محەمەد تۆفیق نەورۆڵی
لەم ساڵانەی دواییدا دراما توركی و ئێرانی و كۆی دراما بیانییەكان، شاشەی زۆرێك لە دەزگا میدیاییەكانی كوردستانیان داگیركردووە، داگیركردنەكە بەجۆرێكە تاكی كورد ئالودەی درامای بیانی كراوە، بە ناچاریی و بێ ویستی خۆمان هێدی هێدی کەلتوری وڵاتان لە رێگەی هونەر و دراماوە، وا كاردەكاتە سەر كەلتورە رەسەن و جوانەکەی كوردستان. پەنابردنەبەر هێنانی درامای بیانی و پەخشكردنی لە شاشەكانەوە دەگەڕێتەوە بۆ نەبوونی درامای كوردی بەو ئاستە بەرز و ناوەڕۆكانەی خواستی جەماوەریان لەسەرە، یاخود كەمیی لە بەرهەمهێنانی درامای بە كوالێتییە لە هەرێمی كوردستان، یان بەرهەمهێنانی دراماگەلێكە كە ناوەڕۆك و سیمای لە ئاستێكی لاوازدایە، ئەمەش وادەكات زۆرێك لە دامەزراوەی میدیایی لە كوردستان خۆی بەدووربگرێت لە جۆرە درامایەك كە قابیلی خواستی جەماوەرەكەی نییە و بینەرەکانی كەمن. لەگەڵ ئەوەشدا ناكرێت بڵێین دەرهێنەران و نووسەران و كارەكتەرە كوردەكان، لە ئاستێكی تەواو لاوازدان، نەخێر، بەڵكو دەرهێنەر و نووسەری درامای لێهاتووشمان هەیە و لە هەردوو ئاستەكەدا كاراكتەری هونەریمان هەیە، بەڵام هەندێكجار نەبوونی لایەنی ماددی و مەعنەوی و پشتیوانی نەكردنیان لەلایەن حكومەتی هەرێم و وەزارەت و دامەزراوە تایبەتمەندەکانەوە، رێگرە لە بەردەم بەرهەمهێنانی دراما بە ناوەڕۆك و سیمایەکی باش و بە كوالێتی، هەربۆیە میدیای كوردی ناچاری هێنانی درامای بیانی كراوە، كە بەداخەوە زۆرجار ئەو دراما بیانییانە رەنگدانەوەی نەرێنیی هەبووە لەنێو كۆمەڵگەی كوردیدا، گرنگە وەزارەتی رۆشنبیریی هەرێم، چاودێریی تەواوی ئەو درامایانە بکات و بە فلتەردا تێ بپەڕێنرێن، ئەوکات رێگە بە پەخشكردنیان بدرێت.
