دیداری: جێگر خدر - رانیە
شاناز عەلی ئەحمەد، خانمە وەرزشکارێکی ئیدارەی راپەڕین و شاری رانیەیە، لەگەڵ تیمێکی پێنج کەسی، لە راھێنەرانی ناوچە جیاوازەکانی هەرێمی کوردستان، لەسەر ئەرکی قوباد تاڵەبانی لێپرسراوی مەکتەبی سکرتاریەتیی سەرۆک مام جەلال و بە چاودێری بۆردی وەرزشیی یەکێتیی نیشتمانیی کوردستان، بەشداریی خولێکی راهێنەرییان کرد لە ئەکادیمیای ریاڵ مەدرید لە ئیسپانیا، دوای گەڕانەوەی خاتوو شاناز، کوردستانی نوێ پەیوەندیی پێوە کرد و سەبارەت بە سەفەرەکەیان چەند پرسیارێکی لێکرد، ئەویش بەمشێوەیە وەڵامی داینەوە.
ئەو سەرەتا وتی؛ لەدایکبووی شاری رانیەم، مامۆستای وەرزشم لە قوتابخانەی فانی بنەڕەتی، وەک چالاکوانێکی بواری وەرزش کار دەکەم، ماوەی 13ساڵە راهێنەری خۆبەخشم لەفێرگەی تۆپی پێی رانیە، لە ساڵی 2016 - شەوە ناوبژیوانی پلەیەکی عیراقم لە یاری فوتساڵدا.
سەبارەت بەگەشتەکەشیان وتی؛ ئەو خولەی ئەکادیمیای یانەی ریاڵ مەدرید -ی ئیسپانی کە لە ئیسپانیا بەڕێوەچوو، بڕوانامەی ئەو ئەکادیمیایەم بەدەستهێنا، ئەمەش بۆ من ئەزمونێکی نوێی ژیانی وەرزشیم بوو، زۆر شتی نوێ و نەبیسترا و نەبینراو، فێربووم، تەمەن باقی بێت بۆ داهاتوو باشتر لە رابردوو هەوڵەکانم چڕدەکەمەوە لە بواری پەروەردەیی و فێرکردن لە فێرگەدا بۆ شارەکەم و کوردستان.
هەروەها وتی؛ سوپاسی بێ پایانم بۆ بەڕێزان کاک قوباد تاڵەبانی لێپرسراوی مەکتەبی سکرتاریەتی سەرۆک مام جەلال و بەڕێز کاک دابان شەدەڵە جێگری فەرمانگەی پەیوەندییەکانی حکومەتی هەرێمی کوردستان و هاوڕێ و هەڤاڵانم لە بۆردی وەرزشیی یەکێتی نیشتیمانیی کوردستان بە تایبەت کاک د.عەلی تەھا و خوشکی گەورەم ئارەزو مەحمود و برای بەڕێزم شایان عەبدوڵڵا، کە زۆر هاوکار و پشتیوانمان بوون لەو ماوەیەدا.
ھەروەھا سوپاس بۆ متمانەی خانەوادەکەم و هاوسەری ئازیزم ئازاد چنارنەیی کە هەمیشە وەک قەڵایەک لەپشتم بوون، رێز و پێزانینیشم بۆ رۆژنامەی کوردستانی نوێ بۆ ئەم بەسەرکردنەوەیە.
