وەبەرهێنانی هەڵەبجە بۆ   کوردستانی نوێ    : لە ساڵی 2024 دا رەزامەندیی ئەنجومەنی وەزیرانمان وەرگرتووە بۆ کەمکردنەوەی قەبارەی سەرمایە، لێخۆشبوون لە باج و دابینکردنی زەوی بۆ وەبەرهێنەران

لە پارێزگای هەڵەبجە، لە ساڵی 2024 دا زیاتر لە 35 مامەڵەی پرۆژە پێشکەش کراوە و بەڕێوەبەری گشتی وەبەرهێنانی هەڵەبجەش دەڵێت: تا کۆتایی ئەمساڵ زیاتر لە پێنج مۆڵەتی پرۆژە دەدەین.
ساڵانێکە دامەزراندن لە کەرتی حکومەت لە ئاستێکی خراپدایە و بە رەسمی دامەزراندن نییە، ئەوە لە کاتێکدایە ساڵانە رێژەیەکی زۆر لە کچان و کوڕانی دەرچووی زانکۆ و پەیمانگاکان کەڵەکە دەبن و بێکارن، ئەمەش جیا لەوەی لە سنووری هەڵەبجە سەدان گەنجی دیکە هەیە کە خاوەنی بڕوانامەنین و هیچ کارێکیان نییە.
‎‎کۆشیار عومەر گەنجێکی دانیشتووی شاری هەڵەبجەیە بۆ کوردستانی نوێ وتی: وەک گەنجێکی هەڵەبجە داوکارم وەبەرهێنەران و سەرمایەداران پرۆژەکانیان بهێننە پارێزگای هەڵەبجە، بۆئەوەی کچان و کوڕانی سنوورەکە دەرفەتی کاریان لە کەرتی تایبەت بۆ بڕەخسێت.
بەڕێوەبەرایەتیی گشتیی وەبەرهێنانی هەڵەبجە لە سەرەتای 2025دا مۆڵەتی داوەتە پرۆژەیەکی وەبەرهێنان، لە پلانیدایە تا کۆتایی ساڵ مۆڵەت بداتە پێنج پرۆژە و دەست بە کارکردن بکرێت تیایاندا

بەڕێوەبەرایەتیی گشتیی وەبەرهێنانی هەڵەبجە لە سەرەتای 2025دا مۆڵەتی داوەتە پرۆژەیەکی وەبەرهێنان، لە پلانیدایە تا کۆتایی ساڵ مۆڵەت بداتە پێنج پرۆژە و دەست بە کارکردن بکرێت تیایاندا

‎دامەزراندن و دەستكەوتنی هەلی كار
‎سۆما شەفیق نزیكەی پێنج ساڵە خوێندنی تەواو كردووە و دانەمەزراوە، بۆ كوردستانی نوێ وتی: تائێستا لە هیچ شوێنێكی حكومی و ئەهلی دانەمەزراوم و لە ماوەی ئەو پێنج ساڵەدا هیچ هەلێكی كارم دەستنەكەوتووە.
وتیشی: هاتنی وەبەرهێنەران و هێنانی پرۆژەكانیان بۆ هەڵەبجە، ئێستا تاكە هیوای دامەزراندن و دەستكەوتنی هەلی كارە لەبەرئەوەی هیچ هیوایەكمان بە حكومەت نییە كە دەرگای دامەزراندن بكاتەوە. 

کەمیی جووڵەی بازرگانی
‎ئەندازیار زانیار حەمە نوری بەڕێوەبەری گشتیی وەبەرهێنانی هەڵەبجە بە کوردستانی نوێی راگەیاند: هەڵەبجە لە رووی هەڵکەوتە و شوێنی جوگرافیاوە سەنتەر نییە و ناکەوێتە نێوان چەند پارێزگایەکی دیکەوە، ئەمە وایکردووە گەشەی ئابووری و جووڵەی بازرگانی کەم بێت و وەبەرهێنەران کەمتر رووبکەنە شارەکە، هەمیشە سەرمایەدار و وەبەرهێنیش روو دەکاتە شوێنێک کە سەنتەربێت و زۆرترین جووڵەی بازرگانی تێدابێت.
‎وتیشی: هەرچەندە سنووری جوگرافیای پارێزگاکە بچووکە و ژمارەی دانیشتوانی کەمە، بەڵام بەهۆی بە پارێزگابوونی هەڵەبجە و کردنەوەی پردەکان و مەرزەکانەوە، شارەکە پێی ناوەتە قۆناغێکی نوێوە، دەکرێت ئەمەش هۆکارێکی گرنگ بێت بۆئەوەی وەبەرهێنی زیاتر رووبکاتە شارەکە.

‎کارئاسانی بۆ وەبەرهێنەران 
‎بەڕێوەبەری گشتیی وەبەرهێنانی هەڵەبجە دەڵێت: لە ساڵی 2024 دا رەزامەندی ئەنجومەنی وەزیرانمان وەرگرتووە بۆ ئاسانکاری کردن بۆ وەبەرهێنەران، کە خۆی لە سێ خاڵدا دەبینێتەوە، ئەوانیش: کەمکردنەوەی قەبارەی سەرمایە، کە کراوە بە نیو ملیۆن دۆلار، لە کاتێکدا پێشتر ملیۆنێک دۆلار و بەرەوژوور دەبوو بە پرۆژەی وەبەرهێنان، یەکێکی دیکە لە خاڵەکان لێخۆشبوونە لە سەرجەم ئەو باج و رسوماتانەی لە قۆناغی پێدانی مۆڵەتدا وەردەگیرێت لە وەبەرهێنەرەکە، خاڵێکی دیکە کارئاسانیکردن بۆ دابینکردنی زەوی کشتوکاڵیی کە تەرخان دەکرێن بۆ پرۆژەکان، بەدەر لەوەش وەک فەرمانگە ئەوەندەی لە دەسەڵاتماندا بێت، کە زۆربەی دەسەڵاتەکانمان پێدراوە لەلایەن سەرۆكی دەستەوە، بە تەواوی ئاسانکاری بۆ پرۆژەی وەبەرهێنان دەکەین.

مۆڵەتدان بە پرۆژە
‎بەڕێوەبەرایەتی گشتیی وەبەرهێنانی هەڵەبجە لە ساڵی 2024دا نزیکەی 35  بۆ 40 مامەڵەی پرۆژەی وەبەرهێنانی لە بەردەستدا بووە، بەڵام هیچ یەکێکیان نەگەشتووەتە قۆناغی مۆڵەت پێدان. 
ئەندازیار زانیار حەمە نوری وتی: خۆشبەختانە لە سەرەتای ئەمساڵدا مۆڵەتێکمان داوەتە پرۆژەیەکی وەبەرهێنان و تا کۆتایی ساڵیش مۆڵەتی کارکردن دەدەینە چەند پرۆژەیەکی دیکە.
‎وتیشی: لە ساڵی 2024 دا پلانێکی تۆکمە و گشتگیرمان دانا کە خۆی لە 50 پرۆژەدا دەبینێتەوە لە سەرجەم سێکتەرە جیاوازەکاندا، کارمان لەسەر نەخشەی وەبەرهێنان کردووە، بە مەبەستی دابینکردنی زەوی بۆ ئەو پلانەی دامانناوە.
‎ئاماژەی بەوەشکرد: خۆشبەختانە توانیومانە لە ساڵی پێشوودا ئەمانە بگەیەنینە ئەنجام، بۆئەوەی لەمساڵدا پرۆژەکان مۆڵەتیان پێ بدرێت و دەست بکەن بە کارکردن، پلانمان هەیە بۆ ساڵی 2025 بچینە سەر و پێنج مۆڵەتی پرۆژە.