لەم رۆژانەدا كۆمەڵێك رووداو و بۆنە و یادی رابردوویەكی كۆن دەكەمەوە، كە لە بیرەوەرییمدا شاردرابوونەوە، یادەوەرییەك كە پێم پێدەكەنێت و لە هەمانكاتدا خەمبارم دەكات.
ئێمە لە سەرەتای مانگی شوباتدا بووین، ئەو كاتەی كە بەعسییەكان لەساڵی 1963 بە شێوەیەكی خوێناوی و بە شەمەندەفەری ئەمریكی گەیشتنە دەسەڵات، هەر لەهەمانساڵدا بەعسییەكان لە سوریاش دەسەڵاتیان بەدەسهێنا. ئەمڕۆ شەمەندەفەرێكی نوێی ئەمریكی لە كۆشكی سپی بە دەنگەكەی گوێی خەڵكی لە زۆربەی شوێنەكانی جیهانی كەڕ كردووە، لەكاتێكدا سوریا گۆڕانكارییەكی گەورەی بەسەردا دێت، كە مایەی نیگەرانی زۆرێكە لە خۆرهەڵاتی ناوەڕاست و دەنگۆی جۆراوجۆر بڵاودەكرێتەوە، سەبارەت بە كاریگەرییەكانی گۆڕانكارییەكانی سوریا لەسەر عیراق.
كاتێك هەردوو باڵی حزبی بەعس لە عیراق و سوریا لە ساڵی 1963 گەیشتنە دەسەڵات، ماوەیەكی كورتی هەنگوینیان پێكەوە بەسەر برد و پشتیوانییان لە یەكتركرد. وەك هەمیشە، لاوازەكان دەبنە قوربانی كاتێك خوێنڕێژەكان هاوپەیمانێتی دەبەستن یان ناكۆك دەبن. كورد لە پێشەوەی ئەو لاوازانە بوون كە كرانە ئامانجی هاوكاریی بەعسییەكان، كە من خۆم شایەتی یەكێك لە رووداوەكان بووم لەو ساڵەدا.
جێگای داخە لەڕووی مێژوویی و مرۆڤایەتییەوە، كە گەلانی ئەم ناوچەیە، هێشتا ئەمڕۆ لە هەمان ئەو بارودۆخەدا دەژین، كە لە ساڵی 1963 و دوای ئەویش هەبوو، بارودۆخی توندوتیژیی و ترس و دڵەڕاوكێ و دەمارگیریی
لە یەكێك لە رۆژەكانی 1963 كە تەمەنم ئەوكات شەش ساڵ بوو، ریزێكی درێژی ئۆتۆمبێل هاتنە ناو شاری هەولێر. پیاوەكان جلوبەرگی بەدەوی ناسراویان لەبەردابوو و چەكی درێژیان پێ بوو كە پێدەچوو كۆن بێت. گۆرانی «احنە البدو وین العدو»یان دەوتەوە. مەبەست لە دوژمن، شۆڕشگێڕە كوردەكان بوون. لە بیرەوەرییەكانی باوكمەوە زانیم كە ئەم(بەدەوی)یانە لە سوریاوە هاتبوون بۆ پشتیوانییكردنی گەلی سوریا لە سەركردایەتیی بەعسی عیراق، وەك نیشانەیەك بۆ یەكێتیی هەڵوێست لە نێوان هەردوو وڵاتدا، لەژێر ناوی «فورسان الولید»دا، كە هێزێكی ناڕێكوپێك بوون. هەموو شتێك لەو ریزە سەیر بوو (ئۆتۆمبێلەكان، رووخسارەكان، جلوبەرگەكان، چەكەكان و دەنگەكان) كە پێكەنین و ترسی لە یەككاتدا دروست دەكرد، بۆیە ئەو وێنەیە لە مێشكمدا مایەوە.
باوكم تۆماریكردووە كە ئەم بەدەوییە سورییانە، بە هاوكاری لەگەڵ گروپێك لە كوردە هاوكارەكانی دەسەڵاتی بەعسی عیراق، كە بە «فورسان صلاح الدین» ناسرابوون، لە شەڕێكدا لەگەڵ شۆڕشگێڕە كوردەكان بە سەركردایەتی مەلا مستەفا بارزانی لە گەلی گۆمەسپان بەشدارییان كرد، كە نزیكەی 30 كیلۆمەتر لە هەولێر دوور بوو. زانیمان كە(بەدەوی)یەكان و هاوپەیمانەكانیان لە سەرەتای شەڕەكەوە تووشی شكستێكی گەورە بوون، بەڵام ئەوە تەنها قسە بوو، هەتا دواتر (بەدەوی)یەكانمان بینییەوە بە شكستخواردوویی لە تەنیشت ئۆتۆمبێلەكانیان دانیشتبوون و بریندار بوون، بە چەكە درێژەكانیانەوە كە مابوونەوە، بەڵام ئەمجارە بێ گۆرانی «احنە البدو، وین العدو».
هەستەكان زۆر جۆش و خرۆش بوون لەسەر هەواڵەكانی شەڕەكان كە دەمانبیست. لەبەرئەوە تووڕەیی منداڵانەمان دەربڕی، بەهۆی نەبوونی گەورەكان كە لە ترسی تۆڵەی شكستخواردووەكان خۆیان شاردبووەوە. دەستمانكرد بە بەرد هاویشتن بۆسەر ئۆتۆمبێلەكان، هەتا كاروانەكە بە ناوەڕاستی شارەكەدا تێپەڕبوو بەردباران كران.جێگای داخە لەڕووی مێژوویی و مرۆڤایەتییەوە، كە گەلانی ئەم ناوچەیە، هێشتا ئەمڕۆ لە هەمان ئەو بارودۆخەدا دەژین، كە لە ساڵی 1963 و دوای ئەویش هەبوو. بارودۆخی توندوتیژیی و ترس و دڵەڕاوكێ و دەمارگیریی و گۆڕانكارییە لەناكاوەكان و فێڵ و تەڵەكە و دەستێوەردانی ئەمریكا و لاوازیی سیاسی و دواكەوتوویی رۆشنبیریی و كەلتوری، هەوڵەكان بۆ سڕینەوەی ئەوی تر. گەلانێكی ماندوو لە چاڵێكی قووڵدا، بێ هیچ رووناكییەك كە رێگای دەرچوونیان نیشان بدات، جگە لەڕوانینێكی ئازایانە كە رێگایەكی نوێ پێشنیاز بكات، لە جیاتی ئەم رێگا داخراوەی كە گەلانی ناوچەكە تێیدا دەسوڕێنەوە و زیندانیكراون لە بازنەیەكی بەردەوامدا و بەردەوام دووپات دەبێتەوە «وین العدو»، بەڵام بەردەوام شكستدەهێنن، چونكە تەنها چەكی كۆنیان هەیە و باوەڕیان وایە كە ئەمە بەسە بۆ سەركەوتن لە سەردەمی تەكنۆلۆژیای پێشكەوتوودا.
وە: رەنج جەعفەر
