عەدنان شمەری پارێزگاری دیالە لەگەڵ بەرپرسانی خاڵە سنوورییەكانی پارێزگاكە كۆبۆوە و داوای لێكردن توندترین رێگە بگرنەبەر بۆ كۆنترۆڵكردنی بەرهەمی هاوردە، لە پێناو پاراستنی ژیانی هاووڵاتییاندا.
پارێزگاری دیالە لە لێدوانێكدا بۆ كوردستانی نوێ وتی: ژمارەیەك خاڵی سنووریی نێودەوڵەتی لە سنووری پارێزگای دیالەدا هەیە، كە رۆژانە هاوردە و هەناردە و كاری بازرگانییان تێدادەكرێت و كاریگەریی گرنگیان لەسەر دۆخی ئابووری هەیە.
ئاماژەی بەوەشكرد، ئەو خاڵە سنوورییانە داهاتێكی باشیان هەیە بۆ بنیاتناوەی عیراق و بە تایبەتیش بۆ پارێزگای دیالە، چونكە بە هەزاران دەستی كار، كاری تێدا دەكەن، بەڵام لە هەمووی گرنگتر كۆنترۆڵكردنی كوالێتییە لە رێگەی ئەو خاڵە سنوورییانەوە، بۆ ئەوەی شمەك و كەرەستەی تەندروست و ستاندارد هاوردە بكرێت، ئەگەرنا تەندروستی گشتی دەخاتە مەترسییەوە.
ئارۆ سامان
